Acts 23 - Sa Ugud Apudyus

¹ Pune sadi, immumusḵoḻ Paul da ḵuḵunsisaḻ woḵ ḵanana, “Susunudḵu we ganaḵ Israel, iniiggammun Apudyus we ampoḻḵas somsomoḵḵu mipanggob si inoḵe nanserbi ḵan siyae nilapu si awe inggana sinsanae aḻgaw.”

² Inugudna ḵad ay sadi, imbilin Ananias we ḵangatuwane padi'tta tagu we adani ḵan Paul ta tippaponda sungadna.

³ Pun ḵanan Paul ḵan siya, “Siḵae sinan ḵuwis, asin Apudyus siḵa tippapon! Mipaniḵa si didinge mapintuḻan si itaḵ. Tumutuḵduḵa si sanate anumaḻya ḵan saḵone nibatay si lintog taḵu yaḵon nilisalisnu sanate lintog te impatippapnu saḵon.”

⁴ Da tagu we ataḵtaḵdog si adani ḵan Paul ḵananda, “Ngaipam pabainan ḵangatuwane padin Apudyus?”

⁵ Ḵanan Paul, “Susunudḵu we ganaḵ Israel, nu inigammuḵ oḵyane siya ḵangatuwane padi, adiḵpun oḵyan imbabbain. Te ḵanan ni nigili ye Ugud Apudyus, ‘Adim an-ugudan aḵ lawweng da papangat si iliyu.’ ”

⁶ Inigammun ḵad Paul we nanḵagwa da papangate Sadducee da udum ya da udum Phariseeda, indangsoḻna gingana'tta ḵuḵunsisaḻ woḵ ḵanana, “Susunudḵu we ganaḵ Israel, Phariseeyaḵ. Pharisee bos da danaḵḵoḻḵu. Pun namnamaoḵe umuli da natoy ḵad sana gapunae sumaḻyaonyu saḵon.”

⁷ Imbagana ḵad ay sadi, insaḻad da Pharisee ya da Sadducee we nansosongbat woḵ nanggogwa ḵasomsomḵanda.

⁸ Te da Sadducee ḵad, adidapun amati ye umuli da natoy ya adidapun os amati ye awad anghel baḵon nu ispiritu. Yaḵon da Pharisee, losan da pinati da sana.

⁹ Pun amod pagay omoḻda. Da udume Pharisee ye mimistulun ni lintog, summiḵadda ta ipatutda ḵasomsomḵanda. Ḵananda, “Ippun paat indasanni'ḵ lawweng ni annae tagu. Naḵaugud nin anghel baḵon nu ispiritu ḵan siya.”

¹⁰ Pun amo dummallu susubogda woḵ naḵimtan kumander te ḵananapun nu an-in-innatanda'ḵ Paul. Pun binilinna da suḻdadu we umoyda aḻan ta itallayda'tte ḵampuda.

¹¹ Sa sadi ye labi, nampaila'ḵ Apu Jesus ḵan Paul woḵ ḵanana, “Papigsaom somsomoḵnu te ḵasapuḻane taḵdoḻam mipanggob ḵan saḵon ad Rome we isun ni nanaḵdoḻam ḵan saḵon sina'd Jerusalem.”

Sa Nantutuḻagan Da Judyu We Gongatonda Aḵ Paul

^12-13 Mabigat ḵad, inggaw da naḵalimaane puḻu we Judyu we nantutuḻagdae gongatonda'ḵ Paul woḵ insapatadae adida angan ḵan uminum inggana'ḵ gongatonda'ḵ Paul.

¹⁴ Pun ummoyda'tta papangat da papadi ya da pallakayon da Judyu woḵ ḵananda, “Insapatani ye umadini angan inggana'ḵ gongatonni'ḵ Paul.

¹⁵ Pun diḵayu ya da ḵuḵunsisaḻ, angibuun ḵayu'ḵ umoy angibaga si kumander ta idatongda'ḵ Paul sina ta sumaḻyaondae ustu mipanggob atte ḵasusna. Ḵad inḵani bangabangon si daḻan ta gongatonni si daanna dumaḵngan sina.”

¹⁶ Yaḵon sa abeng ni sunud Paul we bubai, dingngoḻnae nantutuḻagan da Judyu we umoyda bangabangon, pun ummoy atte ḵampun da suḻdadu ta ibagana ḵan Paul sadi ye panggobda.

