2 Corinthians 9 - Sa Ugud Apudyus

Sa Badang Atta Udume Namati

¹ Daḵampun aḵ ḵasapuḻane isuḻatḵu ḵan diḵayu mipanggob si badange maiyoy atta tagun Apudyus ad Judea.

² Te igammuḵe allaay ḵayu we bumadang woḵ siya iyyisḵaḻḵu mipanggob ḵan diḵayu'tta gimung da namati'd Macedonia. Imbagaḵe naḵasagana ḵayu sinat ad Achaia we bumadang inggan ni ḵesane tawon. Ḵad gapu'tte sadi ye imbagaḵ, nasoḻgag da ḵaaduwan ḵan didae bumadang.

³ Pun sinsadi, annae ibuunḵu da susunud taḵu ḵan Kristu ta mapanoḵnoḵane sa nangiyisḵaḻanni si mipanggob ḵan diḵayu, daḵampun aḵ abuse ugud yaḵon tuttuwae naḵasagana ḵayu'tta badangyu we isun ni imbagaḵ.

⁴ Te nu umaliyaḵ sinat ya awad mibuḻun ḵan saḵon atta susunude iMacedonia ya odasanni diḵayu we daampun maḵasagana'tta badangyu, madismayaaḵe gattoḵ ḵad isuna bose madismaya ḵayu te antaḻgod ḵani ye naḵasagana ḵayu.

⁵ Pun simsimmoḵḵu we un-unnoyna gay paunaoḵ da susunud taḵu ḵan Kristu ta andaḵdaḵngonda da inkariyu we ittonyu. Ta dumatong ḵani ḵad, naḵasagana da badangyu. Ḵad sadi angipailae amod de ayatyu we angitode daḵampun aḵ napatut ḵayu.

⁶ Somsomḵonyu anna. Sa tagu we aḵit immuḻana, aḵit os apitona. Yaḵon sa tagu we adu immuḻana, adu bos apitona.

⁷ Pun awad osa ḵan diḵayu ḵasapuḻane sosomḵona nu ngai piona ittone maḻpu si pusunae ippun oḵyan dadaulina ḵan daḵampun aḵ mapatute angitod. Te ayaton Apudyus allaaye angitod.

⁸ Ḵad ḵabooḻan Apudyus we amindisyun ḵan diḵayu'ḵ amod ta pasige wadawad da ḵasapuḻanyu ya awad adu'ḵ ibadangyu'tta anḵasapuḻ.

⁹ Awad de nigili'tte Ugud Apudyus mipanggob atte allaaye tagu we ḵanana, “Aduadu ittonae badang atta ḵapus. Pun ippun ampatinggaan ni naun-unana.”

¹⁰ Aḵ Apudyus angitod si buḵoḻe imuḻan ni an-osoḵ ya da maḵane ḵanon da tagu ḵad paaduwona bos da losane awad ḵan diḵayu ta umaduadu da ittonyu'tta anḵasapuḻ mipagapu si naun-unanyu.

¹¹ Pabaḵnangon diḵayu ta da losane timpu maḵwae allaay ḵayu we angitod atta anḵasapuḻ. Ḵad adu da anggappiya ḵan Apudyus gapu'tta badangyu we inawatda mipagapu ḵan diḵani.

¹² Te sa sanae anserbiyanyu, daḵampun ay aḵ abuse maatod ḵasapuḻan da tagun Apudyus yaḵon amo umaduadu bos da tagu we anggappiya ḵan siya.

¹³ Pun gapu'tte sadi ye ḵoonyu we angitod, ipanoḵnoḵna ḵatuttuwaan ni pammatiyu ya paaduwonyu da tagu we angidayaw ḵan Apudyus gapu ta mailadae uunnudonyu Ambaḻu we Damag si mipanggob ḵan Kristu we ibagayu we patiyonyu. Ḵad tuttuwae anggappiyada ḵan Apudyus gapu si laayyu we angitod si ḵasapuḻan da losane namati.

¹⁴ Ḵad iluwaḻuwanda diḵayu ya amod de ayuda ḵan diḵayu gapu'tte ummamdane ḵinabaḻun Apudyus ḵan diḵayu.

¹⁵ Pun anggappiya taḵu ḵan Apudyus gapu'tte innatodna ḵan ditaḵu we ippun miyisuwana!