Acts 17 - Sa Ugud Apudyus

Sa Gulu Ad Thessalonica

¹ Nangoy ḵad da Paul ḵan Silas ad Amphipolis ya ad Apollonia, dummatongda'd Thessalonica we inggaw osae sinagogan da Judyu.

² Sa ugalin Paul dam-on umoy si sinagoga. Sa tuḻun aḻgawe umillongan da Judyu naḵasossongbat atta tagu sidi mipanggob atte Ugud Apudyus.

³ Impaḵaawat Paul ḵan pinanoḵnoḵanae ḵasapuḻane ampaḵaḻam aḵ Kristu ya matoy ḵad umuli. Pun ḵanana, “Sa annae Jesus we iwaḻagawagḵu ḵan diḵayu, siya Kristu.”

⁴ Naawis da udume Judyu, pun nidogada ḵan da Paul ḵan Silas. Nidoga bos da adu we Gentil we nandaydayaw ḵan Apudyus ya da mabigbige bubai.

⁵ Yaḵon maapos da Judyu we adipun namati woḵ dinagupda da gugulu'tte lugar we andaḵdaḵngan da adu we tagu ta angguluda inggana'ḵ nagulu da losane umili. Pun ummoyda linnoḵ boḻoy da Jason te singsingtonda da Paul ḵan Silas ta ilawada dida iyoy atte nadagupan da adu we tagu.

⁶ Yaḵon adidapun ḵad naḵaodas ḵan da Paul ḵan Silas, binutbutda'ḵ Jason ya da udume susunud ḵan Kristu woḵ inniyoyda dida'tta papangat atte siyudad woḵ ḵanandae simpopoḵaw, “Da annae tagu guguluda'tta losane ili, annae ummalida bos sina.

⁷ Aḵ Jason ḵad, minangilina dida. Da losane nibuḻun ḵan Paul, sinullagida lintog ni Emperor ad Rome te ḵanandae awad de osae ari ye Jesus ngadanna.”

⁸ Dingngoḻ ḵad da tagu ya da papangat si siyudad impabasuḻda, nambinsawda.

⁹ Nampapiyansaon da opisyal da Jason ya da udume namati woḵ pinaoyonda dida.

Sa Ummayan Da Paul Ḵan Silas Ad Berea

¹⁰ Lummabi ḵad, daguse pinaoyon da susunud ḵan Kristu da Paul ḵan Silas ad Berea. Dummatongda ḵad sidi, ummoyda si sinagogan da Judyu.

¹¹ Da annae Judyu amo nabaḻbaḻu ugalida nu da iThessalonica te sisinnoogonda Ugud Apudyus ḵad inaḻgawe adaadaḻonda ta panoḵnoḵanda nu tuttuwa da intuttudun Paul.

¹² Pun namati da adu ḵan didae midoga da adu we Greek we laḻaḵi ya da mabigbige bubai.

¹³ Yaḵon inigammun ḵad da Judyu'd Thessalonica we iwwaḻagawag Paul Ugud Apudyus ad Berea, ummoyda sidi woḵ subsubonda da tagu ta angguluda.

¹⁴ Pun daguse imbuun da susunud ḵan Kristu aḵ Paul si taḻantag ni baybay yaḵon natenan da Silas ḵan Timothy sidi.

¹⁵ Da laḻaḵi ye nangituḻud ḵan Paul nampatinggada'd Athens. Pun binilin Paul we mipaulida'd Berea ya ibagada ḵan da Silas ḵan Timothy ta ḵamaḵamanda umoy ḵan siya.

Sa Inninggawan Paul Ad Athens

¹⁶ Sa sadi ye anguuwayan Paul ḵan da Silas ḵan Timothy ad Athens, lummaweng somsomoḵna'tte innilana da aduadu we sinan-apudyus atte sadi ye siyudad.

¹⁷ Pun ummoy atte sinagoga naḵasossongbat atta Judyu ya da Gentil we nanaydayaw ḵan Apudyus. Inaḻgaw ose ummoy atta lugar we andaḵdaḵngan da adu we tagu ya naḵasossongbat atta tagu we inggaw sidi.

