Acts 25 - Sa Ugud Apudyus

Ḵindaw Paul We Midatag Atte Emperor Ad Rome

¹ Naḻaḵpus ḵad tuḻun aḻgaw si inggan ni dummaḵngan Gobernor Festus ad Caesarea, ummoy ad Jerusalem.

² Dummatong ḵad sidi, ummoy da papangat da papadi ya da papangat da Judyu ta idaḻumda'ḵ Paul ḵan siya.

³ Nandagdaguda ḵan Festus we ipaulida'ḵ Paul ad Jerusalem te sa planuda umoyda bangabangon si daḻan ta gongatonda.

⁴ Ḵanan Festus ḵan dida, “Naguwaḻdaan aḵ Paul ad Caesarea ḵad sin-aḵitan ya mipauliyaḵ sidi.

⁵ Pun ibagayu'tta udume pangatyu we anna ḵaḻabbonganda ta mitun-udda ḵan saḵon ta umoyda sidi idaḻum annae tagu nu awad ḵingwana'ḵ lawweng.”

⁶ Inninggaw aḵ Festus si adipun lummabos aḵ waḻu baḵon nu simpuḻu we aḻgaw ḵan dida'd Jerusalem, pun nipauli'd Caesarea. Mabigat ḵad, ummoy tummuḵdu'tte ḵuḵuwwisan woḵ impaidatongna'ḵ Paul.

⁷ Dummatong ḵad aḵ Paul, naaligummu da Judyu ḵan siyae naḻpu'd Jerusalem woḵ insaḻaddae nan-ibaga'tta adu we andagsone ipabasuḻda ḵan siyae adidapun mapanoḵnoḵan.

⁸ Pun ḵanan Paul we nanaḵdoḻ si long-agna, “Ippun nilisalisḵu'ḵ lintog taḵu we Judyu baḵon nu dinadailḵu templo taḵu baḵon nu naḵabasuḻaḵ atte Emperor ad Rome.”

⁹ Yaḵon gapu ta pion Festus we mas-om oḵyan da Judyu ḵan siya, ḵanana ḵan Paul, “Piom ḵad aine intaḵu'd Jerusalem ta sidi masumaḻyaam atta annae impabasuḻda ḵan siḵa?”

¹⁰ Yaḵon ḵanan Paul, “Adiḵpun pion te annaaḵe tataḵdog si sinagungnu we ḵasapuḻane sina masumaḻyaaḵ. Siḵae mismu dinutuḵan Emperor aḵ anguwis atta tagu si annae probinsiya. Ḵad iniiggammume naippun ḵingwaḵ aḵ lawweng atta Judyu.

¹¹ Ḵad nu awad ḵingwaḵ aḵ lawweng labbongnae matoyaḵ ḵad adiyaḵpun maḵailigsi si ḵatoy. Yaḵon nu ippun ḵatuttuwaan da sadi ye ipabasuḻda ḵan saḵon, ippun sillabbong angipuḻang ḵan saḵon ḵan dida. Pun idatagḵu ḵasusḵu'tte Emperor.”

¹² Pun aḵ Festus, iyyumanna'tta ḵuḵunsisaḻna. Nagangput ḵad, ḵanana ḵan Paul, “Gapu ta indatagnu ḵasusnu si Emperor, ibuunḵu siḵa ḵan siya.”

Aḵ Paul Si Sinagung Da Ari Agrippa Ḵan Bernice

¹³ Naḻaḵpus ḵad pigan aḻgaw, ummali da Ari Agrippa ḵan Bernice ad Caesarea ta pakumustaonda'ḵ Festus.

¹⁴ Inninggawda ḵad sidi si adu we aḻgaw, inug-uggud Festus ḵan Ari Agrippa mipanggob si ḵasus Paul. Ḵanana, “Awad de baḻud sinae tinenan Gobernor Felix.

¹⁵ Sa inninggawaḵ ad Jerusalem, imbagan da papangat da papadi ya da pallakayon da Judyu ḵan saḵon da mipanggob ḵan siya woḵ ḵindawdae ḵoddongaḵe magongat aḵ Paul.

¹⁶ Summongbataḵ ḵan dida woḵ ḵanaḵe daḵampun aḵ ugalini ye iRome ipuḻangni nidaḻume tagu nu daan masumaḻya. Ḵasapuḻane umuna sumangu'tta namabasuḻ ḵan siya ta awad inonae anaḵdoḻ atta ipabasuḻda ḵan siya.

¹⁷ Pun dummatongda ḵad sina, adiḵpun intaḻyan ḵasusna. Yaḵon mabigat ḵad ay, tummuḵduwaḵ si ḵuḵuwisan woḵ impaidatongḵu baḻud.

¹⁸ Tummaḵdog ḵad da namabasuḻ ḵan siya, ippun impabasuḻda ḵan siya'tta ngaimane basuḻe ninamnamaḵ.

¹⁹ Sa nansosongbatanda mipanggob ay lawa si pammatin da Judyu ya sa mipanggob si tagu we nangngadan aḵ Jesus we natoy yaḵon ḵanan Paul we ummuli.

²⁰ Gapu ḵad ta ippun igammuḵ nu ngai inoḵe anumaḻya si ḵaḵnae ḵasus, inimusḵu ḵan Paul nu pionae umoy ad Jerusalem ta sidi masumaḻyaana.

²¹ Yaḵon ḵindaw Paul we matenane isun di baḻud ta sa Emperor anguwis ḵan siya. Pun imbilinḵu we maguwaḻdaan sina inggana'ḵ maḵwae ibuunḵu ḵan Emperor Caesar.”

²² Pun ḵanan Agrippa ḵan Festus, “Pioḵ pagaye dongngone mismu si sanate tagu.” Ḵanan Festus, “Appigat, maḵwae dongngom.”

²³ Mabigat ḵad, ummoy da Ari Agrippa ḵan Bernice atte ḵuḵuwwisane inḵabotda da ampapatoge silupda. Naḵaoy os da kumander da suḻdadu ya da papangat si sadi ye siyudad. Nillumnoḵda ḵad losan, impaidatong Gobernor Festus aḵ Paul.

²⁴ Pun ḵanan Festus, “Ari Agrippa ya diḵayu losane anna sina! Sa annae tagu we itotollongyu, siya indaḻum da Judyu'd Jerusalem ya sina'd Caesarea ḵan saḵon woḵ ḵanandae simpopoḵawe ippun labbongnae matagu.

²⁵ Yaḵon ippun paat indasaḵ aḵ ḵingwana'ḵ labbongnae magongat. Pun gapu ta indatagnae mismu ḵasusna si Emperor ad Rome, simsimmoḵḵu we ibuunḵu sidi.

²⁶ Yaḵon ippun paat ustu'ḵ igammuḵ aḵ isuḻatḵu si Emperor atte mipanggob ḵan siya. Sadi gapunae impaidatongḵu'tte sinagungyu losan, amod ay siḵa Ari Agrippa ta awad isuḻatḵu nu gangputon taḵu sumaḻyaon.

²⁷ Te sa ḵasomsomḵaḵ, naippun daḻat ni ibuunḵu baḻud ḵan Emperor nu ippun ustu'ḵ mipabasuḻ ḵan siya.”