2 Corinthians 3 - Sa Ugud Apudyus

Aḵ Apudyus Naḻpuwan Ni Ḵabooḻan Paul

¹ Sa nangugudanni'tte sana, adiyu ḵanane idayawni long-agni. Adinipun ḵasapuḻan suḻate angidayaw ḵan diḵani ḵan diḵayu baḵon nu awad suḻat aḵ maḻpu ḵan diḵayu we idayaw diḵani'tta udume isun ni ḵoon da udum.

² Diḵayu we mismu isun di suḻate angigammuwan da tagu'tte ḵewaaḻni. Isuyu suḻate nigili'tta pusuni gapu'tte amode ayatni ḵan diḵayu ḵad allasu we igammuwon ḵan maawatan da losane tagu.

³ Ipailayu si antataguyu we diḵayu isun di suḻate inggilin Kristu mipagapu ḵan diḵani. Ḵad daḵampun aḵ lapis inusar ni nangigili yaḵon sa Ispiritun ni matattagu we Apudyus. Ḵad daḵampun aḵ batu nigiliyana yaḵon da pusuyu.

⁴ Antuḻod ḵani ye angibaga'tta sana'tte sinagung Apudyus mipagapu ḵan Kristu.

⁵ Daḵampun aḵ ḵananni ye naḻpu ḵan diḵani ḵabooḻanni ye angwa'tta annae ḵoonni yaḵon naḻpuda losan ḵan Apudyus,

⁶ we siya nangitod atte ḵabooḻanni ye angituttudu si mipanggob atte Baru we Tuḻag Apudyus atta tagu. Ḵad sa sadi ye Baru we Tuḻagna, daḵampun aḵ mibatay si nigili ye lintog nu adi mibatay si ḵewaaḻ ni Ispiritu Santu. Sa ambanagan ni nigili ye lintog, ḵatoy aḵ inggainggana. Yaḵon sa Ispiritu Santu angitod si biyag aḵ inggana.

Sa Nisabaliyan Ni Baru We Tuḻage Intuttudun Paul

⁷ Sa nangittan Apudyus atte lintog ḵan Moses we nigili'tte batu, summiling bosaḻ Moses si siling Apudyus. Ḵad taḵon ay nu maumas siling ni bosaḻna, adipun maḵaitollong da ganaḵ Israel ḵan siya. Nu ḵaḵnat nipailae siling ni dayaw ḵan ḵabooḻan Apudyus si nangittana'tte lintoge ambanag si ḵatoy aḵ inggana,

⁸ maguḻaman adi amo nasiling mipailae dayaw ḵan ḵabooḻana si anḵewaaḻan ni Ispiritu Santu we angitod si biyag aḵ inggana.

⁹ Te nu nipaila siling ni dayaw ḵan ḵabooḻan Apudyus si nangittana'tte lintoge amabasuḻ atta tagu, amo mipaila siling ni dayawna ḵan ḵabooḻana gapu si planunae ḵoona da tagu'ḵ maun-unan.

¹⁰ Sa ḵatuttuwaan, gapu ta amo dallu dayaw ni Baru we Tuḻag Apudyus, isunan ippun ogon dayaw ni dadaane lintog baḵon nu intuḻagna.

¹¹ Te nu awad dayaw ni sadi ye lintoge nampatingga, sindumallu dayaw ni Baru we Tuḻagnae naippun anungusna.

¹² Gapu ta anna ḵan diḵani ḵaḵnate namnamaonni ye iinggaw aḵ inggana Baru we Tuḻag, amod de tuḻodni ye angiwaḻagawag si Ambaḻu we Damag.

¹³ Te daḵampun aḵ awad itaḻuni nu iwaḻagawagni Ambaḻu we Damag, daḵampun aḵ isuni'ḵ Moses we inabbungana bosaḻna ta adin da ganaḵ Israel ilan maumasan ni siling ni bosaḻna.

¹⁴ Isun di tummungitong da somsomoḵda. Taḵon ay sinsadi nu basaonda lintog Moses atte Dadaane Tuḻag, adidapun maawatan. Te adipun maḵaan anatallingod atta somsomoḵda nu adida amati ḵan Kristu.

¹⁵ Taḵon ay sinsana nu basaon da Judyu lintog Moses, sissiya anatallingod atta somsomoḵda.

¹⁶ Yaḵon nu ansagungda ḵan Apu, maḵaan anatallingod si somsomoḵda.

¹⁷ Sinsadi sa Apu siya Ispiritu Santu ḵad ngaimane tagu we iinggawan ni Ispiritu Santu, mapuḵayan.

¹⁸ Pun losan ḵan ditaḵu we namati, daḵampun aḵ isu taḵu'ḵ Moses we natalingdan bosaḻna yaḵon ipaila taḵu we isun di ladawan dayaw ḵan ḵabooḻan Apu ya patilayune mabaliwan taḵu bumaḻu inggana'ḵ miyisu taḵu ḵan siya. Te aḵ Apu we sa Ispiritu Santu amagatupe amabaru ḵan amabaḻu ḵan ditaḵu.