Acts 4 - Sa Ugud Apudyus

Sa Nanumaḻyaanda Ḵan Da Peter Ḵan John

¹ Sissiya ḵade an-uguugud da Peter ḵan John atta tagu, dummatong da papadi, da Sadducee ya sa kapitan da guwaḻda'tte templo.

² Summangada te intuttudun da Peter ḵan John we ummuli'ḵ Jesus ya iwwaḻagawagdae umuli da losane natoy.

³ Gapu'tte sadi, dinoḵmaanda dida woḵ inniyoyda dida si babaḻḻudan te annae lumabi ta asida dida sumaḻyaon appigat.

⁴ Yaḵon adu da nandodongngoḻ atte inugudda woḵ namatida. Sa belang da laḻaḵi umoye limallibu.

⁵ Mabigat ḵad, nadagup da papangat, da pallakayon da Judyu ya da mimistulun ni lintog ad Jerusalem,

⁶ nidoga'ḵ Annas we ḵangatuwane padi ya aḵ Caiaphas, John, Alexander ya da udume agin ni ḵangatuwane padi.

⁷ Pun da Peter ḵan John pinataḵdogda dida si sinagungda woḵ ḵanandae nanumaḻya ḵan dida, “Dinu naḻpuwan ni ḵabooḻanyu ya ngai singngadan atte inusaryu we nangwa si anna?”

⁸ Pun naittan aḵ Peter atte ḵabooḻan ni Ispiritu Santu woḵ ḵanana, “Diḵayu we papangat ya pallakayon,

⁹ nu sumaḻyaonyu diḵani sinsadi mipanggob si ambaḻu we ḵingwani'tte annae napilay ya sa inonae naḵataddaḻan,

¹⁰ dongngonyu ta ipaigammuḵ ḵan diḵayu ya da losane ganaḵ Israel. Sa annae tataḵdog si sinagungyu, nanaddaḻan gapu'tte ḵabooḻan Jesu Kristu we iNazareth. Siya sadi ye impattoḻyu'tte kros yaḵon tinagun Apudyus ḵasin.

¹¹ “ ‘Sa annae Jesus siya batu we indiyanyu we nantaḵad aḵ boḻoy, siya nambalinon Apudyus aḵ ḵapatogane batu we amapagdot si boḻoy.’

¹² Abus aḵ Jesus aḵ Anagu ḵan ditaḵu. Te naippun udum aḵ ngadan si intero we lubung aḵ innatod Apudyus atta tagu'ḵ maḵwae anagu ḵan ditaḵu.”

¹³ Innilan ḵad da ḵuḵunsisaḻ tuḻod da Peter ḵan John nataagda te igammudae nababa ḵasasaaddae tagu we adidapun naadaḻan. Pun immatunandae nibuḻubuḻunda ḵan Jesus.

¹⁴ Yaḵon naippun maibagada te annae iillandae sisiḵad sadi ye laḻaḵi ye naḵaan pilayna si daḻnig da apostol.

¹⁵ Pun pinaḻawada dida ta umabusdae ḵuḵunsisaḻ aḵ an-uugud.

¹⁶ Ḵananda, “Ngai ḵoon taḵu'tta annae tagu? Te igammun da losane tagu'd Jerusalem da nakaskasdaawe sinyale ḵingwada ḵad adipun maḵwae isilib taḵu.

¹⁷ Yaḵon sa ḵoon taḵu ta adida ogon iyasaḵ atta tagu, ḵoḻḵogon taḵu dida ta adida pagapagatupane angug-uggud atta tagu si mipanggob si ngadan Jesus.”

¹⁸ Pun inayaganda bos da Peter ḵan John woḵ binilinda dida ta adida ogon an-ugud baḵon nu antuttudu'tta ngaimane tagu we usaronda ngadan Jesus.

