3 John 1 - Sa Ugud Apudyus

Sa Laplapun Ni Suḻat

^1-2 Patpatgoḵe Gaius, Saḵon aḵ John we osa'tta angipangpangu'tta namati. Annaya suḻatḵu ḵan siḵae buḻbuḻunḵu. Sipupusu ayatḵu ḵan siḵa. Ilulluwaḻuḵe ambaḻu biyagnu ya ampigsa bos long-agnu we isuna pigsan ni pammatim.

³ Pun amod de layadḵu si ummali da susunud taḵu ḵan Kristu sina woḵ pinanoḵnoḵandae pasigḵa antaḻgod atte ḵatuttuwaan ḵad ipapuutnu we angunud si ḵatuttuwaan.

⁴ Naippun udum aḵ amo nabaḻbaḻu'ḵ allaylaydaḵ yaḵon sa nangngoḻaḵe da abengḵu unudonda ḵatuttuwaan.

Sa Mapatgan Gaius

⁵ Ay-ayatoḵe sunudḵu, ambaḻubaḻu ḵingwam atta susunud taḵu ḵan Kristu we ummiyan sinat te taḵon ay nu ḵailida, imbagadae inayyuwaname ustu dida.

⁶ Sa inninggawanda sina, pinanoḵnoḵanda'tta namati ye magimugimung da ambaḻu we nan-aayatnu ḵan dida. Nu awad isun da sana'ḵ ansadang sinat, pagatupam ḵappose bumadang ḵan dida ya ittom ḵasapuḻan da si daḻan te siya mibagaye mas-oman Apudyus.

⁷ Te ummoyda ta iwaḻagawagda mipanggob ḵan Apu Jesus woḵ adidapun inawat badange naḻpu'tta adipun namati.

⁸ Pun ditaḵu we namati ḵasapuḻan ose badangan taḵu dida ta maḵabillay taḵu si ḵewaaḻdae angipaigammu si ḵatuttuwaan.

Da Diotrephes Ḵan Demetrius

⁹ Nanuḻataḵ atta namati ye magimugimung sinat yaḵon adimpun Diotrephes binigbig ḵaḻabbonganni. Pionae siya angipangpangu sinat.

¹⁰ Pun nu umaliyaḵ sinat, ibagaḵ ḵan diḵayu da ḵingwana ya da ibagabagana mipanggob ḵan diḵani te ippun ḵinatuttuwaan ni ipappabasuḻna ḵan ditaḵu. Ḵad daḵampune abus da sanae banag aḵ dam-ona ḵingwa te adinapun os mangiliyon da susunud taḵu ḵan Kristu we umoy si iliyu. Ḵad iyadina bos da ammangili ḵan dida ya paḻyawona dida'tta namati ye magimugimung.

¹¹ Ay-ayatoḵe buḻbuḻun, adim unudon da angwa'tta lawweng yaḵon unudom da angwa'tta ambaḻu. Te da angwa'tta ambaḻu, dida da abeng Apudyus yaḵon da angwa'tta lawweng ippun igammuda ḵan Apudyus.

¹² Aḵ Demetrius ḵad, ambaḻu ibagabagan da adu we tagu atte mipanggob ḵan siya ya tuttuwa da sana te maila si antataguna. Panoḵnoḵanni bos mipanggob ḵan siya ya igammume tuttuwa da annae ibagani.

Sa Anungus Ni Annae Suḻat

¹³ Adu da pioḵ oḵyan ibaga ḵan siḵa yaḵon adiḵpun indoga si annae suḻat.

¹⁴ Te namnamaoḵe adipun manunnuwan ya ilaḵ siḵa. Ḵad asita an-ug-uggude ustu.

¹⁵ Awad oḵyan lin-awa ḵan siḵae maḻpu ḵan Apudyus. Pakumustaon da buḻbuḻunnu siḵa sina. Sin-ossaom pakumustaon da buḻbuḻun taḵu sinat.