2 Corinthians 6 - Sa Ugud Apudyus

¹ Pun diḵani ye maḵaḵewaaḻ ḵan Apudyus, ḵodawonni ḵan diḵayu ta sa ḵinabaḻun Apudyus we inawatyu, awad oḵyan ustu'ḵ ambanagana si antataguyu.

² Te awad de nigili ye Ugud Apudyus we ḵanana, “Dingngoḻḵu da luwaḻuyu si timpu we ḵummadaguwaḵ ḵan diḵayu ya tinaguḵ diḵayu'tte ustu we aḻgawe bummadangaḵ ḵan diḵayu.” Sosomḵonyu anna, sinsadi ustu we timpu we angngoḻan Apudyus ḵan diḵayu ya sinsadi ustu we aḻgawe mataguwanyu.

Da Nampaḵaḻaman Da Paul

³ Ummanni gay atta ḵoonni ta ippun lumawengan ni somsomoḵ da asintataguni ḵan maḵabasuḻanda ta ippun oḵyan madellaw atta sanae ḵoonni si anserbiyanni ḵan Apudyus.

⁴ Ḵad da losane ḵoonni, ipailani ye anserbi ḵani ḵan Apudyus te at-attomanni da amode maal-alimuunanni ḵan adu we ampaḵaḻamanni ya da losane ampaḵimute naḵwa ḵan diḵani.

⁵ Annaya da udume ampaḵaḻamane nilaḵ-amni. Nangampigae naap-aplit ḵani, nibaḻud ḵani, ginulugulun diḵani, maayoayong ḵani'tta ḵoonni, mapuyapuyatan ḵani ḵan mauḻauḻat ḵani.

⁶ Ipailani anserbiyanni ḵan Apudyus gapu'tte ampoḻḵase antataguni'tte nangigammuwanni si ḵatuttuwaan, gapu'tte ḵinaanusni'tta nampaḵaḻamanni. Mipaila bos ḵabooḻanni ye itton ni Ispiritu Santu ya sa gattoḵe ayatni'tta asintataguni.

⁷ Ḵad mipaila bos gapu'tte angituttuduwanni si ḵatuttuwaan ḵan ḵabooḻan Apudyus we ipailana mipagapu ḵan diḵani. Anna ḵan diḵani naun-unane antatagu gapu ḵan Kristu, siya isun di ispada ḵan ḵaḻasage usaronni ye maḵagubat atta bumusuḻ ḵan Apudyus.

⁸ Sa anserbiyanni ḵan Apudyus, awad da angidayaw ḵan awad os da angibabbain ḵan diḵani. Ḵad awad os da anginsultu ya awad os da ambaḻuwon diḵani. Ḵanan os da udume matuli ḵani yaḵon tuttuwa da ugudonni.

⁹ Ḵanan da udum, “Ippun angigammu ḵan diḵani,” yaḵon sa ḵatuttuwaan adu da tagu we angigammu ḵan diḵani. Pasigni sasaggungon ḵatoy yaḵon sinsadi tuttuwae sissiyae matattagu ḵani. Taḵon ay nu nampaḵaḻam ḵani, adiḵanipun natoy.

¹⁰ Taḵon ay andadauy ḵani, pasig ḵani bos allaylayad. Ḵapus ḵani yaḵon mipagapu'tte tuttuduni adu da bummaḵnang atta naispirituwane banage itton Apudyus. Naippun ḵuḵuwani yaḵon ḵuwani da losan gapu'tte pammatini ḵan Apudyus.

¹¹ Diḵayu we susunudni'd Corinth, ippun adini imbaga ḵan diḵayu. Imbagani da losane awad si somsomoḵni ya naippun insilibni ḵan diḵayu. Amod de ayatni ḵan diḵayu.

¹² Daḵampun aḵ diḵani nangkurang ayatni ḵan diḵayu yaḵon diḵayu nangḵurang ayatyu ḵan diḵani.

¹³ Pun annae maḵaug-uggudaḵ ḵan diḵayu we isun di inaabbengḵu ḵad ipailayu ḵappos ayatyu ḵan diḵani ye isun ni ayatni ḵan diḵayu.

Adi Taḵu Oḵyan Mitipun Atta Daḵampun Aḵ Namati

¹⁴ Ḵan ditaḵu we namati, adi taḵu oḵyan mitipun atta daḵampun aḵ namati te adipun maḵwae antipun naun-unan ḵan lawweng. Maḵwa ḵamman antipun padda ḵan giḵbot?

¹⁵ Maḵwa ḵammane an-ossaan ḵasomsomḵan da Kristu ḵan Satan? Ḵad isuna bos da namati ḵan daḵampun aḵ namati.

¹⁶ Ḵad maḵwa ḵamman antitimpuyug da templon Apudyus atta sinan-apudyus? Ditaḵu templo we boḻoy Apudyus we iinggawan ni matattagu we Apudyus. Te ḵanan Apudyus, “Iyyaḵ inggaw atta tagu ya iinggawaḵ ḵan dida ya saḵon Apudyusda ya dida da taguḵ.”

¹⁷ Pun ḵanan os Apudyus, “Tenanyu dida ya misina ḵayu ḵan dida. Ḵad adiyu tokkon da ngaimane mibelang aḵ ḵaissaw ta awatoḵ diḵayu.

¹⁸ Te nu ḵoonyu ḵatti, mibelangaḵe amayu ya diḵayu da abengḵu. Sana ḵanan Apu we maḵabooḻ.”