Acts 28 - Sa Ugud Apudyus

Sa Inninggawan Paul Ad Malta

¹ Dummatong ḵani ḵad si taḻantag, wadawad ḵani ya inigammuni ye Malta ngadan ni lugar we dummaḵnganni.

² Da umili sidi, nisagasagawdae nammangili ḵan diḵani woḵ nan-apuyda ta an-aniduwanni te ummudan ya amod de tungnin.

³ Nandagup aḵ Paul aḵ simposote ḵayu woḵ intunguna si apuy. Gapu si atungna, natanoḵwaḻ uḻoge umtoy woḵ ḵinotbana iman Paul woḵ niputiput.

⁴ Innilan ḵad ay da umili uḻoge antatayyun si iman Paul, ḵananda'tta udum, “Ippun liyodnae pumappatoy sanate tagu, taḵon ay nu naḵalasat atte baybay, adimpun ni anusa'tta tagu iyunude matagu.”

⁵ Yaḵon daguse iwwagwag Paul uḻog si apuy, pun naippun naḵwa ḵan siya.

⁶ Ninamnamadae lumtog imana baḵon nu mapittuwaḵ ya matoy. Yaḵon panos ḵad nanguuwayanda, inniladae ippun lawweng aḵ naḵwa ḵan siya. Binaliwanda da somsomoḵda woḵ insaḻaddae nangibagae siya apudyus.

⁷ Adani si sanate taḻantag lutae ḵuwan Publius we pangat da tagu si annae ili si gawan ni baybay. Nisagawe nammangili ḵan diḵani si tuḻun aḻgaw.

⁸ Niyaspuḻ ose an-atung ḵan napitut aman Publius. Pun ummoy Paul innila woḵ illuwaḻuwana, impatayna da imana ḵan siya woḵ naḵaan saḵitna.

⁹ Naḵwa ḵad ay sadi, ummoy da nasaḵite udum ḵan Paul woḵ ḵinaanna da saḵitda.

¹⁰ Adu da innatoddae atodda ḵan diḵani woḵ anna ḵade inḵanin, indatongda da losane ḵasapuḻan ni ye ambaat.

Sa Dummaḵngan Da Paul Ad Rome

¹¹ Naḻaḵpus ḵad tuḻun buḻane inninggawanni'd Malta, nambapur ḵani si bapur we naḻpu'd Alexandria we inninggaw sidi si timpun ni ageled. Sa maḻḵana ḵad si sangu, ḵapile apudyus.

¹² Pun dummatong ḵani'd Syracuse woḵ inninggaw ḵani sidi'ḵ tuḻun aḻgaw.

¹³ Pune sadi pinagatupanni ye nambapur woḵ dummatong ḵani'd Rhegium. Naḻaḵpus ḵad sin-aḻgaw, inggaw bibbide naḻpu'tte naḻpuwanni. Mabigat ḵad, naḵtad ḵani'd Puteoli.

¹⁴ Sidi nangdasanni'tta udume susunud ḵan Kristu woḵ tinawidan diḵani ta inggaw ḵani ḵan dida'ḵ sindumingguwan. Sa sadi ḵad dummatong ḵani'd Rome.

¹⁵ Dingngoḻ ḵad ay da susunudni ḵan Kristu ad Rome we inḵani sidi, ummoy diḵani inabot ad Appius we andaḵdaḵngan da tagu ya da udum atte ngannonda Tuḻu we Dadawwosan. Innilan ḵad Paul dida, nanggappiya ḵan Apudyus woḵ nasoḻgag somsomoḵna.

¹⁶ Dummatong ḵani ḵad ad Rome, iyyunuddae inggaw aḵ Paul si boḻoye maguwaḻdaan aḵ ossaane suḻdadu.

