2 Corinthians 7 - Sa Ugud Apudyus

¹ Susunudḵu ḵan Kristu we ay-ayatoḵ, gapu'tta sanae inkarin Apudyus ḵan ditaḵu, iginoḵ taḵu we angwa'ḵ lawweng ya iginoḵ taḵu we ansomsomoḵ aḵ lawweng. Sa matattaguwan taḵu, isipog taḵu'ḵ Apudyus ta bumaḻubaḻu naapudyusane antatagu taḵu.

Sa Allaylaydan Paul Atta ICorinth

² Ipailayu oḵyan ayatyu ḵan diḵani. Ippun ḵingwani'ḵ lawweng atta ngaimane tagu, ippun ossaan aḵ dinadailni ḵan ippun ossaan aḵ kinulukni ya ginundawayanni.

³ Daḵampun aḵ imbagaḵ anna'ḵ pabasuḻoḵ diḵayu te tuttuwa sadi ye imbagaḵe ay-ayatonni diḵayu. Pun matagu taḵu man baḵon nu matoy taḵu, adipun paat maḵaan ayatni ḵan diḵayu.

⁴ Antaḻgodaḵ ḵan diḵayu ya ipasindayawḵu diḵayu ya pumigsa pammatiḵ mipagapu ḵan diḵayu. Taḵon ay nu ampaḵaḻamaḵ, allaylayadaḵ gapu ḵan diḵayu.

⁵ Te taḵon ay dummaḵnganni'd Macedonia, ippun umillongan da somsomoḵ ḵan long-agni gapu'tta amode ampaḵaḻamane nilaḵ-amni'tta ngaimane ummayanni. Ḵad adu we gulu'tte nampaliḵwos ḵan diḵani ya ambimbinsaw ḵani.

⁶ Yaḵon aḵ Apudyus we alliwliwa'tta andadauy, niliwliwana bos diḵani gapu'tte dummaḵngan Titus.

⁷ Ḵad daḵampun aḵ abus dummaḵngana'ḵ namapigsa si pammatini yaḵon sa nangugudana ḵan diḵani'tta banag si mipanggob ḵan diḵayu we nanoḻgag ḵan siya. Ḵad inugudna bos mipanggob si ummayuwanyu ḵan saḵon ya sa nambabawiyanyu gapu'tte ḵingwayu we lawweng. Inugudna bose pionyu we angitaḵdoḻ ḵan saḵon. Pun amo nadog-an laylayadḵu sinsadi.

⁸ Te taḵon ay nu pinaḻawengḵu somsomoḵyu gapu'tte suḻatḵu ḵan diḵayu, adiyaḵpun nandadauli. Yaḵon sa ḵatuttuwaan nandadauliyaḵ te iniiggammuḵe nandadauli ḵayu yaḵon ambaḻu te sin-aḵitane abus.

⁹ Yaḵon sinsana allaylayadaḵ, daḵampun aḵ gapu'tte nandadauyan ni somsomoḵyu yaḵon gapu'tte nandadauyanyu nangitod atte nambabawiyanyu'tta basuḻyu ya nangiyagayanyu we nangwa. Te inusar Apudyus nandadauyan ni somsomoḵyu'ḵ bumaḻuwanyu woḵ sadi ippun lawweng aḵ naḵwa ḵan diḵayu'tte mipagapu ḵan diḵani.

¹⁰ Te sa dadauy da tagu we mas-oman Apudyus, ambanag si ambabawiyanda'tta basuḻda ya agaydae angwa ta siya angidaḻan si anaguwan Apudyus ḵan dida si dusan da basuḻ. Naippun dadauy si sadi! Yaḵon nu sa tagu we adipun amati angiḵna si dadauye adipun ambabawi, ambanag si dusan ni ḵatoy.

¹¹ Te ilanyu ḵad ḵabaḻun ni ḵingwan Apudyus gapu'tte nandadauyan ni somsomoḵyu. Sinsadi, ibungana ayatyu we angwa'tta ambaḻu ya ipapatiyu ipailae ustu da ḵoonyu. Summanga ḵayu gapu'tte naḵwa ḵan diḵayu ya maḵimut ḵayu'ḵ dusaon Apudyus diḵayu gapu'tta basuḻyu. Pionyu pagay os ilan saḵon ya allaylayad ḵayu bose angwa'tta imbagaḵ. Pionyu bose anusa'tte tagu we naḵabasuḻ. Gapu'tta losane ḵingwayu, nipailae ippun mipabasuḻ ḵan diḵayu gapu'tte naḵabasuḻan da sadi ye tagu.

¹² Pun taḵon ay nu nanuḻataḵ ḵan diḵayu, daḵampun aḵ gapu'tte nangwa'ḵ basuḻ baḵon nu gapu'tte tagu we naḵabasuḻana. Yaḵon nanuḻataḵ ta ipaḵaawatḵu ḵan diḵayu si sinagung Apudyus nu tuttuwae ipatogyu diḵani ḵan pionyu we unudon diḵani.

¹³ Pun annaya gapunae pummigsa ḵani. Daḵampun aḵ abus pummigsa ḵani yaḵon amod os layadni te allaylayad aḵ Titus we nangugud ḵan diḵani ye lummin-awa somsomoḵna gapu ḵan diḵayu.

¹⁴ Te impasindayawḵu diḵayu ḵan siya ḵad adiyaḵpun nadismaya'tta imbagaḵ. Te tuttuwa pagay da sadi ye imbagani ya napanoḵnoḵane tuttuwa da sadi ye iyyisḵaḻḵu ḵan Titus.

¹⁵ Pun sa ayat Titus ḵan diḵayu, amo dummallu te sa sosomḵona losanyu tinuttuwa da imbagana ya sa ḵingwayu we nisagawe nammangili ḵan siya ya ambimbinsaw ḵayu nu ḵingwayu we ustu da nibaga ḵan diḵayu baḵon nu adiyupun.

¹⁶ Allaylayadaḵ sinsana te iniiggammuḵe antaḻgodaḵ ḵan diḵayu.