Acts 2 - Sa Ugud Apudyus

Sa Ummayan Ni Ispiritu Santu Atta Namati

¹ Dummatong ḵad aḻgaw ni Gayagayan da Judyu we ngannonda Pentecost, nandatdatong da namati si osae boḻoy.

² Baag-en dingngoḻda bunguge naḻpu'd langite isun ni bungug ni ampigsapigsae bibbid woḵ nangalliwoḵ si boḻoye nandaḵdaḵnganda.

³ Pun innilada da isudan delae apuye nansimpa'tta sin-ossaossa ḵan dida.

⁴ Pune sadi, ummoy ḵabooḻan ni Ispiritu Santu ḵan dida woḵ insaḻaddae an-ugud atta nansabasabali ye ugude adidapun inadaḻe impaibagan ni Ispiritu ḵan dida.

⁵ Sa sadi ye timpu, inninggaw da ummili'd Jerusalem we Judyu we namati ḵan Apudyus we naḻpu'tta nansabasabali ye ili si lubung.

⁶ Dingngoḻda ḵad sadi ye bungug, aduadu da nadagupe sintataag te dingngoḻda da namati ḵan Jesus we nan-ugud si ḵuwadae ugud.

⁷ Sintataagda woḵ ḵananda, “Daḵampun ḵamman aḵ losanda naḻpu'tte probinsiya'd Galilee da annae nan-ugud?

⁸ Ngai inonae dongngon taḵu sin-ossaossa ḵan ditaḵu we an-ugud si ugudna?

⁹ Awad da udum ḵan ditaḵu we naḻpu'tta saḵubna'd Parthia, Media, Elam, Mesopotamia, Judea, Cappadocia, Pontus, Asia,

¹⁰ Phrygia, Pamphylia, Egypt ya da udume saḵubna'd Libya we dogana'd Cyrene. Ḵad da mangili ye naḻpu'd Rome,

¹¹ da Judyu ya da Gentil we amati ḵan Apudyus we isun da Judyu we amati ḵan siya. Ḵad da udume iCrete ḵan iyArabia. Ḵad annae dodongngon taḵu didae ibagabagada si ugud taḵu da nakaskasdaawe ḵingwan Apudyus.”

¹² Losanda nataag ḵan naalimuunan woḵ ḵanandae nan-asiimus, “Ngai nin ay pion ni sana ḵanan?”

¹³ Yaḵon inninggaw os da udume inam-amsewda da namati woḵ ḵananda, “Uhu! Nabartekda!”

Sa Iwwaḻagawag Peter

¹⁴ Pune sadi, summiḵad aḵ Peter ya da nasawaḻane apostol woḵ indangsoḻnae gumminga woḵ ḵanana, “Ḵailiyaḵe Judyu ya da losane ummili'd Jerusalem, andongoḻ ḵayu ta ipaḵaawatḵu pion ni sana ḵanan.

¹⁵ Sa ḵananyu we nabartekda, daḵampun te suminaḻ.

¹⁶ Yaḵon sana mituttuwaan ni imbagan Profeta Joel we an-uuggudon Apudyus si awe.

¹⁷ “ ‘Ḵanan Apudyus, “Sa anungus ni aḻgaw, ibuunḵu Ispirituḵ ta iinggaw atta tagu. Da aabengyu, ipadtuda da ibagaḵ ḵan dida. Da babaḻuyu, awad da mipaila ḵan didae isun di in-inop. Ḵad da anḵamaḻong-ag, an-in-inopda bos.

¹⁸ Taḵon ay da sammiluḵe laḻaḵi ḵan da bubai ibuunḵu bos Ispirituḵ ta umoy ḵan dida ḵad sa umali ye aḻgaw, ampadtuda si mipanggob ḵan saḵon.

¹⁹ Sa umali ye aḻgaw awad da ipailaḵe nakaskasdaaw ad langit ya da sinyal ad lutae daḻa ḵan apuy ya sa angal-alliwoḵe asuḵ.

²⁰ Sa umali ye aḻgaw gumiḵbot init ya sa soḻag ambalin aḵ daḻa, maḵwa da sana si daan ni ampatog ḵan madaydayawe mipauliyan Apu.

²¹ Ḵad da losane tagu we anḵodaw aḵ ḵadagu ḵan Apu, mataguda.” ’ ” Ḵanan Peter sana impadtun Profeta Joel.

²² Pinagatupan Peter woḵ ḵanana, “Susunude ganaḵ Israel, dongngonyu annae ibagaḵ ḵan diḵayu. Aḵ Jesus we iNazareth, pinanoḵnoḵan Apudyus ḵan diḵayu we imbuunna mipagapu'tta nakaskasdaaw ya da sinyale ḵingwan Apudyus ḵan diḵayu mipagapu ḵan siyae iniiggammuyu.

²³ Aḵ Jesus, gagangaye simsimmoḵ Apudyus we ipuḻangna ḵan diḵayu te siya inḵoddongna si awe. Ḵad diḵayu, impaipattoḻyu'tte kros ya impagongatyu'tta tagu.

