Acts 11 - Sa Ugud Apudyus

Sa Imbagan Peter Atta Namati'd Jerusalem

¹ Dingngoḻ da apostol ya da susunud ḵan Kristu si intero we probinsiya'd Judea we inawat os da Gentil Ugud Apudyus.

² Nipauli ḵad aḵ Peter ad Jerusalem, sinamḵuy da namati ye Judyu.

³ Ḵananda, “Ngaipaḵa umoy pamangili'tta Gentil ya naḵaḵanḵa bos ḵan dida?”

⁴ Yaḵon insaḻad Peter we nangipaḵaawat atta losane naḵwae sinassadotna.

⁵ Ḵanana, “Inninggawaḵ ḵad ad Joppa we nalluwaḻu, inggaw impailan Apudyus we isun di in-inop ḵan saḵon. Innilaḵ aḻwae lupute nipadoḻae naḻpu'd langite nataḵodan da opate dugyuna woḵ nibadong atte adani ḵan saḵon.

⁶ Ummaḵ pun immusdong, wadawad da nankalakalasi ye atap ḵan an-ingsae ayam, da ḵumayam, da sissiwit ya da udume tumayap.

⁷ Pun dingngoḻḵu gingae ḵanana, ‘Peter, sumiḵadḵa ta angisidaḵa si piom ḵanon.’

⁸ Yaḵon ḵanaḵ, ‘Naid Apu, naippun paat nanganaḵ atta ibelangni ye Judyu aḵ ḵaissaw.’

⁹ “Dingngoḻḵu bos ḵasin gingae naḻpu'd langite ḵanana, ‘Da pinapoḻḵas Apudyus, adim dida ibelang aḵ ḵaissaw.’

¹⁰ Namiḵlu we naḵwa ḵaḵna. Pun nipangatu'd langit sadi ye aḻwae luput.

¹¹ “Sa sadi ye oras, dummatong da tuḻu we laḻaḵi si boḻoye inggawaḵ. Naḻpuda'd Caesarea we nibuunda'ḵ umoy angayag ḵan saḵon.

¹² Pun ḵanan ni Ispiritu Santu ḵan saḵon, ‘Adiḵa ansuḵnae mibuḻun ḵan dida.’ Da annae onome susunud taḵu ḵan Kristu we iJoppa binuḻunanda bos saḵon woḵ ummoy ḵani'd Caesarea. Dummatong ḵani ḵad, nillumnoḵ ḵani si boḻoy da Cornelius.

¹³ Imbagana ḵan diḵani inonae nangila si anghel we sisiḵad atte boḻoyna woḵ ḵanana, ‘Angibuunḵa'd Joppa aḵ umoy angayag ḵan Simon we ngannonda Peter.

¹⁴ Siya angibaga ḵan siḵa ya da losane ḵabaḻyannu'tte inonyu we matagu.’

¹⁵ Insaḻadḵu ḵade nan-ugud, ummoy Ispiritu Santu ḵan didae isun ni ummaliyana ḵan ditaḵu si laplapu.

¹⁶ Pun inḵagasmoḵḵu imbagan Apu Jesus si awe ye ḵanana, ‘Binonyagan John diḵayu'tte danum yaḵon diḵayu ḵad, mabonyagan ḵayu'tte Ispiritu Santu.’

¹⁷ Pun nu innatod Apudyus Ispiritu Santu atta Gentil we isun ni innatodna ḵan ditaḵu si namatiyan taḵu ḵan Apu Jesu Kristu, ngaiyaḵ ḵammane anullagi ḵan Apudyus?”

¹⁸ Dingngoḻda ḵad sana, ingginoḵdae nanamḵuy ḵan siya woḵ ḵanandae nangidaydayaw ḵan Apudyus, “Innatod os Apudyus atta Gentil ta ambabawida'tta basuḻda ya agaydae angwa ta awad ḵan dida biyag aḵ inggana.”

Da Namati'd Antioch

¹⁹ Sa nangongatanda ḵan Stephen, nampaḵaḻamonda da namati woḵ nabuḵaḻda. Ummoy da udum atte probinsiya'd Phoenicia, da udum ummoyda'd Cyprus we ili si gawan ni baybay ya ummoyda udum atte siyudad ad Antioch woḵ iwwaḻagawagda Ugud Apudyus atta Judyu we abus.

²⁰ Yaḵon da udume namati ye iCyprus ḵan iCyrene, ummoyda'd Antioch woḵ iwwaḻagawagda Ambaḻu we Damag mipanggob ḵan Apu Jesus atta Gentil.

²¹ Gapu ta awad de ḵabooḻan Apu ḵan dida, adu da namati woḵ nansagungda ḵan Apu Jesus.

²² Dingngoḻ ḵad da namati ye magimugimung ad Jerusalem da naḵwa, imbuunda'ḵ Barnabas ad Antioch.

²³ Dummatong ḵad sidi, innilana ḵinabaḻun Apudyus ḵan dida. Nallaylayad woḵ sinoḻgagna dida ta ipapatidae antaḻgod ḵan Apu atte amine somsomoḵda.

²⁴ Te aḵ Barnabas ambaḻu we tagu ya naittan atte ḵabooḻan ni Ispiritu Santu ya ampigsa pammatina. Pun nadog-adog-an belang da inawisnae namati ḵan Apu.

²⁵ Pun ummoy aḵ Barnabas ad Tarsus ta singtona'ḵ Saul.

²⁶ Indasana ḵad, intallayna'd Antioch. Sintawon inninggawanda sidi'tta namati ye naḵagimugimung ḵan nantuttududa'tta ummamdane tagu. Ad Antioch, ummunae naawagan da disipulu aḵ Kristianu.

²⁷ Sa sadi ye timpu, nan-osog da udume profetan Apudyus ad Antioch we naḻpu'd Jerusalem.

²⁸ Osa ḵan dida nangngadan aḵ Agabus we summiḵad woḵ impadtuna imbagan ni Ispiritu Santu ḵan siyae dumatong ummamdane inggi'tta adu we ili si lubung. Pun nituttuwa'tte timpu we nampangatan Emperor Claudius.

²⁹ Pun da namati'd Antioch simsimmoḵdae angidagasda'ḵ badang atta susunud ḵan Kristu atte probinsiya'd Judea. Nangitod sin-ossaossa'tte lamogna itton.

³⁰ Ḵingwada ḵad, indagasda ḵan da Barnabas ḵan Saul ta ittonda'tta angipangpangu'tta namati'd Jerusalem.