2 Thessalonians 3 - Sa Ugud Apudyus

Da Paul Piondae Pailuwaḻu

¹ Susunudḵu ḵan Kristu, iluwaḻuwanyu ḵappos diḵani ta mapagatupane mipaigammu Ugud Apu atta udume tagu. Ḵad ipatogda oḵyan ya patiyondae isun ni ḵingwayu.

² Iluwaḻuyu ta saḻaḵniban diḵani ḵan Apudyus atta lawwelawwenge tagu te tuttuwae daḵampun aḵ losane tagu namati ḵan Apudyus.

³ Yaḵon ustu te aḵ Apu ḵad mataḻgodan, adinapun iwaḻange amapigsa ḵan anaḻaḵnib ḵan diḵayu'tte ḵoon Satan.

⁴ Ḵad antaḻgod ḵani ḵan Apu atte mipanggob ḵan diḵayu we pagatupanyu we angwa'tta bilinni ḵan diḵayu.

⁵ Oḵyan nu idaḻan Apu da somsomoḵyu'tte ayat Apudyus ya sa ḵinaanus Kristu.

Sa Bilin Atta Baduuḻ

⁶ Sinsadi susunudni ḵan Kristu bilinonni diḵayu'tte ngadan Apu Jesu Kristu we adiyu buḻbuḻunon da namati ye baduuḻe anḵewaaḻ ya da adipun tumuttuwa'tta inawatyu we tuttudu ḵan diḵani.

⁷ Te diḵayu we mismu angiiggammu si inonyu we angunud atta ambaḻu we ugalini si inninggawanni ḵan diḵayu. Te adiḵanipun baduuḻe nanḵewaaḻ.

⁸ Daḵampun os aḵ adini binayadan da ḵinanni te pummangog ḵani ye nanḵewaaḻ atte inaḻgaw ya nilabi ta adi ḵayu ampaḵaḻam atta masapuḻni.

⁹ Ḵingwani da ḵatti ta awad ampaniyanyu unudon taḵon ay nu anna ḵaḻabbonganni ye anḵodaw ḵan diḵayu'tta masapuḻni.

¹⁰ Te sa inninggawanni ḵan diḵayu, imbilinni ye da ngaimane adi anḵewaaḻ adida oḵyan angan.

¹¹ Ibagani anna te dingngoḻni ye awad ḵanu da udum ḵan diḵayu we baduuḻe anḵewaaḻ yaḵon siya ampawotanda bumiyangda'tta ḵoon da buḻunda.

¹² Gapu si ḵaḻabbonganni ye naḻpu ḵan Apu Jesu Kristu, bagbagaanni da sadi ye tagu ya bilinonni dida ta ipapuutdae anḵewaaḻ ta awad iḵataguda.

¹³ Susunudḵu ḵan Kristu, adiḵayu mappoge angwa si ambaḻu.

¹⁴ Nu awad adipun tumuttuwa'tte imbagani si annae suḻat, adi ḵayu miyisu ḵan siya ta mababbainan.

¹⁵ Adiyu ibelange ḵabusuḻyu sanate tagu yaḵon bagbagaanyu we isun di sunudyu ḵan Kristu.

Sa Anungus Ni Annae Suḻat

¹⁶ Oḵyan pos ta aḵ Apu we puun ni lin-awa taḵu, patilayun ose angitod si sanae lin-awa ḵan diḵayu taḵon ay ngai maḵwa. Ḵad pasig oḵyan ose iinggaw ḵan diḵayu losan.

¹⁷ Saḵon aḵ Paul we nangigili'tte anungus ni annae suḻate impaigiliḵ. Ḵingwaḵ atta losane suḻatḵu ta maigammu we tuttuwae naḻpu ḵan saḵon te lamogyu imatunan sinyal ḵan inoḵe anggili.

¹⁸ Awad oḵyan ḵan diḵayu losan ḵinabaḻu we maḻpu ḵan Apu taḵu we Jesu Kristu.