2 Thessalonians 1 - Sa Ugud Apudyus

Sa Laplapun Ni Suḻat

¹ Saḵon aḵ Paul ya da buḻunḵu we da Silas ḵan Timothy. Annaya suḻatni'tta namati ye magimugimung ad Thessalonica we da nidoga ḵan Apudyus we Ama taḵu ya aḵ Apu Jesu Kristu.

² Awad oḵyan ḵan diḵayu ḵinabaḻu ḵan lin-awae maḻpu ḵan Apudyus we Ama taḵu ya aḵ Jesu Kristu we Apu taḵu.

Sa Nanggappiyaan Paul Gapu Atte Pammatin Da IThessalonica

³ Susunudḵu ḵan Kristu, ḵasapuḻane patilayun ḵani anggappiya ḵan Apudyus gapu ḵan diḵayu, ḵad mibagay nu ḵoonni ḵaḵna te pumigsapigsa da pammatiyu ḵad amo madog-adog-an ayat ni sin-ossaossa ḵan diḵayu we an-asiayat.

⁴ Pun nu inḵani bisitaon da gimung da namati ḵan Apudyus atta ḵinailin di ili, isḵaḻni diḵayu'tte ḵinaanusyu ya sa angipapuutanyu we amati taḵon ay nu amod da ampaḵaḻamanyu gapu'tta pammatiyu.

Sa Anḵuḵuwis Apudyus

⁵ Sadi angipaila si gattoḵe naun-unane anḵuḵuwis Apudyus atta tagu. Te mipagapu'tte ampaḵaḻamane inan-anusanyu sinsana, nipailae mibagay ḵayu we midoga si ampangatana.

⁶ Ustu inon Apudyus we anḵuwis te da tagu we namaḵaḻam ḵan diḵayu, ampaḵaḻamona bos dida.

⁷ Sa sadi bose timpu, paginḵon Apudyus da ampaḵaḻaman taḵu we sana. Ḵoona da sana nu ampaila'ḵ Apu Jesus atte umaliyana ḵasine maḻpu'd langite buḻunna da maḵabooḻe anghelna.

⁸ Ḵad dusaona'tte apuy ta bumaḻos atta adipun angigammu ḵan Apudyus ya da adipun tumuttuwa gapu si adidapun amatiyan atte Ambaḻu we Damag mipanggob ḵan Jesus we Apu taḵu.

⁹ Sa dusada, ampaḵaḻamda'ḵ inggainggana ya misinada ḵan Apu aḵ inggana ya adidapun ilan nakaskasdaawe ḵabooḻana.

¹⁰ Sa aḻgaw ḵad ose umaliyanae sa madayawana'tta taguna, mataagda losane namati'tte ḵinaapudyusna. Ḵad mibelang ḵayu bos ḵan dida te pinatiyu Ugud Apudyus we tinaḵdoḻanni ḵan diḵayu.

¹¹ Pun patilayune iluwaḻuwanni diḵayu ta ambalinon Apudyus diḵayu'ḵ tagu we mibagay si namiliyana ḵan diḵayu. Ituttuwana oḵyan pos da losane ambaḻu we panggobyu ya da losane ḵingwayu ya da pammatiyu gapu'tte ḵabooḻana.

¹² Ta madayaw aḵ Jesus we Apu taḵu gapu ḵan diḵayu ya madayaw ḵayu bos gapu ḵan siya. Maḵwa losan da sana gapu si ḵinabaḻun Apudyus ya aḵ Apu taḵu we Jesu Kristu.