¹⁹ Yaḵon ḵanan da Peter ḵan John we summongbat, “Ḵuwisonyu we mismu da long-agyu nu ustu si antotollong Apudyus we diḵayu tuttuwaonni baḵon nu aḵ Apudyus.

²⁰ Te diḵani ḵad, adipun maḵwae iginoḵni ye angibagabaga'tta innilani ya da dingngoḻni.”

²¹ Nagangput ḵade ḵinoḻḵog da ḵuḵunsisaḻ dida, pinaoyonda dida te adidapun maḵaḵasḵasmoḵ nu ngai inondae anusa ḵan dida te adu da tagu we nandaydayaw ḵan Apudyus gapu'tte nakaskasdaawe naḵwa.

²² Sa sadi ye tagu we naḵaan pilayna lummabose opatpuḻu tawonna.

Sa Luwaḻun Da Namati Ḵan Jesus

²³ Napuḵayan ḵad da Peter ḵan John, ummoyda'tta buḻundae namati woḵ imbagada ḵan dida da losane imbagan da papangat da papadi ya da pallakayon da Judyu.

²⁴ Dingngoḻ ḵad da buḻundae namati, nan-os-ossaandae nangidangsoḻe nalluwaḻu ḵan Apudyus, ḵananda, “Maḵabooḻe Apu we nangwa si langit, luta ḵan baybay ya da losane awad ḵan dida.

²⁵ Mipagapu si Ispiritu Santu, nan-ugudḵa mipagapu si daḵdaḵoḻ taḵu we aḵ Ari David we sammilume ḵanana, “ ‘Ngaipa da Gentil ansasanga ḵan Apudyus? Ḵad ngaipa da tagu ansomsomoḵ atta ippun anuda?

²⁶ Nansagana da ari si annae lutae maḵagubat ya nandatdatong da papangate bumusuḻ ḵan Apu ya sa Kristu we dinutuḵana.’

²⁷ Sadi imbagan Ari David te da Herod ḵan Pontius Pilate ya da Gentil ya da ganaḵ Israel nadagupda'd Jerusalem ta antutuḻagdae gongatonda'ḵ Jesus we nasantuwane sammilume dinutuḵam.

²⁸ Ḵad ḵingwada da ngaimane simsimmoḵnu si awe mipagapu'tte ḵabooḻam ḵan piome maḵwa.

²⁹ Sinsadi Apu, dongngom da sanae iḵoḻḵogda ḵan diḵani ye sammilum. Ittam ud diḵani'ḵ tuḻode angibagabaga si ugudnu.

³⁰ Ipailam ḵabooḻame angaan atta saḵit ya angwa'tta nakaskasdaaw mipagapu'tte ḵabooḻan Jesus we nasantuwane sammilum.”

³¹ Nalluwaḻuda ḵad, nayyugayug boḻoye nadagupanda. Pun ummoy ḵabooḻan ni Ispiritu Santu ḵan dida woḵ tummuḻoddae nangiwaḻagawag si Ugud Apudyus.

Sa Nan-asibadangan Da Namati

³² Losan atta namati nan-os-ossaan ḵasomsomḵanda. Adidapun ibelange ḵuwada da ḵuḵuwada yaḵon siya ḵoonda nan-aḵ-atodda.

³³ Gapu si amode ḵabooḻane naatod atta apostol, tinaḵdoḻandae ummuli'ḵ Apu Jesus. Ḵad amod de ḵinabaḻun Apudyus we naatod ḵan dida.

³⁴ Naippun maaminan ḵan dida te da awad da lutada baḵon nu boḻoyda, nan-inginada ya innatodda da nginada'tta

³⁵ apostol ta asida ḵigade angiwaḻas atta udume namati sigun si ḵasapuḻan ni sin-ossaossa.

³⁶ Inggaw aḵ Joseph we osae ganaḵ Levi we iCyprus we nginadanan da apostol aḵ Barnabas sa piona ḵanan Sumoḻgag.

³⁷ Ingnginana lutana woḵ innatodna nginana'tta apostol.