Acts 9 - Sa Ugud Apudyus

Sa Namatiyan Saul Ḵan Jesus

¹ Sa sadi ye timpu, pinagatupan Saul we nangoḻḵog ya nangongat atta disipulun Apu, pun ummoy si ḵangatuwane padi

² woḵ nanḵodaw aḵ suḻat atta papangat da sinagogan da Judyu ad Damascus ta andoḵma'tta ngaimane odasanae laḻaḵi baḵon nu bubai ye angunud atta tuttudun Jesus ḵad iyoyna dida ibaḻud ad Jerusalem.

³ Sissiya ḵad si daḻan atte madam-an ad Damascus, baag-en nanguliyatyat paddae naḻpu'd langite nalliḵwos ḵan siya.

⁴ Pun naottag woḵ dingngoḻna gingae ḵanana ḵan siya, “Saul, Saul, ngaipam saḵon ampaḵaḻamon?”

⁵ Ḵanan Saul, “Ngaiḵa, Apu?” Pun ḵanana, “Saḵon aḵ Jesus we ampaḵaḻamom.

⁶ Yaḵon allibbatḵa ta inḵa si siyudad ḵad awad de angibaga ḵan siḵa si ḵasapuḻane ḵoom.”

⁷ Summiḵad da buḻun Saul we adidapun maḵaginga te dingngoḻda ginga yaḵon ippun innilada'ḵ tagu.

⁸ Summiḵad ḵad aḵ Saul, nandiyat pun ippun ilana. Pun ḵiniwid da buḻunna woḵ inniyoyda'd Damascus.

⁹ Tuḻun aḻgawe ippun ilana ya adipun nangan ḵan umminum.

¹⁰ Inggaw disipulun Apudyus ad Damascus we Ananias ngadanna. Nampaila'ḵ Apu Jesus ḵan siya si isun di in-inop woḵ ḵanana, “Ananias.” Ḵanan Ananias, “Annaaḵ, Apu.”

¹¹ Ḵanan Apu ḵan siya, “Allibbatḵa ta inḵa si ḵaḻsae ngannonda Nanggodong ḵad imusom boḻoy Judas nu awad aḵ Saul we iTarsus te awade alluwaḻu.

¹² Ḵad innilana si in-inop laḻaḵi ye Ananias ngadannae ummali ya impatayna imana ḵan siya ta maḵaila.”

¹³ Yaḵon summongbat aḵ Ananias woḵ ḵanana, “Apu, adu da nangngoḻaḵ si mipanggob atte annae tagu ya adu da ḵingwana'tta tagum ad Jerusalem.

¹⁴ Ḵad annae ummali sinae naittan aḵ ḵaḻabbongane naḻpu'tta papangat da papadi ta andoḵma'tta losane anḵodaw aḵ ḵadagu ḵan Apu.”

¹⁵ Yaḵon ḵanan Apu ḵan siya, “Inḵa te siya piniliḵe anserbi ḵan saḵon ta umoyna ipaigammu mipanggob ḵan saḵon atta Gentil, da ari ya diḵayu we ganaḵ Israel.

¹⁶ Ipailaḵ ḵan siya ummamdane ampaḵaḻamanae asina laḵ-amon mipagapu'tte ngadanḵu.”

¹⁷ Pun ummoy aḵ Ananias woḵ nillumnoḵ atte boḻoye inninggawan Saul. Pun impatayna da imana ḵan siya woḵ ḵanana, “Sunudḵu we Saul, aḵ Apu Jesus we nampaila ḵan siḵa si daḻan, siya nangibuun ḵan saḵon ta maḵailaḵa ya umoy ḵabooḻan ni Ispiritu Santu ḵan siḵa.”

¹⁸ Imbagan ḵad ay Ananias sadi, daguse naottag isunan sipsipe naḻpu'tte atan Saul woḵ lamogna naḵaila. Pun tummaḵdog woḵ nampabonyag.

¹⁹ Nangan ḵad pummigsa. Pun naḵaigaw aḵ Saul atta namati'd Damascus atte adu we aḻgaw.

Sa Nangiwaḻagawagan Saul Mipanggob Ḵan Jesus

²⁰ Pun ummoy atta sinagogan da Judyu woḵ daguse insaḻadnae nangiwaḻagawage aḵ Jesus Abeng Apudyus.

²¹ Nataag da losane nandongoḻ woḵ nan-asiimusda, “Daḵampun ḵamman aḵ sanat tagu we namaḵaḻam atta anḵodaw aḵ ḵadagu ḵan Apu ad Jerusalem? Daḵampun ḵamman aḵ siya panggobnae ummali sina umoy andoḵma'tta namati ya iyoyna didae nababaḻud atta papangat da papadi?”

²² Yaḵon amo pummigsa ḵabooḻan Saul we angiwaḻagawag. Pinanoḵnoḵanae aḵ Jesus siya Kristu ḵad da Judyu'd Damascus adidapun maḵasongbat ḵan siya.

