2 Timothy 3 - Sa Ugud Apudyus

Sa Maḵwa Si Anungus Ni Aḻgaw

¹ Timothy, maawatam oḵyane nu madam-an anungus ni aḻgaw, umadu da dumatonge ampaḵaḻaman.

² Te sa ugalin da tagu'tte sadi, abus aḵ ayatonda long-agda, ḵamommodda si pilaḵ, itaḻayagda da long-agda ya ansoḵaḻ da somsomoḵda. Amsewonda da buḻunda, adidapun tuttuwaon da amada ḵan inada, ippun igammudae anggappiya ya adidapun amati ḵan Apudyus.

³ Taḵon ay da abengda ya da sin-abeng ḵan dida, adidapun ayaton dida. Nu awad tagu'ḵ sumang-anda, adidapun pulus pakawanon. An-ugudda'ḵ lawweng atta buḻunda, adidapun maḵatupod atta long-agda ya lumawelawengda. Sasangngaanda ambaḻu.

⁴ Ituyuḵda da buḻunda ya ḵoonda da banage adidapun umman somsomḵon ambanagana. Amod ampapasindayawda. Daḵampun ḵan Apudyus ayatonda yaḵon siya amaamayonda da gangganasonda.

⁵ Agindadayawda ḵan Apudyus yaḵon adidapun bigbigon ḵabooḻanae amaliw atta lawwenge ugalida. Adayuwam da tagu we ḵassadi.

⁶ Te da udum ḵan dida, umoyda an-attuattun atta boḻoy da bubai ye allasu maawisanda ta allelawonda dida ta unudonda da ituttududa. Da sanae bubai, nambinsawda'tta ummamdane basuḻda ya da ansabasabali ye lawwenge pipionda.

⁷ Patilayunda an-adaḻ yaḵon adidapun paat igammuwon ḵatuttuwaan.

⁸ Da sanae angallelaw atta bubai, sullagiyonda ḵatuttuwaane mipanggob ḵan Apudyus. Isun ni ḵingwan da Jannes ḵan Jambres atte awe ye sinullagida'ḵ Moses. Lawweng somsomoḵ da sanae tagu ya daḵampun aḵ tuttuwa pammatida.

⁹ Yaḵon adipun manunnuwan an-awisanda te igammuwon da tagu we andongdong-ogdae isun da Jannes ḵan Jambres.

Da Udume Tuttudun Paul

¹⁰ Yaḵon ḵan siḵa Timothy, igammum da losane mipanggob atte intuttuduḵ, sa ugaliḵ ya sa panggobḵu si annae biyagḵu, sa pammatiḵ, anusḵu ḵan an-aayatḵu'tta buḻunḵu ya sa nangipapattiyaḵe nangunud ḵan Apudyus.

¹¹ Igammum os da losane naḵwa ḵan saḵon ad Antioch, Iconium ya ad Lystra we ummamdan nampaḵaḻamaḵ. Yaḵon sinaḻaḵnibanaḵ ḵan Apudyus.

¹² Sa ḵatuttuwaan, losan atta pionda unudon naapudyusane biyag gapu si niyossaananda ḵan Jesu Kristu, ampaḵaḻamda.

¹³ Yaḵon da lawweng ya da angallelaw atta buḻunda, amo iggaiggadae angallelaw atta buḻunda ya isuna bose maallelawda.

¹⁴ Yaḵon ḵan siḵa, pagapagatupam atta inadaḻnu ya da pinatini ye ḵatuttuwaan te iniiggammum da ḵinatatagun da nangituttudu ḵan siḵa.

¹⁵ Sosomkome inggan ni ḵaban-ognu, inigammum da nigili ye Ugud Apudyus we siya nituttudu ḵan siḵa mipanggob si mataguwan gapu si pammatim ḵan Jesu Kristu.

¹⁶ Da losane nigili ye Ugud Apudyus, aḵ Apudyus nangigga si somsomoḵ da nangigili. Ḵad mausar aḵ anuttudu ḵan ditaḵu si ḵatuttuwaan ya angigammuwan atta kamali ḵan basuḻ taḵu, suppaḵana ditaḵu ta ḵasapuḻane baliwan taḵu da lawwenge ugali taḵu ya ḵoona ditaḵu'ḵ maun-unan antatagu taḵu ya ḵoon taḵu da ummun-un,

¹⁷ ta ippun angkurangan taḵu we anserbi ḵan Apudyus yaḵon naḵasagana taḵu we angwa'tta losane kalasin di ambaḻu.