Acts 15 - Sa Ugud Apudyus

Sa Nadagupanda Ad Jerusalem

¹ Pun inninggaw da laḻaḵi ye dummatong ad Antioch we naḻpu'tte probinsiya'd Judea we ummoy nantuttudu'tta susunud ḵan Kristu. Ḵananda, “Adiḵayupun matagu nu adi ḵayu pasogyat sigun si intuttudun Moses.”

² Yaḵon da Paul ḵan Barnabas, amo naḵasossongbatda ḵan dida. Pun siya dinutuḵanda da Paul ḵan Barnabas ya da udume namati'ḵ umoy ad Jerusalem maḵaugud atta apostol ya da angipangpangu'tta namati atte mipanggob si sadi ye tuttudu.

³ Pun pinaḻung-ud da namati ye magimugimung dida woḵ sa nangoyanda'tta probinsiya'd Phoenicia ya ad Samaria, imbagada'tta namati ye magimugimung sidi inon da Gentil we namati ḵan Jesus. Pun amod de layad da losane susunud ḵan Kristu sidi.

⁴ Dummatongda ḵad ad Jerusalem, minangilin da namati ye magimugimung dida, da apostol ya da angipangpangu. Pun imbagan da Paul da losane ḵingwan Apudyus ḵan dida.

⁵ Yaḵon inninggaw da udume namati ye naḻpu'tte grupun da Pharisee ye summiḵadda woḵ ḵananda, “Ḵasapuḻane pasogyat da Gentil ya ibilin taḵu we tuttuwaonda da lintog Moses.”

⁶ Pune sadi, nammimiting da apostol ya da angipangpangu'tta namati ta an-uugudanda sanae banag.

⁷ Nagangput ḵade nabayag nansosongbatanda, summiḵad aḵ Peter woḵ ḵanana, “Susunud ḵan Kristu, inigammuyu we sa awe, saḵon pinilin Apudyus ḵan ditaḵu'ḵ umoy angiwaḻagawag si Ambaḻu we Damag atta Gentil ta dongngonda ya amatida.

⁸ Aḵ Apudyus we angigammu si awad atte somsomoḵ da tagu, impailanae inawatna da Gentil we namati si nangattana'tte Ispiritu Santu ḵan didae isun ni nangattana ḵan ditaḵu.

⁹ Ippun laḵsigon Apudyus ḵan ditaḵu ya dida te pinapoḻḵasna somsomoḵda mipagapu'tte pammatida.

¹⁰ Sinsadi, ngaipayu padason aḵ Apudyus atte angibag-anyu we ḵasapuḻane tuttuwaonda da losane ugali taḵu? Te taḵon ay da danaḵḵoḻ taḵu ya ditaḵu sinsana, aditaḵupun lamog tuttuwaon dida.

¹¹ Yaḵon amati taḵu we matagu taḵu mipagapu'tte ḵinabaḻun Apu Jesus we isuna bos ḵan dida.”

¹² Pun gummiginnoḵ da losane naamung woḵ nandodongngoḻda'tta imbagan da Barnabas ḵan Paul mipanggob atta sinyal ḵan nakaskasdaawe ḵingwan Apudyus atta Gentil mipagapu ḵan dida.

¹³ Naabusda ḵad nan-uugud, nan-ugud aḵ James woḵ ḵanana, “Susunud ḵan Kristu, dongngonyu saḵon.

¹⁴ Inugud Simon Peter ḵan ditaḵu inon Apudyus si damu we nangipaila si ḵadaguna'tta Gentil te pinilina da udum ḵan dida'ḵ ambalin aḵ taguna.

¹⁵ Ḵad sa sadi ye ḵingwan Apudyus, miyunud si inggilin da profetanae ḵanana,

¹⁶ “ ‘Nu maabus da anna, mipauliyaḵ ḵad taḵadoḵ ḵasin nadadaile ampangatan Ari David, ta mipaḻ-og ya amo maḻaḻaman.

¹⁷ Ta sington da udume tagu saḵone Apu ya da Gentil we inayagaḵ aḵ ambalin taguḵ.

¹⁸ Sana imbagan Apu we impaigammuna si awe.’ ”

¹⁹ Pinagatupan James woḵ ḵanana, “Sa ḵasomsomḵaḵ, adi taḵu oḵyan ampaḵaḻamon da Gentil we ansagung ḵan Apudyus.

²⁰ Yaḵon anuḻat taḵu ḵan dida ta adida ḵanon da maḵane midatun atta sinan-apudyus te paniyaw, adida maḵadagdagas ya ḵasapuḻane adida ḵanon daḻa ya da ayame adipun nidaḻaan.

