Acts 20 - Sa Ugud Apudyus

Sa Ummayan Paul Ad Macedonia Ya Ad Greece

¹ Nagangput ḵad sadi ye gulu, nandaḵdaḵngon Paul da namati ta soḻgagona dida. Unipun, nampaḵada woḵ ummoy ad Macedonia.

² Ummoyna ginaḵay da namati'tta ḵinailin di ili sidi ta soḻgagona dida woḵ ummoyon ad Achaia we ngannonda Greece.

³ Inninggaw aḵ tuḻun buḻan sidi. Yaḵon annapun oḵyane ambapur we umoy ad Syria, inigammunae nan-uunudan da Judyu we gongatonda. Pun simsimmoḵnae mipauli angoy ad Macedonia.

⁴ Binuḻunan da Sopater we abeng Pyrrhus we iBerea ya da Aristarchus ḵan Secundus we iThessalonica. Inggaw os aḵ Timothy, Gaius we iDerbe ya da Tychicus ḵan Trophimus we iyAsia.

⁵ Dummatong ḵani ḵad ad Philippi, ummun-una da buḻunni woḵ inuwayda diḵani'd Troas.

⁶ Naabus ḵad de Gayagayan da Judyu we ngannonda Tinapaye Naippun Yeastna, tinenanni'd Philippi woḵ nambapur ḵani ta unudonni dida. Naḻaḵpus ḵad liman aḻgaw, asiḵaniyot dummatong atta buḻunni'd Troas woḵ inninggaw ḵani'ḵ pitun aḻgaw sidi.

Sa Anungus Ni Namisitaan Paul Ad Troas

⁷ Sa mabigat ḵade nagangputan ni umillongane imbelangdae umunae aḻgaw ni sindumingguwan, nandatdatong ḵani ye namati'd Troas ta ḵanonni tinapaye angiḵagasmoḵanni si natoyan Jesus. Nantuttudu'ḵ Paul atta tagu inggana'ḵ gawallabi te ḵananapun nu umoyon si mabigat.

⁸ Inggaw da adu we silaw atte ngatu we kuwartun ni nadagupanni.

⁹ Inggaw os babaḻu we tummuḵdu si tawae Eutychus ngadanna. Gapu ta anduandu nan-ugudan Paul, nanduḵduḵmog pun naottage naḻpu'tte ḵumaḵlu we galadun ni boḻoy. Ummoyda ḵad winaway, naabuse natoy.

¹⁰ Yaḵon nan-osog aḵ Paul woḵ ummobaob pun ḵananae nangawoḻ, “Adi ḵayu ambinsaw te sissiyae matattagu!”

¹¹ Pun nipauli'ḵ Paul ad ngatu woḵ binisbisaḵna tinapay woḵ ḵanonni. Naabus ḵani ḵad, pinagatupanae naḵaug-uggud ḵan dida inggana'ḵ madam-an taḻun woḵ ummoyon ḵani.

¹² Binuḻunanda sadi ye babaḻu we naottage ummoyon woḵ sillalaylayadda te natagu.

Sa Ummayan Paul Ad Miletus

¹³ Pun ummuna ḵani nambapur we ummoy ad Assos we anagasanni ḵan Paul. Ḵaḵna imbagana ḵan diḵani te anaddaḻane umoy sidi.

¹⁴ Nan-aabot ḵani ḵad ad Assos, naḵalugan ḵan diḵani si bapur woḵ inḵani'd Mitylene.

¹⁵ Mabigatpun, nallibbat ḵani sidi woḵ dummatong ḵani'tte domangna'd Chios. Mabigatpun os dummatong ḵani'd Samos, ḵasin ose mabigat, niduum ḵani'd Miletus.

¹⁶ Simsimmoḵ Paul we umadini ansadang ad Ephesus ta adi ḵani mataḵtaḵ sidi'tte probinsiya'd Asia te maḵamu'ḵ Paul we dumatong ad Jerusalem te nu maḵwa oḵyan, pionae sambutan Gayagayan da Judyu we ngannonda Pentecost.

Sa Anungus Ni Palawag Paul Atta Angipangpangu Ad Ephesus

¹⁷ Pun sa inninggawanni'd Miletus, nambuun aḵ Paul aḵ umoy angayag atta angipangpangu'tta namati ye magimugimung ad Ephesus.

¹⁸ Dummatongda ḵad, ḵanana ḵan dida, “Iniiggammuyu nantataguḵ si inninggawaḵ ḵan diḵayu inggan ni damu we ummaliyaḵ si probinsiya'd Asia.

