2 Timothy 4 - Sa Ugud Apudyus

¹ Annaya ibilinḵu ḵan siḵa Timothy si sinagung Apudyus ya aḵ Jesu Kristu we ḵasin umali ampangat ḵan anguwis atta losane tagu we matattagu ḵan natoy.

² Iwaḻagawagnu Ugud Apudyus. Ḵasapuḻane pasigḵa maḵasagana, taḵon ay nu ambaḻu baḵon nu lawwenge timpu. Awisom dida ta amatida ḵan Jesus. Ḵad suppaḵam da angwa'ḵ lawweng ya soḻgagom dida ta ḵoonda ambaḻu ya anusam ose antuttudu.

³ Te dumatong timpu we adimpun da tagu pione andongoḻ atte tuttuwae tuttudu ḵad gapu ta pionda unudon awad si somsomoḵda, an-ayagda'tta tagu we angituttudu'tta piondae dongngon.

⁴ Pun adidapun dongngon ḵatuttuwaane tuttudu ya siya bos unudonda da tinutuli ye ug-uggud da tagu si awe.

⁵ Yaḵon ḵan siḵa, ḵasapuḻane tupudom long-agnu. Attomam da ampaḵaḻamam. Iggaiggame angiwaḻagawag atte Ambaḻu we Damag ya ummam ḵoon da ḵewaaḻ ni anserbi ḵan Apudyus we sa intaḻgodna ḵan siḵa.

⁶ Te ḵan saḵon, dummatong timpu we idatunḵu biyagḵu we isun di mainume maisig atte altar ya madam-ane tenaḵ annae lubung.

⁷ Nu ipaniḵ nanserbiyaḵ ḵan Apudyus atte todtoday, inniggaḵ ḵabooḻaḵ woḵ ḵintadḵu ḵigad ni totoddaḵan. Ummaḵ pinopotpotan ḵatuttuwaan.

⁸ Pun sinsadi awad de insaganan Apu we para ḵan saḵone gungunae ittona'tta losane naun-unane tagu. Ittona anna si umali ye aḻgawe anguwisana'tta losane tagu sigun si ustu we anḵuḵuwisna. Ḵad daḵampun aḵ abusaḵ aḵ gungunaana nu adi da losane ummayu si mipauliyana.

Sa Anungus Ni Bilin

⁹ Timothy, masapaḵa oḵyan umali sina

¹⁰ te tinenanaḵ ḵan Demas woḵ ummoy ad Thessalonica te pipiona nainlubungan. Aḵ Crescens ḵad os, ummoy ad Galatia ya aḵ Titus, ummoy ad Dalmatia.

¹¹ Abus aḵ Luke aḵ buḻunḵu sina. Nu umaliḵa, dagasom aḵ Mark te bumadang ḵan saḵon atte ḵewaaḻḵu.

¹² Imbuunku'ḵ Tychicus ad Ephesus.

¹³ Ḵad nu umaliḵa, dagasom ud overcoatḵu we tinenaḵ ḵan Carpus ad Troas. Idogam os da ibluḵ amod ay laḻate naḻuḵube nagiliyan.

¹⁴ Aḵ Alexander ḵade ambobosaḻ, adu da ḵingwana ḵan saḵone lawweng yaḵon aḵ Apudyus asi ḵigade anusa ḵan siya'tta ḵingḵingwana.

¹⁵ Ummam ḵan siya te gattoḵe susullagiyona ituttudu taḵu.

¹⁶ Sa damu we nasumaḻyaaḵ, ippun pulus ummali'ḵ buḻunku'ḵ nangitaḵdoḻ ḵan saḵon. Losanda tinenan saḵon. Adin oḵyan pos Apudyus pabasuḻon dida'tte ḵingwadae lawweng ḵan saḵon.

¹⁷ Yaḵon taḵon ay nu ḵatti ḵingwada, adiyaḵpun nan-awidan ḵan Apu. Siya ḵingwana pinapigsana saḵon ta awad inoḵe angiwaḻagawag atte Ambaḻu we Damag ta dongngon da losane Gentil. Sinaḻaḵnibana saḵon atta tagu we pionda gongaton saḵon.

¹⁸ Ḵad igammuḵe saḻaḵnibanaḵ ḵan Apu atta losane lawweng ya taguwona saḵon ad langit si ampangatana. Madaydayaw oḵyan aḵ Apudyus aḵ inggana. Amen.

Sa Anungus Ni Annae Suḻat

¹⁹ Pakumustaom da Priscilla ḵan Aquila ya isuna bos ḵan da Onesiphorus we simbaḻyan.

²⁰ Natenan aḵ Erastus ad Corinth ya aḵ Trophimus ḵad, tinenaḵ ad Miletus te nasaḵit.

²¹ Ilam ud ta aaddiḵa umali sina si daan ageled. Da Eubulus, Pudens, Linus ya aḵ Claudia ya losan atta susunud ḵan Kristu we anna sina, isuna bose pakumustaonda siḵa.

²² Pasig oḵyan awad aḵ Apu ḵan siḵa ya awad oḵyan ḵan diḵayu ḵinabaḻu we maḻpu ḵan Apudyus.