2 John 1 - Sa Ugud Apudyus

Sa Laplapun Ni Suḻat

¹ Patpatgoḵe ina, Saḵon aḵ John we osa'tta angipangpangu'tta namati. Annaya suḻatḵu ḵan siḵae pinilin Apudyus ya da abengnu. Sipupusu annae ayatḵu ḵan diḵayu. Ḵad daḵampun aḵ saḵone abus angayat ḵan diḵayu yaḵon losan os atta angigammu si ḵatuttuwaan.

² An-asiayat taḵu gapu'tte ḵatuttuwaane iinggaw ḵan ditaḵu ya nimumuḻa'tta somsomoḵ taḵu'ḵ inggana.

³ Awad oḵyan ḵan ditaḵu ḵinabaḻu, ḵadagu ḵan lin-awae maḻpu ḵan Apudyus we Ama taḵu ya aḵ Jesu Kristu we Abengna ta unudon taḵu ḵatuttuwaan ya an-asiayat taḵu.

Sa Ḵatuttuwaan Ya Sa Ayat

⁴ Amod de layadḵu si inigammuḵe da udume abengnu, siya unudonda ḵatuttuwaane imbilin Apudyus we Ama ḵan ditaḵu.

⁵ Ḵad sinsadi annaya ibagaḵ, ḵodawoḵ ḵan siḵae patpatgoḵe ina. An-asiayat taḵu oḵyan. Daḵampun aḵ baru we bilin anna yaḵon sa inninggaw ḵan ditaḵu si inggan ni laplapu.

⁶ Ḵad annaya ayate angunudan taḵu'tta bilinna. Annaya biline dingngoḻ taḵu si inggan ni laplapu. Ḵasapuḻane an-asiayat taḵu.

⁷ Te lummoswa da adu we umallelaw si annae lubung. Adidapun bigbigone aḵ Jesu Kristu nambalin aḵ tuttuwae tagu'tte ummaliyana si lubung. Da ḵaḵnate tagu, umallelawda ya ḵabusuḻ Kristu dida.

⁸ Ummanyu ta adiyu taḻaḵon da ḵinewaaḻyu yaḵon gun-udonyu da losane gunguna.

⁹ Ngaimane tagu we adinapun pagatupane angunud atta tuttudun Kristu yaḵon amo dog-ana, adinapun igammu'ḵ Apudyus. Yaḵon sa tagu we pagapagatupanae angunud atta tuttudun Kristu, iinggaw aḵ Apudyus we Ama ya sa Abengna ḵan siya.

¹⁰ Pun nu awad umali ḵan diḵayu'ḵ sabali tuttuduna, adiyu paḻonḵon atte boḻoyyu. Adiyu bos pakumustaon.

¹¹ Te nu ḵatti ḵoonyu, inon-onanyu si ḵoona.

Sa Anungus Ni Annae Suḻat

¹² Adu oḵyan pioḵe ibaga ḵan diḵayu we adiḵpun indoga'tte sanae suḻat te namnamaoḵe iyyaḵ anggaggaḵay ḵan diḵayu. Ḵad asi taḵu an-uugude ustu ta amo lumayad taḵu nu an-asiila taḵu.

¹³ Pakumustaon diḵayu'tta abeng ni bubai ye sunudnu ḵan Kristu we pinilin os Apudyus.