Acts 5 - Sa Ugud Apudyus

Da Ananias Ḵan Sapphira

¹ Yaḵon inggaw da an-asawae da Ananias ḵan Sapphira we ingnginada lutada.

² Nantuḻagandae itaḻuda udume bayad ni lutada. Pun ummoy Ananias innatod udume nginana'tta apostol woḵ ḵanana, “Annaya bayad ni lutani.”

³ Yaḵon ḵanan Peter, “Ananias, ngaipam iyunude aḵ Satan anḵewaaḻ atte somsomoḵnu ya nantultulliḵa si Ispiritu Santu atte nangitaḻuwam si udume bayad ni lutayu?

⁴ Sa daanyu angingin-an atte lutayu sissiyae ḵuwayu. Pun ingnginayu ḵad, awad ḵan diḵayu nu ngai pionyu angastuwan si bayadna. Ngaipam ay simsimmoḵ ḵoon sadi? Daḵampun aḵ tagu nantultulliyam yaḵon aḵ Apudyus!”

^5-6 Dingngoḻ ḵad Ananias imbagan Peter, napittuwaḵ woḵ natoy. Pun nillumnoḵ da babaḻu woḵ binusdungda'tte luput long-agna woḵ ummoyda illibon. Da losane nangngoḻ atta naḵwa ḵan siya amod de ḵimutda.

⁷ Naḻaḵpus ḵad de tuḻu we oras, dummatong os asawanae aḵ Sapphira yaḵon ippun igammuna si naḵwa.

⁸ Ḵanan Peter ḵan siya, “Ibagam ud nu sana pagay bayad ni lutayu.” Ḵanana, “On, siya sanat.”

⁹ Ḵanan Peter, “Ngaipayu we an-asawa antuḻagane padason Ispiritun Apu? Dongngom, ḵodoḵodog da babaḻu atte sawange ummoy nangilibon ḵan asawam. Ḵad asida bos siḵa adangoyon ilawa.”

¹⁰ Pun daguse napittuwaḵ aḵ Sapphira atte sinagung Peter woḵ natoy. Nillumnoḵ ḵad da babaḻu, indasandae natoy. Pun inadangoyda bos woḵ ummoyda illibon si daḻnig ni nilibonan asawana.

¹¹ Pun da losane namati ya da losane nangngoḻ atte naḵwa, amod pagay ḵimutda.

Da Nakaskasdaawe Ḵingwan Da Apostol

¹² Sa sadi ye timpu, adu da nakaskasdaaw ḵan sinyale ḵingwan da apostol atta adu we tagu. Ḵad madagudagup da losane namati si partin ni templo we ngannonda Sawang Solomon.

¹³ Da adipun namati maḵimutdae umoy midoga ḵan dida. Yaḵon patgan da tagu dida.

¹⁴ Yaḵon amo ummaduadu da laḻaḵi ya da bubai ye namati ḵan Apu Jesus woḵ nadog-anda.

¹⁵ Pune sadi nan-iyoyda'tta nasaḵit si ḵaḻsa ya pinaobogda dida'tta ḵama ḵan oboḵda te nu lumaus aḵ Peter, taḵon ay nu abuse maidunganda'tte aniniwanna, maḵaan da saḵitda.

¹⁶ Aduadu bos da tagu we nandatdatonge naḻpu'tta ili ye nampaliḵwos ad Jerusalem, nan-idatongda'tta nasaḵit ya da naaḻanan woḵ losan naḵaan da saḵitda.

Sa Nampaḵaḻaman Da Apostol

¹⁷ Yaḵon da ḵangatuwane padi ya da losane grupun da Sadducee, amod de aposda'tta apostol.

¹⁸ Pun ummoyda dinoḵmaan da apostol woḵ imbaḻudda dida.

¹⁹ Yaḵon lummabi ḵad, binuḵtan ni anghel Apu onob ni babaḻḻudan woḵ illawana dida woḵ ḵanana,

²⁰ “Inḵayu si templo ya ibagayu'tta tagu mipanggob si biyag aḵ inggana.”

²¹ Dingngoḻda ḵad sana, nillumnoḵda si templo atte wiḵwiḵis woḵ nantuttududa. Dummatong ḵad de ḵangatuwane padi ya da buḻunna, inayaganda da ḵuḵunsisaḻ ya da losane pallakayon ad Israel. Pun imbuunda da guwaḻdan ni templo ta umoyda aḻan da apostol atte babaḻḻudan.

²² Yaḵon dummatongda ḵad sidi, naiddapun woḵ nipaulida'tta ḵuḵunsisaḻ.