²³ Naḻaḵpus ḵad adu we aḻgaw, nantutuḻag da Judyu si inondae angongat ḵan Saul.

²⁴ Yaḵon igammun Saul planun da Judyu. Inaḻgaw ya nilabi ye umoyda bangabangon atta lewangan ni siyudad ta gongatonda.

²⁵ Yaḵon sillabiyan ḵad innaḻan da namati daḵoḻe batawil woḵ iggada'ḵ Saul pun impaoyda si nitaange ḵabitin ni siyudad woḵ inuyudda'tte lasin ni ḵabiti inggana'tte luta.

Sa Nipauliyan Saul Ad Jerusalem

²⁶ Dummatong ḵad aḵ Saul ad Jerusalem pinadasna umoy midoga'tta namati ḵan Jesus. Yaḵon maḵimutda losan ḵan siya te adidapun patiyone osae namati ḵan Jesus.

²⁷ Pun inniyoy Barnabas aḵ Saul atta apostol woḵ imbagana ḵan dida inon Saul we nangila ḵan Apu Jesus atte daḻan ya sa inon Jesus we naḵaug-uggud ḵan siya. Pun imbagana tuḻod Saul we nangiwaḻagawag mipanggob ḵan Jesus ad Damascus.

²⁸ Inninggaw aḵ Saul ḵan dida'd Jerusalem woḵ tinuḻodanae nangiwaḻagawag atte mipanggob si ngadan Apu.

²⁹ Pun naḵaug-uggud ya naḵasossongbat atta Judyu we Greek gingada yaḵon singsingtonda inondae angongat ḵan siya.

³⁰ Inigammun ḵad da susunudna ḵan Kristu, inniyoyda'd Caesarea woḵ imbuunda'tte siyudad ad Tarsus.

³¹ Pun lummin-awa da gimung da namati ḵan Jesus atta adu we ili'tta probinsiya'd Judea, Galilee ya ad Samaria te ippun ogon udum aḵ amaḵaḻam ḵan dida. Gapu si badang ni Ispiritu Santu pummigsa pammatida ya ummaduadu da namati ya isipogda'ḵ Apudyus.

Sa Ummayan Peter Ad Lydda Ya Ad Joppa

³² Aḵ Peter ḵad, ummoyna binisita da tagun Apudyus atta ḵinailin di ili. Pun dummatong ḵad ad Lydda,

³³ indasana laḻaḵi ye nangngadan aḵ Aeneas we innuumbog si waḻun tawon te naparalaes.

³⁴ Ḵanan Peter ḵan siya, “Aeneas, ḵaanon Jesu Kristu saḵitnu. Bumangonḵa ta luḵubom oboḵnu!” Pun daguse bummangon.

³⁵ Pun losan da umili'd Lydda ya ad Sharon innila woḵ namatida ḵan Apu Jesus.

Sa Ummuliyan Dorcas

³⁶ Ad Joppa inninggaw bubai ye namati ye Tabitha ngadanna. Sa ngadanna'tte Greek we ugud Dorcas, piona ḵanan ugsa. Pasig ambaḻu da ḵoona ya bumabbadang atta ḵapus.

³⁷ Sa sadi ye timpu, nasaḵit aḵ Tabitha woḵ natoy. Inamosda woḵ ummoyda pinaobog si kuwartu'd ngatu.

³⁸ Pun dingngoḻ ḵad da namati ye awad aḵ Peter ad Lydda we adanina'd Joppa, nambuunda'ḵ duwae laḻaḵi aḵ umoy angayag ḵan siya woḵ ḵanandae nandagdagu, “Agagam ḵappos ta intaḵu'd Joppa.”

³⁹ Pun nallibbat aḵ Peter woḵ nibuḻun ḵan dida. Dummatongda ḵad, impuyutda'tte ngatu we kuwartu we igaw ni natoy. Sin-iibil da losane baḻu we sisiḵad si daḻnig Peter woḵ ipailada ḵan Peter da langgoyod ya da udume silupe ḵingwan Dorcas si inninggawana ḵan dida.

⁴⁰ Yaḵon pinaḻawan Peter dida losan woḵ nanalluḵu we nalluwaḻu. Naabus ḵad, nansagung si natoy woḵ ḵanana, “Tabitha, bumangonḵa.” Pune sadi, nandiyat woḵ innilana ḵad aḵ Peter, tummuḵdu.

⁴¹ Innonnan Peter imana woḵ pinataḵdogna. Pun inayagana da sadi ye baḻu ya da udume tagun Apudyus woḵ impailana ḵan dida'ḵ Dorcas we natagu.

⁴² Nandinongoḻ annae naḵwa'tta losane ili'd Joppa woḵ adu da namati ḵan Apu Jesus.

⁴³ Inninggaw aḵ Peter ad Joppa si adu we aḻgaw si boḻoy Simon we sa anḵoḵopya'ḵ laḻat.