Acts 19 - Sa Ugud Apudyus

Sa Ummayan Paul Ad Ephesus

¹ Sa inninggawan ḵad Apollos ad Corinth, ummoy aḵ Paul ad Ephesus we naḻpu'd Phrygia we nangoy si beleg. Dummatong ḵad sidi, indasana da udume namati,

² woḵ ḵanana ḵan dida, “Inawatyu ḵad ain Ispiritu Santu si namatiyanyu?” Ḵananda, “Naid, ippun paat nangngoḻanni ye awad de Ispiritu Santu.”

³ Ḵanan Paul, “Nu ḵaḵnat, ngai ye kalasin di bonyag inawatyu nu?” Ḵananda, “Sa bonyage inawatni ḵan John.”

⁴ Ḵanan Paul, “Sa bonyage intuttudun John, siya ambabawiyan da tagu'tta basuḻda ya agaydae angwa. Imbaganae amatida'tte umun-unud ḵan siyae aḵ Jesus.”

⁵ Dingngoḻda ḵad ay sadi, nampabonyagda'tte ngadan Apu Jesus.

⁶ Impatay ḵad Paul da imana ḵan dida, ummoy Ispiritu Santu woḵ nan-ugudda'tta nansabasabali ye ugude adidapun inadaḻ ya impaigammuda Ugud Apudyus.

⁷ Batug di nasawaḻan aḵ duwa belang da sanae laḻaḵi.

⁸ Sa tuḻun buḻane inninggawan Paul sidi dam-on nantuttudu'tte sinagoga ḵad natuḻode nan-ugud ya naḵasossongbat atte mipanggob si ampangatan Apudyus ta awisona da tagu ta amatida.

⁹ Yaḵon inninggaw da udum ḵan didae tummungitong da somsomoḵda woḵ adidapun tummuttuwa gapu si adidapun namatiyan ya pinaḻawengdae nangugud si mipanggob atta angunud atta tuttudun Jesus atte sinagung da tagu. Pun tinenan Paul ya da namati dida woḵ ummoyda'tte uswilaan Tyrannus. Ḵad inaḻgawe nantuttudu'ḵ Paul sidi,

¹⁰ napagapagatupan sana si duwan tawon. Pun losan atta ummili'tte probinsiya'd Asia nandongoḻda si Ugud Apu, Judyu baḵon nu Gentil.

Da Abeng Sceva

¹¹ Ḵingwan Apudyus da amode nakaskasdaaw mipagapu ḵan Paul.

¹² Te taḵon ay da pangpangyu ḵan sinnune inusarna, nu iyoyda'tta masaḵit, maḵaan da saḵitda ḵad lumawa da aḻan atta naaḻanan.

¹³ Yaḵon inninggaw os da udume Judyu we ummoy atta adu we ili ya paḻyawonda da aḻan atta naaḻanan woḵ pinadasda usaron ngadan Apu Jesus. Ḵananda, “Siḵae aḻan, gapu si ḵabooḻan ni ngadan Jesus we iwaḻagawag Paul, ḵumunudḵa.”

¹⁴ Da pitu we abeng ni pangat da padin da Judyu we nangngadan aḵ Sceva da angwa si ḵaḵna.

¹⁵ Yaḵon ḵanan ni aḻane summongbat ḵan dida, “Aḵ Jesus igammuḵ, aḵ Paul igammuḵ yaḵon ngai ḵayu?”

¹⁶ Pun induḵḵus ni naaḻanan dida woḵ naḵapatoy inggana'ḵ illogna dida. Unipun ummawiddae naḻpu'tte boḻoye amboboddang ḵan nasugasugatda.

¹⁷ Inigammun ḵad da losane ummili'd Ephesus, Judyu baḵon nu Gentil da naḵwa, naḵimtanda woḵ indaydayawda ngadan Apu Jesus.

¹⁸ Pun adu bos atta namati da nangibabawi'tta ḵoḵoḵḵonda.

¹⁹ Inggaw da udum ḵan didae da ambubuyun, dida nanagup atta ibluda woḵ soggonda'tte sinagung da adu we tagu. Iniyapda ḵad gatad da iblu umoye limampuḻu we libu we palata.

²⁰ Pun nandindinamag Ugud Apu woḵ amo ummaduadu da namati.

Sa Gulu Ad Ephesus

²¹ Nagangput ḵad sanae naḵwa, simsimmoḵ Paul we angoy si probinsiya'd Macedonia ḵan Achaia ya asiyot umoy ad Jerusalem. Ḵanana, “Nu magangputaḵ umoy sidi, ḵasapuḻane iyyaḵ os ad Rome.”