²⁴ Yaḵon aḵ Apudyus, tinaguna ḵasin ya pinuḵayana'tte ḵatoy te naippun ḵabooḻan ni ḵatoy ḵan siya.

²⁵ Annaya nituttuwaan ni impadtun Ari David mipanggob ḵan Jesus we ḵanana, “ ‘Innilaḵe pasig anna'ḵ Apu si sinagungḵu te anna si madawinanḵu ta adiyaḵ maḵimut.

²⁶ Sana gapunae lumayad pusuḵ ya andaydayaw delaḵ. Ḵad taḵon ay nu matoy long-agḵu, namnamaoḵe matagu.

²⁷ Te adimpun iwaḻang ḵalidodwaḵ ad Hades we igaw da natoy. Ḵad adimpun os iyunud loposon long-ag ni mismu we sammilum.

²⁸ Impaigammum ḵan saḵon daḻane umoy si mataguwan ḵad paḻayadom saḵon si annaam.’ ” Sadi inggilin Ari David.

²⁹ Pun ḵanana, “Susunudḵu we ganaḵ Israel, antaḻgodaḵe angipaigammu ḵan diḵayu we aḵ Ari David we daḵdaḵoḻ taḵu natoy woḵ nilibon. Ḵad sa libonna awad ḵan ditaḵu inggana sinsanae aḻgaw.

³⁰ Gapu ta osae profetan Apudyus, inigammuna gattoḵe inkarin Apudyus ḵan siyae awad de osae ganaḵnae iggana si tronona.

³¹ Pun inigammuna ya imbagana ummuliyan Kristu we adinapun iwwaḻang ad Hades we igaw da natoy ya adipun maḻpos long-agna. Siya ibagabagana Kristu we ibuun Apudyus.

³² Sa annae Jesus tinagun Apudyus ḵasin ḵad losanni tinaḵdoḻan.

³³ Nipangatu'ḵ Jesus atte madawinan Apudyus woḵ innatod Amana ḵan siya ḵaḻabbongane angitod ḵan diḵani si Ispiritu Santu we inkarina ya imbuunna ḵan diḵani ta ilanyu ḵan dongngonyu da ḵingwan ni Ispiritu Santu.

^34-35 Te aḵ Ari David adipun nipangatu'd langit yaḵon siyae mismu nangibaga ḵanane, “ ‘Ḵanan Apu atte Apuḵ: Tumuḵduḵa'tte madawinanḵu, inggana'ḵ oḻgoḵ da ḵabusuḻnu.’ ”

³⁶ “Pun ipaigammuḵ ḵan diḵayu we losane ganaḵ Israel we aḵ Jesus we impattoḻyu'tte kros, pinilin Apudyus aḵ Apu ya Kristu.”

³⁷ Dingngoḻ ḵad da adu we tagu imbagan Peter, amod de babawida woḵ ḵananda ḵan Peter ya da udume apostol, “Susunude ganaḵ Israel, ngai ḵoonni?”

³⁸ Ḵanan Peter ḵan dida, “Ibabawiyu da basuḻyu ya agayyu we angwa ya awad osa ḵan diḵayu ampabonyag atte ngadan Jesu Kristu ta mapakawan da basuḻyu ya awatonyu atod ni Ispiritu Santu.

³⁹ Te sa annae kari para ḵan diḵayu ya da aabengyu ya da losane awad atta adayu we ili ya da losane pinilin Apudyus.”

⁴⁰ Adu we ugud imbagbagan Peter ḵan dida woḵ ḵananae nandagdagu, “Iligsiyu long-agyu si annae lunap!”

⁴¹ Pun da nangawat si ugudna, nampabonyagda. Umoye tuḻullibu belang da nidoga.

⁴² Impapatidae nan-adaḻ atta tuttudun da apostol ya nambubuḻunda, nanḵaḵaḵanda'tte tinapaye angiḵagasmoḵanda si natoyan Jesus ya nalluwaḻuda.

Sa Nantatagun Da Namati

⁴³ Nataag da adu we tagu te adu da nakaskasdaaw ya sinyale naḵwa mipagapu'tta apostol.

⁴⁴ Ḵad da losane namati, dam-oda andatdatong ya nan-aḵ-atodda.

⁴⁵ Ingnginada da lutada ya da ḵuḵuwada woḵ iwwaḻasda'tta udume namati sigun si ḵasapuḻan ni sin-ossaossa.

⁴⁶ Inaḻgawe andatdatongda ya an-os-ossaandae andayaw atte templo we boḻoy Apudyus. Ḵad sillalaylayaddae anḵaḵaḵan atte tinapay atta boḻoyda ya sipupusu layadda.

⁴⁷ Patilayune andaydayawda ḵan Apudyus, ḵad nas-om da tagu ḵan dida. Pun inaḻgawe dog-an Apudyus belang da matagu.