Sa Naḵaugudan Paul Atta Judyu Ad Rome

¹⁷ Naḻaḵpus ḵad tuḻun aḻgaw, impaayag Paul da papangat da Judyu we inggaw ad Rome. Nandatdatongda ḵad, ḵanana ḵan dida, “Susunudḵu we ganaḵ Israel, taḵon ay nu ippun ḵingwaḵ aḵ lawweng atta ḵailiyan taḵu baḵon nu nilisalisḵu'tta ugalin da danaḵḵoḻ taḵu yaḵon dinoḵmaanda saḵon ad Jerusalem woḵ impuḻangda saḵon atta iRome.

¹⁸ Sinumaḻyan ḵad da iRome saḵon, piondae mapuḵayanaḵ te inigammudae ippun ḵingwaḵ aḵ lawweng aḵ labbongnae matoyaḵ.

¹⁹ Yaḵon gapu ta sinuḵnaan da Judyu, napatute midatag ḵasusḵu si Emperor ad Rome. Adiyaḵpun andaḻum ḵan dida.

²⁰ Sana gapunae inayagaḵ diḵayu ta an-asiila taḵu ḵan an-uugud taḵu te pioḵ ipaigammu we sa gapun ni naḵawadaḵ sa pammatiḵe siya namnamaon taḵu we ganaḵ Israel.”

²¹ Pun ḵananda ḵan siya, “Ippun inawatni'ḵ suḻat aḵ naḻpu'tte probinsiya'd Judea si mipanggob ḵan siḵa. Taḵon ay os da susunude ganaḵ Israel we ummali sina, naippun os imbagada'ḵ ngaimane lawweng mipanggob ḵan siḵa.

²² Yaḵon pionni ye dongngon ḵasomsomḵam te igammuni ye da tagu'tta ḵinailin di ili an-ugudda'ḵ misullagi'tte nidog-am atta angunud ḵan Jesus.”

²³ Pun imbagada aḻgawe andaḵdaḵnganda. Dummatong ḵad sadi ye aḻgaw, aduadu da tagu we ummoy si inggawan Paul. Pun insaḻadna'tte bigbigat inggana'ḵ lummabi ye nangipaḵaawat ya nangipanoḵnoḵ si mipanggob atte ampangatan Apudyus. Impadasna inawis dida ta amatida ḵan Jesus atte nangiwaḻagawaganna'tte lintog Moses ya da inggilin da udume profetan Apudyus.

²⁴ Ḵad inninggaw da naawis atta inugudna yaḵon adimpun da udum pinati.

²⁵ Pun ummoyonda, nanggogwada ya nansosongbatda. Yaḵon sa daanda ayonan, iyyanungus Paul ḵanane, “Tuttuwa pagay impaigilin ni Ispiritu Santu ḵan Profeta Isaiah mipanggob atta danaḵḵoḻ taḵu we ḵanana,

²⁶ “ ‘Inḵa'tta tagu ya ibagam ḵanane: Andodongngoḻ ḵayu yaḵon adiyupun maawatan, itotollongyu yaḵon adiyupun imatunan.

²⁷ Te da sanae tagu, tummungitong da somsomoḵda. Antuḻtullongda'tte ḵatuttuwaan ya ḵimitonda da atada. Uni ḵad ya maḵwae maḵailada, maḵadongoḻda ya maḵaawatda. Ḵad nu ansinagungda ḵan saḵon ḵaanoḵ da saḵitda.’

²⁸ Pun pioḵe ipaigammu ḵan diḵayu we awad de imbuun Apudyus we umoy angibaga'tta Gentil si inon Apudyus we anagu'tta tagu ḵad andongoḻda.”

²⁹ Naabus ḵade imbagan Paul sadi, ḵesan da Judyu we nansosongbat.

³⁰ Duwan tawon inniinggawan Paul si boḻoye inabangana'd Rome ḵad minangilina da losane ummoy nangila ḵan siya.

³¹ Natuḻode nangiwaḻagawag ḵan nangituttudu mipanggob si ampangatan Apudyus ya aḵ Apu Jesu Kristu ḵad ippun nanupod ḵan siya.