Acts 22 - Sa Ugud Apudyus

¹ Ḵanana, “Diḵayu we aammaḵ ḵan susunudḵu we ganaḵ Israel, dongngonyu songbatḵu ḵan diḵayu.”

² Dingngoḻda ḵade Hinebrew ugudna, amo gummiginnoḵda. Pun ḵanana,

³ “Saḵon ḵad, Judyuwaḵ we niyanaḵ ad Tarsus we osae siyudad atte Cilicia yaḵon dummaḵoḻaḵ sina'd Jerusalem. Aḵ Gamaliel mistuluḵ, ummana intuttudu ḵan saḵon da losane lintog da danaḵḵoḻ taḵu. Impapatiḵ ose nanserbi ḵan Apudyus we isuyu sinsadi.

⁴ Amod nampapaḵaḻamḵu'tta nangunud atta intuttudun Jesus ya impagongatḵu da udum. Laḻaḵi ḵan da bubai, dinoḵmaaḵ ya impaibaḻudḵu dida.

⁵ Ḵad maḵwae panoḵnoḵan ni ḵangatuwane padi ya da losane ḵuḵunsisaḻ we pallakayon da Judyu we tuttuwa sadi te didae mismu nangidagas ḵan saḵon atte suḻat ta iyoyḵu'tta susunud taḵu we iyIsrael ad Damascus. Pun ummoyaḵ sidi ta andoḵmaaḵ atta namati ḵan Jesus ya pusasaḵ dida ya iyoyḵu dida'd Jerusalem ta madusada.

Sa Angibag-an Paul Si Amatiyana Ḵan Jesus

⁶ “Inninggawaḵ ḵad si daḻan atte mamatuḵ si madam-an ad Damascus, baag-en nanguliyatyat paddae naḻpu'd langite nalliḵwos ḵan saḵon.

⁷ Pun naliḵwadaḵ woḵ dingngoḻḵu gingae ḵanana, ‘Saul, Saul, ngaipam saḵon ampaḵaḻamon?’

⁸ “Pun ḵanaḵe nan-imus, ‘Ngaiḵa, Apu?’ “Ḵanana, ‘Saḵon aḵ Jesus we iNazareth we ampaḵapaḵaḻamom.’

⁹ Da buḻunḵu ḵad, taḵon ay nu innilada nanguliyatyate padda, adidapun dingngoḻ imbagan ni gumminga.

¹⁰ “Pun ḵanaḵ ose nan-imus, ‘Apu, ngai ḵooḵ?’ “Ḵanan Apu ḵan saḵon, ‘Lumibbatḵa ta inḵa'd Damascus te awad sidi angibaga'tta losane simsimmoḵḵu paḵwa ḵan siḵa.’

¹¹ Yaḵon adiyaḵpun maḵaila te sa ḵinapaddan ni sadi ye padda, ḵiniwid da buḻunḵu saḵon pun inniyoyaḵ ad Damascus.

¹² “Inninggaw sidi nangngadan aḵ Ananias we naapudyusane tuttuwaona lintog taḵu ya ambaḻu ḵaugudana'tta losane Judyu we ummili.

¹³ Ummali ḵan saḵon woḵ summiḵad si daḻnigḵu woḵ ḵanana, ‘Sunudḵu we Saul, maḵaan ḵuḻapnu!’ Pun daguse naḵaan ḵuḻapḵu woḵ innilaḵ aḵ Ananias.

¹⁴ Pun ḵanana, ‘Sa Apudyus da danaḵḵoḻ taḵu, pinilina siḵa ta igammuwom da piona ya ilam naun-unane Abengna we nanserbi ḵan siya ya dongngom gingana.

¹⁵ Te siḵa anaḵdoḻ ḵan siya'tta losane tagu mipanggob atta innilam ḵan dingngoḻnu.

¹⁶ Sinsadi, ngai bos uwayom? Lumibbatḵa ta inḵa pabonyag ḵad iluwaḻum ḵan Apudyus ta pakawanona da basuḻnu mipagapu'tte anḵodawam aḵ ḵadagu ḵan Apu.’

Sa Nibuunan Paul Aḵ Angiwaḻagawag Atta Gentil

¹⁷ “Nipauliyaḵ ḵad ad Jerusalem, ummoyaḵ nalluwaḻu'tte paway ni templo woḵ inninggaw impailan Apudyus ḵan saḵon atte in-inop.

¹⁸ Innilaḵ aḵ Apu we ḵananae nangibaga ḵan saḵon, ‘Ganasom! Tenam ad Jerusalem te da tagu sinat adidapun tuttuwaon ibagabagam mipanggob ḵan saḵon.’

¹⁹ “Pune sadi ḵanaḵ, ‘Apu, iniiggammudae saḵon ummoy atta sinagoga nandoḵma'tta namati ḵan siḵae imbaḻudḵu ḵan inap-aplitḵu dida.

²⁰ Sa nangongatanda ḵan Stephen we nanaḵdoḻ si mipanggob ḵan siḵa, tinataḵdogaḵe mismu we nanaḵdoḻ ya nanguwaḻda'tta silup da nangongat ḵan siya.’

²¹ “Pun ḵanana ḵan saḵon, ‘Inḵan ta ibuunḵu siḵa'tte adayu we igaw da Gentil.’ ”

²² Imbagan ḵad ay Paul sadi, da nandodongngoḻ ḵan siya insaḻadda ḵanane simbobogga, “Gongaton taḵu! Adi oḵyan matagu ḵaḵnate tagu.”

²³ Inniggaiggadae simbobogga ya iwasiwasiwasda da silupda ya inggabgab-uḻda gabu'd ngatu.

²⁴ Pun impaidatong ni kumander aḵ Paul atte ḵampu woḵ imbaganae ap-aplitonda ta ibabaggana nu ngai gapun ni simboboggaan da tagu ḵan siya.

²⁵ Yaḵon intaḵodda ḵad ta aplitonda oḵyan, ḵanan Paul si kapitane tataḵdog sidi, “Iyunud ḵamman ni lintoge aplitonyu Romano nu ippun indasanda'ḵ naḵabasuḻana?”

²⁶ Dingngoḻ ḵad ay ni kapitan imbagan Paul, ummoy si kumander woḵ ḵanana, “Ummam si ḵoom si sanate tagu te Romano.”

²⁷ Pun ummoy kumander ḵan Paul woḵ ḵananae nan-imus, “Ibagam ud ḵan saḵon nu Romanoḵa?” Ḵanan Paul, “On!”

²⁸ Ḵanan ni kumander, “Saḵon ḵad, daḵoḻ imbayadḵu si nambalinaḵ aḵ Romano.” Ḵanan Paul, “Yaḵon saḵon ḵad, niyanaḵaḵe Romano.”

²⁹ Pun daguse ummoyon da suḻdadu we anumaḻya ḵan angaplit oḵyan ḵan Paul te naḵimtanda. Naḵimtan os kumanderda te inigammunae impaḵawadna Romano.

Sa Nanumaḻyaan Da Ḵuḵunsisaḻ Ḵan Paul

³⁰ Mabigat ḵad, gapu ta pion ni kumander igammuwon ustu we ipabasuḻ da Judyu ḵan Paul, pinuḵayana woḵ binilinna da papangat da papadi ya da losane ḵuḵunsisaḻ ta ammimitingda. Pun inniyoyda'ḵ Paul si igaw da ammiting woḵ pinataḵdogna si sinagungda.