¹⁹ Nanserbiyaḵ ḵan Apu Jesus we napakumbaba. Ḵad naaḻuboy os luwaḵ si lawweng ni somsomoḵḵu gapu si namaḵapaḵaḻaman da dogaḵe Judyu ḵan saḵon te nan-uunudandae gongaton saḵon.

²⁰ Inigammuyu bose naippun adiḵ imbaga ḵan diḵayu'tta ngaimane bumaḻuwanyu si nangiwaḻagawagaḵ ḵan nantuttuduwaḵ ḵan diḵayu si sinagung da aduadu we tagu ya ummoyḵu bos binoḻoboḻoy.

²¹ Binagbagaaḵ os da dogaḵe Judyu ya da Gentil we ḵasapuḻane ibabawida da basuḻda ya agaydae angwa ta umadanida ḵan Apudyus ya amatida ḵan Jesu Kristu we Apu taḵu.

²² “Sinsadi, iyyaḵ ad Jerusalem te siya imbilin ni Ispiritu Santu ḵan saḵon ḵad ippun igammuḵ nu ngai maḵwa ḵan saḵon sidi.

²³ Sa abuse igammuḵ mibaḻudaḵ ḵan mapaḵaḻamaḵ te pinanoḵnoḵan ni Ispiritu Santu ḵan saḵon atta losane siyudade ayaḵ.

²⁴ Adipun ampatog ḵan saḵon nu mataguwaḵ baḵon nu matoyaḵ. Sa biyagḵu ampatog atte angigangputaḵ si ḵewaaḻe innatod Apu Jesus ḵan saḵone sa angiwaḻagawagaḵ si Ambaḻu we Damag mipanggob si ḵinabaḻun Apudyus.

²⁵ “Sinsadi andongoḻ ḵayu, igammuḵe diḵayu we nangiwaḻagawagaḵ mipanggob atte ampangatan Apudyus, aditaḵupun ogon an-asiila.

²⁶ Pun ibabaggaḵ ḵan diḵayu sinsadi ye aḻgaw, nu maag ay awad osa ḵan diḵayu'ḵ misina ḵan Apudyus ya madusa, daḵampun aḵ basuḻḵu.

²⁷ Te impaigammuḵ ḵan diḵayu da losane pinion Apudyus.

²⁸ “Pun ummanyu ayyuwanan da long-agyu ya da losane tagu we ipaayyuwan ni Ispiritu Santu ḵan diḵayu te sanat biyangyu we angipangpangu. Ayyuwananyu we ustu da magimugimunge namati ḵan Apudyus te sinubutna dida si daḻan ni mismu we abengna.

²⁹ Te igammuḵe sibot ḵad ni ayonaḵ, awad da umali ḵan diḵayu we sinan mistulu we isudan atape asu we umoy dumadail si pammatiyu ya da ayyuwananyu. Ḵad ippun gagada ḵan dida.

³⁰ Awad da udum ḵan diḵayu we mismu we asi umali ye ambalinonda ḵatuttuwaan aḵ tinutuli ta awisonda da namati ta mitun-udda ḵan dida.

³¹ Pun dadaḵḵagonyu ya sosomḵonyu we sa tuḻun tawone inninggawaḵ ḵan diḵayu, adiḵpun ingginoḵe nangiwaḻagawag ḵan diḵayu si inaḻgaw ḵan nilabi ye maaḻuboy luwaḵ si ayatḵu ḵan ḵadaguḵ ḵan diḵayu.

³² “Sinsadi itaḻgodḵu diḵayu ḵan Apudyus ya sa ḵinabaḻuna. Siya maḵabooḻe amapigsa'tta pammatiyu ya angitod si impaḻaḵsunna'tta losane intotoḵḵonnae taguna.

³³ Saḵon ḵad, ippun nanḵodawaḵ aḵ pilaḵ, buḻawan baḵon nu silup atta ngaiman ḵan diḵayu.

³⁴ Iniiggammuyu we nanḵewaaḻaḵ ta inginaḵ atta ḵasapuḻaḵ ya sa ḵasapuḻan da buḻunḵu.

³⁵ Sana pasigḵu ḵingwa ta awad unudonyu te ḵasapuḻane pumangog taḵu we anḵewaaḻ ta awad ibadang atta anḵasapuḻ, sosomḵonyu imbagan Apu Jesus we ḵanana, ‘Amo pian angitod nu sa an-awat.’ ”

³⁶ Imbagan ḵad ay Paul sadi, nanalluḵuda losan woḵ nalluwaḻu'ḵ Paul.

³⁷ Naabusda ḵad, sin-iibildae nangawoḻ ya nangogoḵ ḵan siya,

³⁸ ya ambabauyda si imbaganae adidapun ogon an-asiila. Pun ummoyda intuḻud inggana si igaw ni bapur.