Acts 16 - Sa Ugud Apudyus

Sa Nidog-an Timothy Ḵan Da Paul Ḵan Silas

¹ Ummoy os da Paul ḵan Silas ad Derbe ya ad Lystra. Sidi inninggawan Timothy ye osae namati. Namati bos inanae Judyu yaḵon Gentil amana.

² Ambaḻu ḵaugudan Timothy atta susunud ḵan Kristu ad Lystra ya ad Iconium.

³ Pion Paul we mibuḻun aḵ Timothy ḵan dida woḵ impasogyatna te igammun da losane Judyu we inggaw sidi ye Gentil amana.

⁴ Nanggaḵayda ḵad atta ḵinailin di ili, impaigammuda nan-uunudan da apostol ya da angipangpangu'tta namati'd Jerusalem ta tuttuwaon da tagu.

⁵ Pun pummigsa pammatin da namati atta gimung ḵad inaḻgawe madog-adog-anda.

Sa In-inop Paul Ad Troas

⁶ Pun ummoy da Paul atte probinsiya'd Phrygia ya sa probinsiya'd Galatia te adimpun ni Ispiritu Santu iyyunud didae umoy angiwaḻagawag atte Ugud Apudyus si probinsiya'd Asia.

⁷ Dummatongda ḵad atte boddong ni probinsiya'd Mysia, umoyda oḵyan atte probinsiya'd Bithynia yaḵon adimpun ni Ispiritu Santu we imbuun Jesus ḵan dida iyyunud.

⁸ Pun nangoyda'd Mysia woḵ nan-osogda'd Troas.

⁹ Sa sadi ye labi, inggaw impailan Apudyus ḵan Paul si in-inop. Innilana laḻaḵi ye iMacedonia we tataḵdoge nandagdagu ḵan siya woḵ ḵanana, “Umaliḵa ḵappos sina'd Macedonia ta badangam diḵani.”

¹⁰ Nagangput ḵad sadi ye innilan Paul si in-inop, daguse nallibbat ḵani ye umoy ad Macedonia te inigammuni ye pinilin Apudyus diḵani ta iwaḻagawagni Ambaḻu we Damag ḵan dida.

Sa Namatiyan Lydia

¹¹ Pun nambapur ḵani ye naḻpu'd Troas woḵ nangaw-as ḵani'd Samothrace we ili si gawan ni baybay. Mabigat ḵad, ummoy ḵani'd Neapolis.

¹² Lummogsad ḵani ḵad atte bapur, nanadtaddaḻan ḵani ye ummoy ad Philippi we osan siyudad atte saḵubna'd Macedonia. Sidi ummiliyan da aduadu we iRome. Pun inninggaw ḵani sidi si pigan aḻgaw.

¹³ Sa aḻgaw ḵade umillongan da Judyu, ummoy ḵani si lasin ni siyudad atte taḻantag ni tawwang te ḵanannipun nu siya dam-on da Judyu alluwaḻuwan. Tummuḵdu ḵani woḵ naḵaug-uggud ḵani'tta bubai ye nadagup sidi.

¹⁴ Osa'tta nandongoḻ ḵan diḵani'ḵ Lydia we iThyatira we allaḵlaḵu'tta nanginginae sinnun ya andaydayaw ḵan Apudyus. Nandodongngoḻ ḵad, sinilawan Apu somsomoḵna woḵ namati.

¹⁵ Pun nampabonyag aḵ Lydia ya da ḵabaḻyanna. Pun inayagana diḵani woḵ ḵanana, “Nu ibelangyu saḵone tuttuwae namati ḵan Apu, umali ḵayu'ḵ ḵuwani.” Pun impatutna intallay diḵani si boḻoyda.

Sa Nibaḻudan Da Paul ḵan Silas Ad Philippi

¹⁶ Sin-aḻgawan ḵad atte ayanni si luluwaḻuwan, inabotni babaḻasange musassu we allainge ampadtu te ambubuyun. Gapu'tte laingnae ampadtu, adu pilaḵe maaḻan da apuna.

¹⁷ Nitun-ud babaḻasang ḵan diḵani ḵan Paul woḵ ḵananae nangiyipḵaw, “Da annae tagu sammilun ni Ḵangatuwane Apudyus! Iwaḻagawagda ḵan diḵayu daḻan ni mataguwan!”

¹⁸ Adu aḻgawe nangwaana'tta ḵaḵna inggana'ḵ nappog aḵ Paul. Nantawili si babaḻasang woḵ ḵanana si aḻan, “Gapu'tte ḵabooḻan Jesu Kristu, ibagaḵ ḵan siḵa lumawaḵa ḵan siya!” Pun daguse lummawa aḻan.