¹⁷ Pun inayagan Paul osae kapitan woḵ ḵanana ḵan siya, “Buḻunam ḵappos annae babaḻu we umoy atte kumander te awad de ibagana.”

¹⁸ Pun ummoy ni kapitan binuḻunan woḵ ḵanana si kumander, “Aḵ Paul we baḻud, inayagana saḵon woḵ ḵindawna ḵan saḵone buḻunaḵ annae babaḻu te awad de ibagana ḵan siḵa.”

¹⁹ Ḵiniwid ni kumander woḵ ummoyna intalin pun ḵananae nan-imus ḵan siya, “Ngai piom ibaga ḵan saḵon?”

²⁰ Ḵanan ni babaḻu, “Da papangat ḵad da Judyu nantutuḻagandae ḵodawonda ḵan siḵae appigat iyoynu'ḵ Paul atta ḵuḵunsisaḻ ta usigondae ustu mipanggob atte ḵasusna.

²¹ Yaḵon adim oḵyan tuttuwaon te awad da naḵalimaane puḻu we umoy amangabang ḵan siya si daḻan. Insapatadae umadida angan ḵan uminum inggana'ḵ gongatonda'ḵ Paul. Ḵad naḵasaganada ya uuwayonda nu iyunudnu ḵodawonda.”

²² Pun pinaoyon ni kumander babaḻu woḵ ḵanana, “Adim paat ugudon atta ngaimane tagu imbagam ḵan saḵon.”

Sa Nangiyoyanda Ḵan Paul Ḵan Gobernor Felix

²³ Pune sadi, inayagan ni kumander da duwae kapitan woḵ ḵanana, “Isaganayu da duwanggasute suḻdadu, duwanggasut ose nantubay ya pitumpuḻu we angabayu ta iyoyyu'ḵ Paul ad Caesarea. Allibbat ḵayu'ḵ ḵugḵugab.

²⁴ Angabayuwonyu'ḵ Paul ya ummanyu guwaḻdaan ta ippun lawweng aḵ maḵwa ḵan siya inggana'ḵ dumatong ḵayu ḵan Gobernor Felix.”

²⁵ Nanuḻat kumander woḵ ḵanana,

²⁶ “Apu Gobernor Felix, saḵon aḵ Claudius Lysias we annae nanuḻat ḵan siḵa. Kumusta.

²⁷ Sa annae tagu we impaiyoyḵu ḵan siḵa, dinoḵmaan da Judyu woḵ tigangayda gongaton. Yaḵon saḵon ya da suḻdadu, ummoyni illigsi te inigammuḵe Romano.

²⁸ Gapu ta pioḵ igammuwon nu ngai ipabasuḻda ḵan siya, inniyoyḵu'tta ḵuḵunsisaḻda.

²⁹ Pun sa inigammuḵ, ippun ḵingwana'ḵ gapun ni maḵoddongana'ḵ matoy baḵon nu mibaḻudana te siya impabasuḻda mipanggob si lintogda.

³⁰ Gapu ta inninggaw nangibaga ḵan saḵone nantutuḻagan da Judyu we gongatonda'ḵ Paul, daguse impaiyoyḵu ḵan siḵa. Imbilinḵu bos atta amabasuḻ ḵan siyae siḵa umoyda andaḻuman. Sana abus aḵ ibagaḵ.”

³¹ Lummabi ḵad, tinuttuwan da suḻdadu imbilin ni pangatda woḵ ummoyda intuḻud aḵ Paul ad Antipatris.

³² Mabigat ḵad, nampauli da nanaddaḻane suḻdadu si ḵampuda'd Jerusalem woḵ da nangabayu nangituḻud ḵan Paul.

³³ Dummatongda ḵad ay ad Caesarea, innatodda suḻat atte gobernor woḵ impuḻangda bos aḵ Paul ḵan siya.

³⁴ Binasan ḵad ni gobernor suḻat, inimusna ḵan Paul nu ngai probinsiyae naḻpuwana. Imbagan ḵad Paul we iCilicia,

³⁵ ḵanan ni gobernor, “Asiḵ siḵa sumaḻyaon nu umali da nangidaḻum ḵan siḵa.” Pun imbilinna'tta suḻdadunae maguwaḻdaan aḵ Paul si boḻoy Ari Herod.