²¹ Te igammun da tagu si losane ili mipanggob si lintog Moses nisaḻad si awe te nibasabasa si umillongan da Judyu atta sinagoga taḵu ya niwaḻagawag da ugudna'tta ḵinailin di ili.”

Sa Suḻat Atta Gentil We Namati

²² Pune sadi, nan-uunudan da apostol, da angipangpangu ya da losane namati ye pumilida ḵan dida'ḵ maḵaoy ḵan da Paul ḵan Barnabas ad Antioch. Pun pinilida da duwae angipangpangu'tta susunud ḵan Kristu, aḵ Judas we nangngadan aḵ Barsabbas ya aḵ Silas.

²³ Annaya suḻate indagasda, “Pakumustae naḻpu ḵan diḵani ye apostol ya da angipangpangu'tta namati ya da susunud ḵan Kristu sina'd Jerusalem. Annaya suḻatni ḵan diḵayu we Gentil we susunud ḵan Kristu sinat ad Antioch, Syria ya ad Cilicia.

²⁴ Dingngoḻni ye annat da udume grupuni ye ummoy sinat nantuttudu ḵan diḵayu ḵad da intuttududa nasaliduduwan da somsomoḵyu. Yaḵon ippun innatodni ḵan dida'ḵ ḵaḻabbongane angwa'tte ḵatti.

²⁵ Pun nammiting ḵani woḵ nan-uunudanni ye pumili ḵani'ḵ ibuunni ḵan diḵayu'ḵ mibuḻun ḵan da Paul ḵan Barnabas we ay-ayatonni,

²⁶ we nangipusta'tta biyagda mipagapu ḵan Apu taḵu we Jesu Kristu.

²⁷ Pun imbuunni da Judas ḵan Silas ta didae mismu angipanoḵnoḵ atta annae suḻatni.

²⁸ Te sa pionni ye ibaga ḵan diḵayu, siya bos pion ni Ispiritu Santu te impaspasmoḵna ḵan diḵani ye umadini ampaḵaḻamon diḵayu gapu'tte ipatutni ye unudonyu da ugalini. Abus da annae bilin aḵ ḵasapuḻane tuttuwaonyu.

²⁹ Adiyu ḵanon midatun atta sinan-apudyus, ḵasapuḻane adiyu ḵanon daḻa ya da ayame adipun nidaḻaan ḵan adi ḵayu maḵadagdagas. Ḵad nu tuttuwaonyu da sana, ambaḻu ambanaganyu. Sana da abuse ibagani ḵan diḵayu.”

³⁰ Naabus ḵad suḻatda, pinaḻung-udda dida woḵ nan-osogda'd Antioch. Dummatongda ḵad, nandaḵdaḵngonda da namati woḵ innatodda suḻat.

³¹ Binasada ḵad, amod de layadda te nasoḻgagda.

³² Gapu ta profetan Apudyus da Judas ḵan Silas, adu da imbagadae masoḻgaganda ḵan pumigsaan ni pammatin da susunud ḵan Kristu.

³³ Ḵad sa inninggawanda'd Antioch si pigan aḻgaw, pinaḻung-ud da susunud ḵan Kristu dida woḵ ḵananda, “Inḵayun lumin-awa da somsomoḵyu.” Pun nipaulida'tta nangibuun ḵan dida.

³⁴ Yaḵon simsimmoḵ Silas we inggaw ad Antioch.

³⁵ Yaḵon da Paul ḵan Barnabas, inninggawda'd Antioch we nangituttudu ya nangiwaḻagawag atte Ugud Apu Jesus. Binadangan da adu we namati dida'tte ḵewaaḻda.

Sa Nansinaan Da Paul Ḵan Barnabas

³⁶ Naḻaḵpus ḵad de pigan aḻgaw, ḵanan Paul ḵan Barnabas, “Mipaulita ya inta bisitaon da susunud ḵan Kristu atta siyudade ummoyta nangiwaḻagawagan atte Ugud Apu ya inta ilan nu ngai inonda.”

³⁷ Pun pion Barnabas we awitonda'ḵ John Mark.

³⁸ Yaḵon adimpun Paul pion te tinenan John Mark dida si inninggawanda'd Pamphylia ya adinapun pinagatupane bummadang si ḵewaaḻda.

³⁹ Pune sadi, amod de sossongbatda woḵ nansinada. Innawit Barnabas aḵ Mark woḵ nalluganda'tte bapur we umoy ad Cyprus.

⁴⁰ Yaḵon pinilin Paul aḵ Silas aḵ buḻunna. Intaḻgod da susunud ḵan Kristu dida'tte ḵinabaḻun Apu woḵ nallibbatda.

⁴¹ Pun ummoyda'tta ili'd Syria ya ad Cilicia ta umoyda papigsaon pammatin da namati atta gimung.