Colossians 1 - Sa Ugud Apudyus

Sa Laplapun Ni Suḻat

¹ Saḵon aḵ Paul we apostol Jesu Kristu mipagapu si pinion Apudyus ya buḻunku'ḵ Timothy ye sunud taḵu ḵan Kristu.

² Annaya suḻatni ḵan diḵayu we tagun Apudyus ya mataḻgodane susunudni ḵan Kristu ad Colossae. Awad oḵyan ḵan diḵayu ḵinabaḻu ḵan lin-awae maḻpu ḵan Apudyus we Ama taḵu.

Sa Nangiluwaḻuwan Paul Atta Namati'd Colossae

³ Iluwaḻuwanni ḵad diḵayu pasig ḵani anggappiya ḵan Apudyus we Aman Jesu Kristu we Apu taḵu,

⁴ te dingngoḻni mipanggob atte pammatiyu ḵan Jesu Kristu ya sa ayatyu'tta losane tagun Apudyus.

⁵ Ḵaḵnat te namnamaonyu we awad de inggagappot Apudyus ad langite para ḵan diḵayu. Dingngoḻyu'tte awe mipanggob si anna si nangngoḻanyu'tte ugude ḵatuttuwaane siya Ambaḻu we Damag.

⁶ Ḵad sa annae Ambaḻu we Damag we dingngoḻyu, annae miwaḻagawag si intero we lubung. Pun da nandongoḻ naila bungana'tta nantataguda. Ḵaḵna isun ni naḵwa ḵan diḵayu si dingngoḻyu ya naawatanyu mipanggob si ḵatuttuwaan ni ḵinabaḻun Apudyus.

⁷ Inadaḻyu anna ḵan Epaphras we ay-ayatonni ye buḻun ya mataḻgodane anserbi ḵan Kristu we angiyugud ḵan diḵani sinat,

⁸ ya siya nangibaga si mipanggob atte ayatyu ḵan diḵani ya da buḻunyu mipagapu si badang ni Ispiritu Santu.

⁹ Sa inggan ni aḻgawe nangngoḻanni, adinipun iginoḵe angiluwaḻu ḵan diḵayu. Ḵodaḵodawonni ḵan Apudyus we itton oḵyan ni Ispirituna ḵan diḵayu da losane laing ḵan pannakaawat ta igammuwonyu nu ngai pinion Apudyus ḵan diḵayu.

¹⁰ Te nu ḵatti, maḵwae unudonyu antatagu we mibagay atte ḵinabaḻun Apu ya pasigyu ḵoon da amalayad ḵan siya. Ḵad ambaḻu ibungan da losane ḵoonyu ya madog-an igammuyu mipanggob ḵan Apudyus.

¹¹ Oḵyan pos ta sa nakaskasdaawe ḵabooḻan Apudyus amapigsa'tta somsomoḵyu ya lumayad ḵayu ta taḵon ay nu ngai maḵwa ḵan diḵayu, lamogyu maattomane angiyanus.

¹² Pasig ḵayu anggappiya ḵan Apudyus we Ama taḵu we nangitod ḵan ditaḵu si ḵaḻabbongane maḵatawid atta insaganana'tta losane taguna si ampaddae ampangatana.

¹³ Te siya nanagu ḵan ditaḵu si ḵabooḻan ni pangat atte giḵbot woḵ indogana ditaḵu si ampangatan ni ay-ayatonae Abengna,

¹⁴ we sa nanubut ḵan ditaḵu, sa piona ḵanan napakawan da basuḻ taḵu.

Sa Ḵinangatun Ni Saad Jesus

¹⁵ Aḵ Kristu angil-an taḵu si ḵinaapudyus Apudyus we adipun maila. Gagangaye inggaw si daan ni lubung maḵwaan ḵad siya ḵangatuwan atta losane ḵingwana.