²³ Ḵananda, “Dummatong ḵani ḵad atte babaḻḻudan, nidaḵig da onob ya inninggaw os da guwaḻdae sisiḵad si lewangan ni sawang. Yaḵon binuḵtannipun, ippun tagu'd daḻom.”

²⁴ Dingngoḻ ḵad ni kapitan da guwaḻdan ni templo ya da papangat da papadi imbagada, nasaliduduwanda si mipanggob atta apostol woḵ mataagda nu ngai umasi ye maḵwa ḵan dida.

²⁵ Pun dummatong osae ḵanana ḵan dida, “Dongngonyu anna. Da sadi ye imbaḻudyu, awadda si templo we antuttudu'tta tagu.”

²⁶ Pun ummoy ni kapitan ya da guwaḻdan ni templo innaḻa dida. Yaḵon adidapun pinatut dida te maḵimutda'ḵ batuwon da tagu dida inggana'ḵ matoyda.

²⁷ Inniyoyda da apostol atte sinagung da ḵuḵunsisaḻ. Pun sinumaḻyan ni ḵangatuwane padi dida.

²⁸ Ḵanana, “Binilibilinni diḵayu we adiyu ituttudu mipanggob atte ngadan ni annae tagu. Yaḵon amo impaigammuyu si intero we Jerusalem ya ipabasuḻyu bos ḵan diḵani natoyana.”

²⁹ Yaḵon ḵanan da Peter ya da buḻunnae apostol we summongbat, “Ḵasapuḻane tuttuwaonni'ḵ Apudyus, daḵampun atta tagu.

³⁰ Sa Apudyus da danaḵḵoḻ taḵu tinaguna'ḵ Jesus we gingngatyu si nangipattoḻanyu'tte kros.

³¹ Intaḻayag Apudyus atte madawinanna ta siya angipangat ya anagu ḵan ditaḵu ta ittana da ganaḵ Israel aḵ wayadae angibabawi'tta basuḻda ya agaydae angwa ta mapakawanda.

³² Diḵani da anaḵdoḻ atta sana ya sa Ispiritu Santu we innatod Apudyus atta anuttuwa ḵan siya.”

³³ Dingngoḻ ḵad da ḵuḵunsisaḻ sadi, amod de sangada woḵ pionda gongaton da apostol.

³⁴ Yaḵon inggaw osae Pharisee atta ḵuḵunsisaḻ we nangngadan aḵ Gamaliel we mistulun ni lintog ya mapatgan atta tagu. Summiḵad woḵ ḵanana, “Paḻawaonyu yan dida'ḵ sin-aḵitan.”

³⁵ Pun ḵanana ḵan dida, “Susunude ganaḵ Israel, umman taḵu annadan ḵoon taḵu'tta annae tagu.

³⁶ Te sa awe, inggaw aḵ Theudas we ngannona long-agna'ḵ pangat woḵ umoye opat gasute laḻaḵi da nitun-ud ḵan siya. Gingngat ḵad da suḻdadu, nabuḵaḻ da losane nitun-ud ḵan siya woḵ ippun nambanaganda.

³⁷ Sibotna ḵad, inninggaw os aḵ Judas we naḻpu'tte probinsiya'd Galilee atte timpun ni nampalistaan da tagu. Adu da nitun-ud ḵan siya. Yaḵon gingngatda bos woḵ nabuḵaḻ da losane nitun-ud ḵan siya.

³⁸ Pun sa ibagaḵ ḵan diḵayu sinsadi, ḵinnuwanda ya paoyononyu dida. Te nu siya panggobda baḵon nu ḵoonda maḻpu si ḵasomsomḵan di tagu, ippun ambanagana.

³⁹ Yaḵon nu aḵ Apudyus naḻpuwana, adiyupun lamog oḻgon dida te aḵ Apudyus we mismu sullagiyonyu.”

⁴⁰ Pun tinuttuwan da ḵuḵunsisaḻ imbagan Gamaliel. Inayaganda ḵad da apostol, impaaplitda dida. Pun imbilinda bose adida an-ugud si mipanggob si ngadan Jesus woḵ puḵayanda dida.

⁴¹ Tinenan ḵad da apostol da ḵuḵunsisaḻ, amod de layadda te imbelang Apudyus didae labbongdae mapaḵaḻam ḵan mibabbain gapu ḵan Jesus.

⁴² Ḵad inaḻgawe ummoyda'tte paway ni templo ya da boboḻoy ta pagapagatupandae angituttudu ya angiwaḻagawage aḵ Jesus siya Kristu.