2 Peter 3 - Sa Ugud Apudyus

Sa Mipauliyan Jesu Kristu

¹ Ay-ayatoḵe buḻbuḻun, annaya ḵumagwae suḻatḵu ḵan diḵayu. Ḵad da annae suḻatḵu, awad de impaspasmoḵḵu ḵan diḵayu ta usaronyu da ampoḻḵas ya tuttuwae ḵasomsomḵanyu.

² Pioḵe iḵagasmoḵyu da impadtun da profeta we nanserbi si awe ya da bilin Apu taḵu ya sa Anagu we impaigammuna ḵan diḵayu mipagapu'tta apostol we nantuttudu ḵan diḵayu.

³ Sosomḵonyu anna te gattoḵe ampatog: Nu dumatong anungus ni aḻgaw, tumoḵwaḻ da umang-angyage siya unudonda pipion da long-agda. Ḵad ḵanandae angang-angyag ḵan diḵayu,

⁴ “Adimpun ḵamman Jesus inkari ye mipauli? Dimman ay nu? Naabus nanḵaḵatoy da ummun-unae namati ye danaḵḵoḻ taḵu ya daampun ay umali. Inggan ni nangwaana si lubung inggana sinsadi, sissiyae naippun nambaliwana.”

⁵ Sadi ibagabagan da umang-angyag yaḵon gagaḻ-onda maliwatane sa awe, ḵingwan Apudyus langit ya sa luta mipagapu si ugudna woḵ danum inusarnae nangwa si lubung woḵ nallotaw lutae naḻpu si danum.

⁶ Mipagapu'tta sana, nilitap Apudyus gagangaye lubung si danum woḵ naumbuḻ da tagu ya nadadail da losane matattagu si lubung.

⁷ Sinsadi, mipagapu bos atte Ugud Apudyus, nisasaggana annae langit ḵan lutae dadailon ni apuy nu dumatong aḻgawe anguwisan Apudyus atta tagu we ḵabasbassuḻan ta madusada'ḵ inggana.

⁸ Yaḵon annaya ḵasapuḻane adiyu maliwatan, ay-ayatoḵe buḻbuḻun. Sa ḵasomsomḵan Apudyus atte ḵaandun ni sin-aḻgawe abus, isuna sillibu we tawon ya sa sillibu we tawon isuna sin-aḻgaw.

⁹ Sa ḵasomsomḵan da udume tagu, itaḻyan Apudyus we angituttuwa'tta inkarina yaḵon daḵampun aḵ tuttuwa. Sa ḵatuttuwaan, anuanusana diḵayu te adinapun pione awad ossaan aḵ madusa yaḵon siya piona ibabawin oḵyan da losane tagu da basuḻda ya agaydae angwa.

¹⁰ Yaḵon sa mipauliyan Apu mapoḵḵatane isun ni umaliyan ni aḵḵawan atte boḻoy. Sa aḻgaw ose sadi, awad de andangsoḻe aguduud ḵad mawawan ad langit ya mabunas si apuy init, sa soḻag ya da bituwon. Isuna bose masgob luta ya da losane naḵwa si luta.

¹¹ Nu ḵaḵna madadailan da sanae losane banag, sa antataguyu pasig oḵyan ambaḻu ugaliyu ya naapudyusan

¹² si anguuwayanyu si aḻgawe anguwisan Apudyus atta tagu. Iggayu oḵyan ḵabooḻanyu ta pumogos umaliyan ni sanae aḻgaw. Pun tuttuwae sa sanate aḻgaw, masgob langite sa igaw ni init, sa soḻag ya da bituwon ya bunason ni apuy dida.

¹³ Yaḵon awad de inkarin Apudyus we uuwayon taḵu, we sa baru we langit ḵan baru we lutae naun-unan da ugalin da losane iinggaw sidi.

¹⁴ Pun ay-ayatoḵe buḻbuḻun, gapu ta sana uuwayon taḵu, igga taḵu ḵabooḻan taḵu ta pumoḻḵas taḵu ya ippun ḵadellawan taḵu'tte antotollong Apudyus ya allin-awa maḵabuḻbuḻunan taḵu ḵan siya.

¹⁵ Sosomḵonyu we sa gapunae naanus Apu taḵu, pionae awad wayan da tagu ta taguwona dida. Sadi da insuḻat Paul we ay-ayaton taḵu we sunud taḵu ḵan Kristu ḵan diḵayu sigun si lainge innatod Apudyus ḵan siya.

¹⁶ Ḵad losan atta suḻatna imbagana da anna. Awad ḵammos da ansigabe maawatan. Ḵad da tagu we aḵit igammuda ya adipun ampigsa pammatida, baliwanda ustu we piona ḵanan, isun os ni ḵoonda'tta udume nigili ye Ugud Apudyus. Gapu'tte angwaanda si sadi, madusada'ḵ inggana.

¹⁷ Diḵayu ḵade ay-ayatoḵe buḻbuḻun, inabusḵu imbagabaga ḵan diḵayu mipanggob atta tagu we angituttudu si daḵampun aḵ tuttuwa. Pun ummanyu ta adi ḵayu maallelaw si nankamaliyanda ya uni ḵad umadayu ḵayu si ampigsae pammatiyu,

¹⁸ yaḵon pagatupanyu oḵyan padason amode ḵinabaḻun Jesu Kristu we Apu taḵu ya Anagu ḵan ditaḵu ḵad dogdog-anyu bos inigammuyu ḵan siya. Madaydayaw oḵyan aḵ Kristu sinsana ya aḵ inggainggana. Amen.