2 Corinthians 13 - Sa Ugud Apudyus

Sa Anungus Ni Bagbagan Paul

¹ Sana piḵlun ni umaliyaḵ ḵan diḵayu sinat. Pun sosomḵonyu impaigilin Apudyus we ḵanana, “Nu awad angidaḻum atte buḻunna, ḵasapuḻane awad duwa baḵon nu tuḻu'ḵ anaḵdoḻ si ḵatuttuwaan.”

² Sa pigwan ni ummaliyaḵ sinat, binagbagaaḵ da naḵabasuḻ si awe ya da udum ta iginoḵda da ḵoḵoḵḵonda. Ḵad sa sanae ippunaḵ ḵan diḵayu, ḵasinḵu bos bagbagaan didae naippun maḵailigsi si madusaanda si ḵasine umaliyaḵ nu adidapun ingginoḵ da ḵoḵoḵḵonda.

³ Ḵooḵ anna gapu ta pionyu we mapanoḵnoḵane an-ugud aḵ Kristu mipagapu ḵan saḵon. Te daḵampun aḵ anḵuya'ḵ Kristu we anusa ḵan diḵayu yaḵon ipailana ḵabooḻana ḵan diḵayu.

⁴ Te taḵon ay nu awad osa'ḵ ḵananae anḵuya'ḵ Kristu atte natoyana'tte kros, matattagu gapu'tte ḵabooḻan Apudyus. Pun isuna bos ḵan diḵani ye isunin anḵuya gapu si niyossaananni ḵan Kristu yaḵon nu mipanggob si ḵoonni ḵan diḵayu, ipailani ḵabooḻanae naḻpu ḵan Apudyus gapu si maḵabuḻbuḻunanni ḵan Kristu atte matattaguwana.

⁵ Awad oḵyan osa ḵan diḵayu usigona long-agna ta ilana nu tuttuwae namati si Ambaḻu we Damag mipanggob ḵan Jesu Kristu. Adiyupun ḵamman igammu we awad aḵ Jesu Kristu ḵan diḵayu? Malaksid nu daḵampun aḵ tuttuwae namati ḵayu ḵan siya.

⁶ Ḵad nu ḵoonyu ḵaḵnat, namnamaoḵe igammuwonyu we adiḵanipun mapaay.

⁷ Yaḵon sinsadi, iluwaḻuni ḵan Apudyus ta naippun oḵyan ḵoonyu'ḵ lawweng. Ḵatti oḵyan maḵwae daḵampun aḵ mipailae madayawanni yaḵon pionni ye ḵoonyu ambaḻu taḵon ay nu ḵanan da udume naippun nambanagan ni ḵewaaḻni ḵan diḵayu.

⁸ Te adipun maḵwae sullagiyonni ḵatuttuwaan yaḵon labbongni ye taḵdoḻan.

⁹ Te allaylayad ḵani nu anḵuya ḵani ya anḵosdoḻ ḵayu. Ḵad sa iluwaḻuni ḵan Apudyus, bumaḻubaḻu oḵyan antataguyu ya pumigsa pammatiyu we ippun kurangna.

¹⁰ Siya gapunae insuḻatḵu da annae ibagaḵ si ippunaḵ ḵan diḵayu ta umaliyaḵ ḵad sinat, daḵampun oḵyan aḵ ḵasapuḻane ipailaḵ ḵaḻabbongaḵe innatod Apu Jesus ḵan saḵon si anuppaḵaḵ ḵan diḵayu. Te sa angusaraḵ oḵyan si annae ḵaḻabbongaḵ sa pumigsaan ni pammatiyu, daḵampun aḵ madadailanyu.

Sa Anungus Ni Annae Suḻat

¹¹ Susunudḵu ḵan Kristu, annaya anungus ni ibagaḵ ḵan diḵayu. Allaylayad ḵayu oḵyan! Papigsaonyu pammatiyu ta ippun kurangna. Ḵad ipapatiyu unudon da intuttuduḵ ḵan diḵayu ya an-asiunud ḵayu ya adi ḵayu ansusubog. Allin-awa oḵyan ambubuḻunanyu'tta udume tagu. Ḵad aḵ Apudyus we maḻpuwan ni ayat ḵan lin-awa awad ḵan diḵayu.

¹² An-asipakumusta ḵayu we ipailayu ayatyu'tta buḻunyu.

¹³ Losan da tagun Apudyus sina pakumustaonda diḵayu.

¹⁴ Awad oḵyan ḵan diḵayu losan ḵinabaḻu we maḻpu ḵan Apu Jesu Kristu ya sa ayat Apudyus ya sa niyossaanan ni Ispiritu Santu.