2 Corinthians 2 - Sa Ugud Apudyus

¹ Pun simsimmoḵḵu we adiyaḵpun umali'tte sana te adiḵpun pione paḻawengon somsomoḵyu ḵasin.

² Te diḵayu abus aḵ amalayad atte somsomoḵḵu. Ḵad nu paḻawengoḵ somsomoḵyu, ngai amalayad ḵan saḵon nu?

³ Ḵad sadi gapunae intaḻyanḵu umaliyaḵ woḵ nanuḻataḵ ḵan diḵayu yaḵon umaliyaḵ oḵyan sinat ta sa umaliyaḵ sinat, adipun lumaweng somsomoḵḵu gapu ḵan diḵayu we amalayad oḵyan ḵan saḵon. Te aaddi ye nu allaylayadaḵ, allaylayad ḵayu bos losan.

⁴ Te sa sadi ye nanuḻataḵ ḵan diḵayu, lawwelawweng ḵan ansigab somsomoḵḵu woḵ nantodtod luwaḵ. Yaḵon adiḵpun insuḻat sadi ta pioḵe paḻawengon somsomoḵyu yaḵon nanuḻataḵ ta ipaigammuḵ amode ayatḵu ḵan diḵayu.

Sa Mapakawanan Da Maḵabasuḻ

⁵ Nu awad nangwa'ḵ lummawengan ni somsomoḵ, daḵampun ḵan saḵone abus pinaḻawengna yaḵon da udum os ḵan diḵayu, ibagaḵe da udum ḵan diḵayu te adiḵpun pione padagsonon basuḻna

⁶ te umanay ḵingwan da ḵaaduwan ḵan diḵayu ḵan siya'ḵ ḵadusaana.

⁷ Pun pakawanonyu oḵyan ya papigsaonyu pammatina ta adi maawanan aḵ namnama gapu'tte ummamdane domdomna.

⁸ Pun ipailayu ḵappos ḵasin ayatyu ḵan siya.

⁹ Te sa gapunae nanuḻataḵ, pioḵ pappadason diḵayu ḵan igammuwon nu tumuttuwa ḵayu'tta losane imbagabagaḵ ḵan diḵayu.

¹⁰ Ngaimane pakawanonyu, pakawanoḵ os. Ḵad nu tuttuwae awad ḵasapuḻanae mapakawan, inabusḵu pinakawan si sinagung Kristu ta bumaḻuwanyu,

¹¹ ta adi taḵu maallelaw ya maabaḵ ḵan Satan te iniiggammu taḵu da panggobna.

Sa Nambimbinsawan Paul Ad Troas

¹² Dummatongaḵ ḵad ad Troas we umoy angiwaḻagawag si Ambaḻu we Damag mipanggob ḵan Kristu, innatod Apu gundawayḵu we angiwaḻagawag sidi.

¹³ Yaḵon taḵon ay nu ḵatti ye naatod gundaway ḵan saḵon, amod de binsawḵu te naippun indasaḵ ḵan sunud taḵu we Titus sidi. Pun siya nampaḵadaaḵ atta susunud taḵu ḵan Kristu woḵ iyyaḵ ad Macedonia.

Sa Migangputan Ni Ḵewaaḻ Paul

¹⁴ Yaḵon anggappiyaaḵ ḵan Apudyus te gapu si niyossaananni ḵan Kristu, patilayune ipuyutna diḵani'tte sinagung da nadagupe tagu we isuni da baḻude illog Kristu. Ḵad mipagapu ḵan diḵani, sa ḵatuttuwaane mipanggob ḵan Kristu miwaḻagawag atta ḵinailin di ili ye mipani si bangun ni bangbanglu we misaḵnap atta adu we tagu.

¹⁵ Te ditaḵu bose angituttudu si mipanggob ḵan Kristu, isu taḵun bangbanglu we indatun Kristu ḵan Apudyus we susungsungon da losane andongoḻ ya da namati ḵan daḵampun aḵ namati.

¹⁶ Da daḵampun aḵ namati, sa ḵatuttuwaan mipanggob ḵan Kristu, isunan ambuyubuyuḵ anungsunganda te sa nangidiyananda siya gapun ni madusaanda si ḵatoy aḵ inggana. Ḵad da namati si ḵatuttuwaan mipanggob ḵan Kristu, isunan ambangubangu anungsunganda te sa amatiyanda gapun ni mataguwanda'ḵ inggana. Pun ngai maḵabooḻ angwa'tte ḵaḵnae ḵewaaḻ?

¹⁷ Yaḵon ḵan diḵani, daḵampun aḵ isuni da adu we nantuttududa'tte Ugud Apudyus ta angaḻ-anda'ḵ mabalinda. Te imbuun Apudyus diḵani ya abus aḵ ugudonni ḵatuttuwaan atte sinagungna si niyossaananni ḵan Kristu.