2 Peter 1 - Sa Ugud Apudyus

Sa Laplapun Ni Suḻat

¹ Saḵon aḵ Simon Peter we osa'tta apostol Jesu Kristu we anserbi ḵan siya. Annaya bos suḻatḵu ḵan diḵayu we innattan Apudyus aḵ pammati ye ippun nisabaliyana si pammatini mipagapu si naun-unan Jesu Kristu we Apudyus taḵu ya Anagu ḵan ditaḵu.

² Awad oḵyan ḵan diḵayu amode ḵinabaḻu ḵan lin-awae maḻpu ḵan Apudyus mipagapu si ustu we angigammuwanyu ḵan Apudyus ya aḵ Jesu Kristu we Apu taḵu.

Sa Ambaḻu We Ugali Ye Ḵasapuḻan Da Namati

³ Mipagapu si ḵabooḻan Apudyus, innatodna ḵan ditaḵu da losane ḵasapuḻan taḵu ta unudon taḵu naapudyusane antatagu. Maḵwae unudon taḵu sadi te igammu taḵu we siya namili ḵan ditaḵu mipagapu si mismu we ḵinadayawna ḵan ḵinabaḻuna.

⁴ Gapu si ḵinadayawna ḵan ḵinabaḻuna, innatodna ḵan ditaḵu da ampapatog ya ambabaḻu we inkarina ta mipagapu'tta sana, miligsi taḵu'tta amaamayon da tagu'tte lubunge anadail ḵan dida ya sa ugali taḵu miyisu ḵan Apudyus.

⁵ Ḵad gapu'tte sana, iggayu ḵabooḻanyu ta idogayu si pammatiyu ambaḻu we ugali ḵad sa ambaḻu we ugali, dog-anyu si angigammuwanyu si mipanggob ḵan Apudyus.

⁶ Sa angigammuwanyu, ḵasapuḻane tupodonyu da long-agyu ya ḵasapuḻane attomanyu nu magulugulu ḵayu. Ḵad dog-anyu bos atte naapudyusane antatagu.

⁷ Losan atta sanat, sa naapudyusane antatagu dog-anyu ayat atta susunudyu we namati ya sa ayat os atta ngaimane tagu.

⁸ Te nu wadawad da anna ḵan diḵayu ya madog-adog-an, ambanag si amunga'ḵ adu gapu'tte angigammuwanyu ḵan Jesu Kristu we Apu taḵu.

⁹ Yaḵon ngaimane adi angunud atta sanae ambaḻu we ugali, isun di naḵuḻap ḵan ampodad ilana ya naliwatanae pummoḻḵas atta gagangaye basuḻna.

¹⁰ Pun susunudḵu ḵan Kristu, ipapatiyu we angunud si ambaḻu we antatagu ta amanoḵnoḵe inayagan ḵan pinilin diḵayu ḵan Apudyus. Te nu ḵoonyu da sana, adiḵayupun paat maottag si pammatiyu.

¹¹ Ḵad allaylayad os aḵ Apudyus we amaḻonoḵ ḵan diḵayu si annanayune ampangatan Jesu Kristu we Apu taḵu ya Anagu ḵan ditaḵu.

Sa Mibatayan Ni Gattoḵe Pammati Taḵu

¹² Pun siya gapunae ipapatiḵe angipaspasmoḵ ḵan diḵayu ta isisimoḵyu losan da sana taḵon ay inigammuyu dida ya ipapatiyu we angunud si ḵatuttuwaane nituttudu ḵan diḵayu.

¹³ Sa ḵasomsomḵaḵ, ustu ipaspasmoḵḵu ḵan diḵayu da sana si sissiyae matattaguwaḵ.

¹⁴ Te igammuḵe madam-an matoyaḵ te siya impaigammun Apu taḵu we Jesu Kristu ḵan saḵon.

¹⁵ Pun iggaḵ ḵabooḻaḵe angibaga'tta sana ta sibotḵu ḵade matoy, pasigyu iḵagasmoḵ da sana.

¹⁶ Te sa impaigammuni ḵan diḵayu mipanggob si ḵabooḻan Apu taḵu we Jesu Kristu ya sa ḵasinna umaliyan, adinipun imbatay atta daḵampun aḵ tuttuwae ug-uggud da nalalaing ḵan nasiḵape tagu. Te diḵani ye mismu nangila si ḵinangatuna ya sa ḵinaapudyusna.

^17-18 Te diḵani da buḻunna'tte beleg Apudyus si nangidayawan ya nangipatogan Apudyus we Ama ḵan siya ya sa nangipail-ana si sumilisilinge ḵinaapudyusna. Dingngoḻni ye mismu gingan ni maḵabooḻe Apudyus we naḻpu'd langite ḵanana, “Annaya ay-ayatoḵe Abengḵu we mas-omaḵ.”

¹⁹ Pun napanoḵnoḵanni ye tuttuwa imbagabagan da profeta we an-uuggudon Apudyus si awe. Ḵad ambaḻu nu patiyonyu da imbagabagada te isunan silawe allangḻang si anggiḵbote lugar ingganae bumigbigat ḵad ampaila ambigatton ya allangḻang atta somsomoḵyu.

²⁰ Sosomḵonyu anna te gattoḵe ampatog: Naippun nipadtu'ḵ inggilin da profeta aḵ naḻpu si mismu we somsomoḵda.

²¹ Te naippun nipadtu'ḵ naḻpu si pinion ni tagu yaḵon indaḻan ni Ispiritu Santu didae nangibagabaga si ugude naḻpu ḵan Apudyus.