¹⁸ Inninggaw os da udume mimistulun da Epicurean ya da Stoic we naḵasossongbat ḵan siya. Ḵanan da udum, “Ngai ibagabagan ni annate aginlalaing?” Ḵanan os da udum, “Siya nin iwaḻagawagna sabali ye apudyus.” Imbagada ḵaḵna te iwwaḻagawag Paul mipanggob ḵan Jesus ya sa ummuliyana.

¹⁹ Pune sadi, innaḻada'ḵ Paul woḵ inniyoyda si andaḵdaḵngan da ḵuḵunsisaḻ ni ili ye ngannonda Areopagus woḵ ḵananda, “Igammuwonni ud annae baru we tuttudu we iwaḻagawagnu,

²⁰ te da udume imbagabagam, naippun dingngoḻni'ḵ ḵatti ya pionni igammuwon nu ngai pionda ḵanan.”

²¹ Sadi imbagada te da losane iyAthens ya da ḵaḵḵaili ye inggaw sidi, sa abuse ḵoonda, ibagada baḵon nu andodongngoḻda'tta baru we tuttudu.

²² Pun summiḵad aḵ Paul atte sinagung da papangat atte Areopagus woḵ ḵanana, “Diḵayu we iyAthens, igammuḵe ipapatiyu we andayaw atta apudyusyu,

²³ te nanggaḵayaḵ ḵad atte siyudad, innilaḵ da lugar we andaydayawanyu'tta adu we sinan-apudyus. Indasaḵ os altar we nagiliyan atte ḵaḵnae ugude ḵanana, ‘Para si apudyus we ippun angigammu.’ Sa sanate daydayawonyu we taḵon ay ippun igammuyu, siya sanae ipaigammuḵ ḵan diḵayu.

²⁴ Siya Apudyus we nangwa'tte lubung ya da losane awad sina. Ḵad adipun inggaw atte templo we ḵingwan di tagu te siya Apu'd langit ya ad luta.

²⁵ Adinapun ḵasapuḻan badang da tagu te siyae mismu nangitod atte biyag, angos ya da losan.

²⁶ Aḵ Apudyus nangwa si ummunae tagu we sa naḻpuwan da losane kalasin di tagu'tte ḵinailin di ili si luta ya ḵingwana dida'ḵ inggaw si intero we luta. Inḵoddongna bos timpu ya da boddong da lugar we igawda.

²⁷ Ḵingwana sadi ta sington da tagu'ḵ Apudyus ḵad namnamaondae odasanda si ang-angngitanda. Sa ḵatuttuwaan, daḵampun aḵ adayu si sin-ossaossa ḵan ditaḵu.

²⁸ Te inninggaw osae ḵanana, “ ‘Siya angitod atte biyag taḵu ya siya angayyuwan ḵan ditaḵu si anggiduwan taḵu ḵan mataguwan taḵu.’ Ḵanan os da udume naḻpu'tte annae nasyone nalainge an-ullalim, ‘Tuttuwae abengna bos ditaḵu.’

²⁹ Ḵad gapu ta abeng Apudyus ditaḵu, ḵasapuḻane adi taḵu somsomḵone aḵ Apudyus miyisu'tta sinan-apudyuse naḵwa si buḻawan, palata, baḵon nu batu we simsimmoḵ da nalainge tagu we ḵoon.

³⁰ Sa awe, inan-anusan Apudyus da ḵingwan da tagu te daandapun igammuwon. Yaḵon sinsadi, imbilinnae losane tagu ibabawida da basuḻda ya agaydae angwa.

³¹ Te inḵoddongna aḻgawe anguwisana'tta losane tagu si lubung. Dinutuḵana'ḵ Jesus we naun-unane anḵuwis woḵ pinanoḵnoḵanae siya dinutuḵana si nanaguwana ḵan siya.”

³² Dingngoḻda ḵad imbagan Paul mipanggob atte umuliyan da natoy, inang-angyag da udum yaḵon da udum ḵananda, “Pionni ye dongngon ḵasin mipanggob si sana.”

³³ Pun tinenan Paul dida.

³⁴ Yaḵon da udum ḵan dida nidogada ḵan siya woḵ namatida ḵan Jesus. Osa ḵan dida'ḵ Dionysius we osa'tta pangat si Areopagus ya aḵ Damaris we bubai ya da udum.