¹⁶ Te mipagapu ḵan siya nangwaan Apudyus atta losane awad ad langit ya da awad sina'd luta, da maila ḵan adipun maila, midoga da papangate isuna bos atta nankalakalasi ye ispiritu we awad da ḵaḻabbonganda ḵan ḵabooḻanda. Ḵingwana da losane banag mipagapu ḵan Jesu Kristu ya para'tte madayawana.

¹⁷ Inninggaw aḵ Kristu si daan ni lubung maḵwaan ya siya aangdon atta losan ta mauḻnusda.

¹⁸ Siya isun di uḻu taḵu we namati, ḵad ditaḵu isun di long-agna. Ḵad siya bos maḻpuwan ni mataguwan taḵu te siya panguḻu we Abeng Apudyus we ummuli ta ambalin aḵ ḵangatuwan atta losan.

¹⁹ Te pinion Apudyus we losane ḵinaapudyusna awad atte Abengna.

²⁰ Simsimmoḵna ḵasine mipagapu'tte sanae Abengna, losane awad ad luta ya ad langit nipaḻ-og maḵabuḻbuḻunan Apudyus ḵan dida. Ḵad gapu'tte daḻanae pummoy-as si natoyana'tte kros, maḵalin-awa taḵu ḵan Apudyus.

²¹ Taḵon ay diḵayu'tte awe, adayu ḵayu ḵan Apudyus ḵad sinullagiyu gapu'tte ḵingwayu ya ansosomsomoḵyu.

²² Yaḵon sinsadi nagangpute nipaḻ-og maḵabuḻbuḻunanyu ḵan Apudyus te aḵ Kristu natoy si nangidatunana'tte mismu we long-agna ta bumaḻu ugaliyu ya ippun ḵadellawanyu ḵan ipabasuḻda ḵan diḵayu si amataḵdogana ḵan diḵayu si sinagungna.

²³ Yaḵon ḵasapuḻane pagatupanyu we amapigsa'tta pammatiyu ya adiyu ipyode mayugayug namnamayu we ginanabyu si nandongoḻanyu si Ambaḻu we Damag we niwaḻagawag si intero we lubung. Ḵad sana gapunae saḵon aḵ Paul, nambalinaḵ aḵ anserbi ḵan Kristu.

Sa Nanserbiyan Paul Atta Namati

²⁴ Sinsadi allaylayadaḵ atta ampaḵaḻamaḵ te igammuḵe bumaḻuwanyu te da sanae ampaḵaḻamaḵ dogan ni ampaḵaḻamane nilaḵ-am Kristu para'tta losane namati ye isun di long-agna.

²⁵ Dinutuḵanaḵ ḵan Apudyus aḵ anserbi'tta namati ḵad intaḻgodna ḵan saḵon ḵewaaḻe angipaigammu si tuttuwae Ugud Apudyus.

^26-27 Sa annae ugudnae impaigammuḵ ḵan diḵayu, adipun nipaigammu'tte awe taḵon ay ngai ye tagu. Yaḵon simsimmoḵ Apudyus we ipaigammuna sinsadi ḵan ditaḵu we tagunae nidoga taḵu we Gentil. Ḵad sana ambaḻu ḵan nakaskasdaawe impaigammun Apudyus. Iinggaw aḵ Kristu ḵan diḵayu, pun siya namnamaonyu we midog-anyu si ḵabaḻuwane antatagu ḵan Apudyus ad langit.

²⁸ Iwaḻagawagni'ḵ Kristu atta losane tagu we usaronni losane laingni ye amagbaga ya angituttudu'tta losane tagu ta da pammatida ippun oḵyan kurangna'tte antotollong Apudyus yaḵon amo maangsanda'tte niyossaananda ḵan Kristu.

²⁹ Iggaḵ losane ḵabooḻaḵ ta mituttuwa da sana'tte angusaraḵ si ampigsae ḵabooḻane innatod Kristu ḵan saḵon.