²² Pinaunana da duwae bumadang ḵan siya'd Macedonia, da Timothy ḵan Erastus, pun inninggaw yan aḵ sin-aḵitan si probinsiya'd Asia.

²³ Sa sadi ye timpu, inggaw ampaḵimute gulu'd Ephesus mipanggob atta angunud atta tuttudun Jesus.

²⁴ Sa tagu we nangngadan aḵ Demetrius we ambobosaḻ, nangwa'tte palata'ḵ sinan templon Artemis we sa bubai ye apudyusda ya daḵoḻ os tangdan da sanae anḵeḵewwaaḻona.

²⁵ Nandaḵdaḵngon Demetrius da tinangdanana ya da doganae ambobosaḻ woḵ ḵanana, “Diḵayu we buḻunḵu, inigammuyu we sa annae ḵewaaḻ taḵu, siya bumaḵnangan taḵu.

²⁶ Ḵad innila taḵu ḵan didingngoḻ taḵu we adu da inawis Paul we tagu sina'd Ephesus ya tigangay ta losan da ili'tte probinsiya'd Asia. Ḵanana sa ḵoon di tagu, daḵampun aḵ tuttuwae apudyus.

²⁷ Nu lawweng damag ni ḵewaaḻ taḵu si umali ye aḻgaw, ippun ngumina. Sa osa bos, ippun patog ni templon Artemis we nangatu we apudyus taḵu. Ḵad adimpun da tagu bigbigon ḵinangatun Artemis we daydayawon da tagu sina'd Asia ya sa intero we lubung, madadail os ḵinaapudyusna.”

²⁸ Dingngoḻ ḵad da tagu imbagan Demetrius, summangada ḵan Paul ya da buḻunna woḵ insaḻadda ḵanane simbobogga, “Madaydayaw aḵ Artemis we apudyus taḵu we iyEphesus!”

²⁹ Pun losan da tagu'tte siyudad nagulu woḵ doḵmaanda da Gaius ḵan Aristarchus we iMacedonia we buḻun Paul we nambaat woḵ binutbutda dida inniyoy si bubuyyaan.

³⁰ Pion oḵyan Paul we umoy ḵan dida ta maḵaugud atta tagu yaḵon adimpun da namati iyyunud.

³¹ Inggaw da udume papangat si probinsiyae buḻbuḻun Paul, nambuunda'ḵ ummoy nangibaga ḵan siya ta adi oḵyan umoy ampappaila'tte bubuyyaan.

³² Unipun amo nagulu da tagu we nandatdatong si ummamdane omoḻe ippun puutna te awad ay osa nambogga ḵad da ḵaaduwan ippun igammuda nu ngai gapun ni nadagupanda.

³³ Gapu'tte sadi, imbuun da Judyu aḵ Alexander si sinagung da tagu ta ipaḵaawatna oḵyane daḵampun ḵan dida gapun ni gulu. Intayag Alexander imanae amaginoḵ atta tagu ta an-ugude taḵdoḻana,

³⁴ yaḵon immatunanda ḵade Judyu, nandidisanda losan ḵanane nanugtug-uy si umoye duwan orasan, “Madaydayaw aḵ Artemis we apudyus taḵu we iyEphesus.”

³⁵ Yaḵon pinaginoḵ ḵad ni secretaryn ni siyudad da amode tagu ḵanana, “Susunude iyEphesus, awad ḵamman ossaan ḵan ditaḵu'ḵ adi angigammu we ditaḵu angay-ayyuwan atte templon ni madaydayawe Artemis ya sa sinan-Artemis we batu we naottage naḻpu'd langit?

³⁶ Adipun maḵwae misilib anna! Pun ḵasapuḻane guminoḵ ḵayu ya adi ḵayu amabbabaḻang.

³⁷ Da tagu we indatongyu sina, ippun inaḵawda'tte templo taḵu ya ippun os inugudda'ḵ lawweng atte apudyus taḵu.

³⁸ Pun nu awad lilin da Demetrius ya da buḻunnae ambobosaḻ, annat da ḵuwis atta dadaḻḻuman ya annat os gobernor we siya ustu we umoyda andaḻuman.

³⁹ Yaḵon nu awad sabali'ḵ banag, uwayonyu ammimitingan taḵu ta asi taḵu an-uugudan.

⁴⁰ Te ḵaog-ogyat nu idaḻum ditaḵu si sanae gulu sinsadi, gapu ta ippun ustu'ḵ allasun taḵu.”

⁴¹ Naabus ḵade imbagana da sana, pinaoyonna da tagu.