2 Timothy 1 - Sa Ugud Apudyus

Sa Laplapun Ni Suḻat

¹ Saḵon aḵ Paul we apostol Jesu Kristu te siya pinion Apudyus. Imbuunna saḵon aḵ umoy angiwaḻagawag si biyage inkarin Apudyus ḵan ditaḵu we nidoga ḵan Jesu Kristu.

² Annaya suḻatḵu ḵan siḵa Timothy ye imbelangḵu'ḵ abengḵu we ay-ayatoḵ. Awad oḵyan ḵan siḵa ḵinabaḻu, ḵadagu ḵan lin-awae maḻpu ḵan Apudyus we Ama taḵu ya aḵ Jesu Kristu we Apu taḵu.

Sa Nanggappiyaan Paul Ya Sa Bilinna Ḵan Timothy

³ Anggappiyaaḵ ḵan Apudyus we anserbiyaḵe ampoḻḵas somsomoḵḵu we isun ni nanseserbin da danaḵḵoḻ taḵu. Alluwaḻuwaḵ ḵad ḵan Apudyus atte inaḻgaw ḵan nilabi, adiḵpun maliwatane anggappiya ḵan Apudyus gapu si pammatim.

⁴ Iḵagasmoḵḵu lummuwaam atte nansinaanta si awe, pun pioḵ ilan siḵa ta allaylayadaḵe ustu.

⁵ Adiḵpun os maliwatan gattoḵe pammatim, isun ni pammatin Lois we apum ya aḵ Eunice we inam ḵad aaddi ye siya annat ḵan siḵa sinsadi.

⁶ Pun siya gapunae paiḵagasmoḵḵu ḵan siḵa ta usarom ḵabooḻame innatod Apudyus si nangipatayaḵ atte imaḵe nangiluwaḻu ḵan siḵa.

⁷ Te sa Ispiritu we innatod Apudyus ḵan ditaḵu, daḵampun si ogyat yaḵon sa ḵabooḻan taḵu we anserbi ḵan Apudyus, sa ayaton taḵu da udume tagu ya sa lamog taḵu we anupod si long-ag taḵu.

⁸ Pun adiḵa mabaine angipanoḵnoḵ si mipanggob ḵan Apu. Adiḵa bos mabain gapu ḵan saḵone nibaḻud gapu'tte nanserbiyaḵ ḵan siya yaḵon anusam attoman ampaḵaḻamam gapu si angiwaḻagawagan taḵu'tte Ambaḻu we Damag. Attomam te papigsaon Apudyus siḵa.

⁹ Tinaguna ya pinilina ditaḵu ta ditaḵu da taguna. Sa nangwaana si sadi, daḵampun aḵ gapu'tte ḵingwa taḵu yaḵon gapu si panggobna ya ḵinabaḻuna ḵan ditaḵu. Sa daan ni lubung maḵwaan, inggallapun Apudyus simsimmoḵe ipailana ḵinabaḻuna ḵan ditaḵu mipagapu ḵan Jesu Kristu.

¹⁰ Ḵad sinsana, impaigammuna ḵan ditaḵu sadi ye ḵadaguna te ummali'ḵ Jesu Kristu we anagu ḵan ditaḵu. Ḵinaanna ḵabooḻan ni ḵatoy ḵan impaigammunae nu amati da tagu si Ambaḻu we Damag, awad ḵan dida biyage maḻpu ḵan Apudyus we ippun anungusna.

¹¹ Dinutuḵan Apudyus saḵon aḵ apostol ta iyyaḵ iwaḻagawag ḵan ituttudu annae Ambaḻu we Damag,

¹² ḵad sadi gapun ni ampaḵapaḵaḻamaḵ. Yaḵon adiyaḵpun mabain te igammuḵ pinatiḵe awad de ḵabooḻanae angayyuwan atta intaḻgodna ḵan saḵon inggana'ḵ dumatong aḻgawe ḵasin umali'ḵ Kristu.

¹³ Nu antuttuduḵa, ilam ta uunnudom ḵatuttuwaane intuttuduḵ ḵan siḵa ya gogomgomam pammatim ḵan ayate innatod Jesu Kristu ḵan ditaḵu we niyossaan ḵan siya.

¹⁴ Mipagapu'tte ḵabooḻan ni Ispiritu Santu we iinggaw ḵan ditaḵu, ayyuwaname ustu ampatoge tuttudu we intaḻgod Apudyus ḵan siḵa.

¹⁵ Inigammume tigangay ta losan atta namati'd Asia, nan-awidanda saḵon, nidoga da Phygelus ḵan Hermogenes.

¹⁶ Ḵadaguwan oḵyan Apudyus da Onesiphorus we simbaḻyan te nangampigae sinoḻgagna saḵon. Taḵon ay nibaḻudaḵ sinsadi, adipun mabaine namisita ḵan saḵon.

¹⁷ Dummatong ḵad ad Rome, singsingngitna saḵon inggana'ḵ indasanaḵ.

¹⁸ Inigammum os daḵoḻe badangna ḵan saḵon ad Ephesus si awe. Ḵadaguwan oḵyan Apudyus si aḻgawe anguwisana'tta tagu.