¹⁹ Innilan ḵad da apunae naippun ogon namnamaonda angaḻ-an aḵ pilaḵda, dinoḵmaanda da Paul ḵan Silas woḵ binutbutda dida'tte lugar we andaḵdaḵngan da adu we tagu atte sinagung da papangat ni ili.

²⁰ Inniyoyda ḵad dida si igaw da opisyal da iRome, ḵananda, “Da annae Judyu, dida gugulu si siyudad taḵu,

²¹ te sa ugali ye ituttududa sumullagi si lintog taḵu ḵad adipun maḵwae unudon taḵu we iRome.”

²² Nidoga bos da adu we tagu simboboggae nanuḵḵus ḵan dida. Pune sadi, da opisyal ad Rome pinonasanda dida woḵ impaap-aplitda dida.

²³ Ginangputda ḵad dida inap-aplit, impaibaḻudda dida woḵ binilinda guwaḻda ta guwaḻdaana didae ustu.

²⁴ Pun inniyoyna dida si uḵuḵ ni babaḻḻudan woḵ ḵanselanda da suḵida'tte andagsone ḵayu.

²⁵ Anna ḵade gumawallabi, nalluluwaḻu ḵan nanḵanḵanta da Paul ḵan Silas we andaydayaw ḵan Apudyus. Pun nandodongngoḻ da buḻundae baḻud ḵan dida.

²⁶ Pune sadi baag-en inninggaw ampaḵimute lunig woḵ nayyugayug nisaadan ni babaḻḻudan pun daguse naamin nabuḵtan da onob woḵ nauḵayag lawa da ḵawad da losane baḻud.

²⁷ Bummangon ḵad de guwaḻda, innilanae nabuḵtan da onob, inuḵputna ispadana ta gongatona oḵyan long-agna te sa somsomoḵna ummawid da losane baḻud.

²⁸ Yaḵon nambogga'ḵ Paul woḵ ḵanana, “Adim gongaton long-agnu te wadawad ḵani!”

²⁹ Pun nampaidatong guwaḻda'ḵ silaw. Indatongda ḵad ay, daguse nillumnoḵ si igaw da Paul ḵan Silas woḵ nanalluḵu we amilpilpil si ḵimutna'tte sinagungda.

³⁰ Pun illawana dida woḵ ḵanana, “Apu, ngai ḵasapuḻane ḵooḵ ta mataguwaḵ?”

³¹ Ḵananda, “Amatiḵa ḵan Apu Jesus woḵ mataguḵa ya da ḵabaḻyannu.”

³² Pun iwwaḻagawagda Ugud Apudyus atta losane ḵabaḻyanna.

³³ Sa sadi ye gawallabi, impuyut ni guwaḻda dida si igaw ni danum ta baḻbaḻana da sugatda. Nagangput ḵad, daguse nampabonyag ya da losane ḵabaḻyanna.

³⁴ Intallayna da Paul ḵan Silas aḵ ḵuwada woḵ pinaḵanana dida. Pun amod de layad da simbaḻyan gapu'tte namatiyanda ḵan Apudyus.

³⁵ Mabigat ḵad, imbuun da opisyal ad Rome da pulis aḵ umoy angibaga'tte guwaḻda ḵanane, “Paoyononyu da sanate tagu.”

³⁶ Pun ḵanan ni guwaḻda ḵan Paul, “Imbagan da opisyal ad Rome we paoyononni diḵayu ḵan Silas. Inḵayun lumin-awa da somsomoḵyu.”

³⁷ Yaḵon ḵanan Paul atta pulis, “Impaap-aplit diḵani si sinagung da tagu we ippun indasanda'ḵ naḵabasuḻanni. Ḵad imbaḻudda diḵani ye gagangaye Romano. Sinsadi itaḻutaḻuyu ḵad aine amaḻyaw ḵan diḵani? Adipun maḵwa ḵatti! Da opisyal ad Rome da umali sina ta didae mismu angilawa ḵan diḵani.”

³⁸ Pun ummoy da pulis imbaga'tta opisyal ad Rome woḵ naḵimtanda si dingngoḻdae Romano da Paul ḵan Silas.

³⁹ Pun ummoyda si babaḻḻudan woḵ nampakawanda ḵan dida. Pun illawada dida woḵ ḵindawdae tenanda sadi ye siyudad.

⁴⁰ Lummawa ḵad da Paul ḵan Silas si babaḻḻudan, ummoyda si boḻoy da Lydia. Pun innilada ḵad da susunud ḵan Kristu we nadagup sidi, sinoḻgagda dida woḵ ummoyonda.