Acts 18 - Sa Ugud Apudyus

Da Naḵwa Ḵan Paul Ad Corinth

¹ Nagangput ḵad, tinenan Paul ad Athens woḵ ummoy ad Corinth.

² Indasana sidi osan Judyu we iPontus we Aquila ngadanna ya aḵ Priscilla we asawana. Ḵaddatongdae naḻpu'd Italy te imbilin Emperor Claudius we tenan da losane Judyu'd Rome. Pun ummoy Paul innila dida,

³ ḵad gapu ta an-isu ḵewaaḻdae anḵoḵopya'ḵ tulda, inninggaw ḵan dida naḵaḵewaaḻ.

⁴ Sa umillongan da Judyu, ummoy aḵ Paul si sinagoga ya naḵasossongbat ta padasona awison da Judyu ḵan Gentil ta amatida ḵan Jesus.

⁵ Dummatong ḵad da Silas ḵan Timothy ye naḻpu'd Macedonia, impapatin Paul we nangiwaḻagawag si Ugud Apudyus ya pinanoḵnoḵana'tta Judyu we aḵ Jesus siya Kristu.

⁶ Yaḵon sinullagin ḵad da Judyu ḵan nan-uguugudanda'ḵ lawweng, iwwagwagna gabu si silupna ta angigammuwandae ḵigadda si madusaanda. Ḵanana, “Nu dusaon Apudyus diḵayu, sa long-agyu amuyuwanyu! Daḵampun aḵ basuḻḵu. Ḵad misaḻad sinsadi, iyyaḵ tuttuduwan da Gentil.”

⁷ Pun tinenan Paul dida sidi woḵ ummoy si boḻoy ni osae Gentil we Titius Justus ngadannae andaydayaw ḵan Apudyus. Sa boḻoyna awad si daḻnig ni sinagoga.

⁸ Inggaw aḵ Crispus we pangat atte sinagoga ya namatida losan da ḵabaḻyanna ḵan Apu Jesus. Adu bos da iCorinth we namati si dingngoḻda iwwaḻagawag Paul woḵ nampabonyagda.

⁹ Sillabiyan ḵad, naḵaugud aḵ Apu ḵan Paul atte in-inop woḵ ḵanana, “Adiḵa umogyat yaḵon pagapagatupame angiwaḻagawag atte ugudḵu ya adim iginoḵ,

¹⁰ te annaaḵ ḵan siḵa ya naippun aniwdiwat ḵan siḵa te adu da tagu'ḵ si annae siyudad.”

¹¹ Pun inninggaw aḵ Paul sidi'ḵ sintawon ya gogwae nangituttudu si Ugud Apudyus.

¹² Yaḵon nangobernor ḵad aḵ Gallio si probinsiya'd Achaia, nan-uunudan da Judyu we adipun namati ye iduḵḵusda doḵmaan aḵ Paul ya inniyoyda'tte dadaḻḻuman.

¹³ Ḵananda, “Sa annae tagu, inawisna da adu we tagu ta andaydayawda ḵan Apudyus we sumullagi si lintog.”

¹⁴ Yaḵon anna ḵade isaḻad Paul we an-ugud, ummuna nan-ugud aḵ Gallio, ḵanana'tta Judyu, “Nu awad basuḻna baḵon nu lawweng aḵ ḵingwana, anusaḵ dongngon diḵayu we Judyu.

¹⁵ Yaḵon gapu ta siya puun ni liliyu da mipanggob atta pion da ugud ḵanan ya da ngadan da tagu ya da lintoge unudonyu, ḵigadyu pagay! Adiḵpun pione saḵon anguwis atta sanate banag.”

¹⁶ Pun pinaḻyawna dida'tte dadaḻḻuman.

¹⁷ Pun dinoḵmaanda'ḵ Sosthenes we pangat ni sinagoga woḵ inap-aplitda si paway ni dadaḻḻuman yaḵon adimpun Gallio pulus biniyangan dida.

Sa Nipauliyan Paul Ad Antioch

¹⁸ Nabayag ḵad inninggawan Paul ad Corinth, nampaḵada'tta susunud ḵan Kristu woḵ nambapur we ummoy ad Syria we binuḻunan da Aquila ḵan Priscilla. Ad Cenchreae, nampapuluḵ aḵ Paul ta mituttuwa insapatana ḵan Apudyus.

¹⁹ Dummatongda ḵad ad Ephesus, lummogsadda'tte bapur sidi woḵ tinenana da Aquila ḵan Priscilla. Yaḵon ummunae mismu ummoy atte sinagoga ya naḵasossongbat atta Judyu.

²⁰ Pinadasda ḵad tawidan ta inggaw ḵan dida, sinuḵnaana.

²¹ Yaḵon anna ḵade umoyon ḵanana, “Mipauliyaḵ ḵan diḵayu nu pinion Apudyus.” Pun nambapur we ḵesan ad Ephesus.

²² Nandissaag ḵad ad Caesarea, nanagada'd Jerusalem woḵ pinakumustana da namati ye magimugimung. Naabus ḵad, nan-osog ad Antioch.

²³ Inninggaw ḵad sidi si pigan aḻgaw, ummoy nanggaḵay atta losane ḵinailin di ili'tte probinsiya'd Galatia ya sa probinsiya'd Phrygia ta umoyna papigsaon pammatin da namati.

Sa Nantuttuduwan Apollos Ad Ephesus Ya Ad Corinth

²⁴ Inninggaw Judyu we iyAlexandria we ummoy ad Ephesus we Apollos ngadanna. Allainge antuttudu ya adu bos inigammuna si mipanggob atte nigili ye Ugud Apudyus.

²⁵ Natuttuduwan atte mipanggob ḵan Apu ya ampangog ḵan ustuustu ituttuduna'tte mipanggob ḵan Jesus yaḵon abus aḵ inigammuna nambonyagan John.

²⁶ Insaḻadnae nangituḻode nampalapalawag atte sinagoga. Yaḵon dingngoḻ ḵad da Priscilla ḵan Aquila, inayaganda'tte boḻoyda woḵ impaḵaawatdae ustu ḵan siya da adinapun inigammu'tte mipanggob ḵan Jesus ya sa inon Apudyus we anagu'tta tagu.

²⁷ Pion ḵad Apollos we dumoḻmang si baybaye umoy atte probinsiya'd Achaia, sinoḻgag da susunud ḵan Kristu ad Ephesus woḵ nanuḻatda'tta susunud ḵan Kristu ad Achaia ta mangiliyonda. Dummatong ḵad, adu da binadanganae namati mipagapu'tte ḵinabaḻun Apudyus.

²⁸ Te allainge naḵasossongbat atta Judyu woḵ illogna dida te pinanoḵnoḵana si Ugud Apudyus we aḵ Jesus siya Kristu.