2 Corinthians 12 - Sa Ugud Apudyus

Da Impailan Apudyus Ḵan Paul

¹ Ḵasapuḻane pagatupaḵe angiyisḵaḻ taḵon ay nu ippun maganabḵu. Yaḵon ug-uggudoḵ mipanggob atta impailan Apu ḵan saḵone isun di in-inop.

^2-3 Awad de igammuḵe osae namati ḵan Kristu atte naḻaḵpus nasawaḻan aḵ opate tawone nipangatu'tte ḵumaḵlu we langit. Adiḵpun igammu nu abus ispirituna'ḵ ummoy baḵon nu nidoga long-agna. Aḵ Apudyus abus aḵ angigammu. Sa igammuḵ, nipangatu annae tagu si igaw Apudyus ad langit.

⁴ Ḵad ad langit, dingngoḻna banage adipun maḵwae maugud ya adipun os maḵwae mibaga.

⁵ Sa annae tagu iyisḵaḻḵu yaḵon sa long-agḵu, adiḵpun iyisḵaḻ yaḵon abus da banage angipaila si ḵinaḵuyaḵ.

⁶ Yaḵon nu pioḵe angiyisḵaḻ si long-agḵu, daḵanaḵpun aḵ nadongdong-ogan te ḵatuttuwaan da ibagaḵ. Yaḵon adiḵpun iyisḵaḻ da nipaila ḵan saḵon ta adin da tagu ḵanane nangatuwaḵ gapu'tta innilaḵ. Te pioḵe sa ḵasomsomḵanda ḵan saḵon mibatay atta ḵingwaḵ ḵan imbagaḵe intotollongda ya dingngoḻdae mismu.

⁷ Gapu ḵad ta adimpun Apudyus pione ansoḵaḻaḵ gapu'tta ḵinangatun ni nakaskasdaawe impailana ḵan saḵon, iyyunudnae angigga'ḵ Satan aḵ saḵite isun di lutlut-uḵona long-agḵu ya ampaḵaḻamaḵ ta adiyaḵ ansoḵaḻ.

⁸ Namiḵlu we nandagdaguwaḵ ḵan Apu we ḵaanona oḵyan annae ampaḵaḻamaḵ.

⁹ Yaḵon sa insongbatna ḵan saḵon ḵanana, “Lamog ni ḵinabaḻuḵe bumadang ḵan siḵa'ḵ angan-anusam si sanate ampaḵaḻamam. Te amo mipaila ḵabooḻaḵ nu anḵuyaaḵ.” Pun amod de layadḵu we angiyisḵaḻ si ḵinaḵuyaḵ ta iinggaw ḵabooḻan Kristu ḵan saḵon.

¹⁰ Gapu ḵan Kristu, mat-opaḵ atta ḵinaḵuyaḵ, nan-ugudanda saḵon aḵ lawweng, ampaḵaḻamaḵ, ampaḵaḻamonaḵ ya napadasḵu da udume ḵaog-ogyate naḵwa. Te nu ḵumuyaaḵ, amo paḵosdoḻon Kristu saḵon.

Sa Masosomḵan Paul Atta ICorinth

¹¹ Isuḵ nin nadong-og gapu'tta sanae inugudḵu si mipanggob atte long-agḵu. Yaḵon diḵayu nangipatut ḵan saḵon te diḵayu oḵyan angitaḵdog ḵan saḵon. Taḵon ay nu ippun patogḵu, daḵampun aḵ nababbabaaḵ nu da ngannonda ḵangatuwane apostol sinat.

¹² Te sa inniinggawaḵ ḵan diḵayu, inanusaḵ da losane ampaḵaḻaman atte nangipail-aḵ atta sinyal ya da udume nakaskasdaawe angipaila si ḵabooḻan Apudyus ya sana da amanoḵnoḵ si ḵinaapostolḵu.

¹³ Te da losane ḵingwaḵ atta gimung da namati'tta udume ili, dida bos da ḵingwaḵ ḵan diḵayu. Nu adi abus adiyaḵpun nanḵodaw ḵan diḵayu'tta ḵasapuḻaḵ. Pun nu iḵagasmoḵyu ḵingwaḵe lawweng, ḵodawoḵe pakawanonaḵ.

¹⁴ Naḵasaganaaḵe umali ḵan diḵayu ḵad sana piḵluḵe umali. Ḵad nu umaliyaḵ daḵampun aḵ siya singtoḵ badangyu te daḵampun atta ittonyu gamgamaḵ yaḵon diḵayu we mismu pioḵ. Te saḵon isun di amayu si namatiyanyu ḵad daḵampun atta abeng maḻpuwan ni ḵasapuḻan da ama ḵan ina. Yaḵon da ama ḵan ina maḻpuwan ni ḵasapuḻan da abeng.

¹⁵ Ḵan saḵon, amo lumayadaḵ taḵon ay nu aminoḵ gastuwon pilaḵḵu ya ippun ogon ḵosdoḻḵu ḵan ngaimane awad ḵan saḵon para ḵan diḵayu. Taḵon ay nu ummaḵit ayatyu ḵan saḵon, amoamod ayatḵu ḵan diḵayu.

¹⁶ Pun maḵwae iyunudyu we adiyaḵpun nanḵodaw atta masapuḻḵu ḵan diḵayu. Yaḵon awad da angibagae siḵapaḵ ḵan allelawoḵ diḵayu'tte tinutuli.

¹⁷ Yaḵon ngai inonae ginundawayan diḵayu'tta imbuunḵu? Lawweng ḵamman ḵingwada ḵan diḵayu?

¹⁸ Saḵone mismu nangibuun ḵan Titus we umali sinat ya imbuunḵu osae sunud taḵu ḵan Kristu. Ginundawayaḵ ḵad ain diḵayu? Naid! Daḵampun ḵad ain aḵ an-iisu da somsomoḵni, panggobni ya ugali ye unudonni? On ḵingwani!

¹⁹ Sa somsomoḵyu nin, ibagani da sana ta taḵdoḻanni da long-agni ḵan diḵayu. Yaḵon sa ḵatuttuwaan, abus aḵ ugudonni si sinagung Apudyus gapu ta niyossaan ḵani ḵan Kristu'tta piona ḵad da losane ḵoonni, ḵoonni susunud ta papigsaonni pammatiyu.

²⁰ Te umogyataḵ aḵ odasaḵ diḵayu we siya ḵoonyu daḵampun aḵ pioḵ nu umaliyaḵ sinat ya ḵooḵ os daḵampun aḵ pionyu si anisiplinaaḵ ḵan diḵayu. Umogyataḵ os nu odasaḵ diḵayu we ansusubog, an-aḵ-apaḻ, allasu sumang-anyu'tta buḻunyu, masinasina ḵayu, an-asiliḵud ḵayu ya ansoḵaḻ ḵayu ya ippun uḻnusyu.

²¹ Umogyataḵ aḵ umaliyaḵ ḵad ḵasin, pabainanaḵ os ḵan Apudyus atte sinagungyu gapu'tta ḵoḵoḵḵonyu. Umogyataḵ nu lawweng somsomoḵḵu gapu'tta naḵabasuḻ si awe ye adidapun imbabawi da basuḻda ya adidapun iyyagaye nangwa'tta ḵaissawe ḵoḵoḵḵonda, isun ni maḵadagdagas ya da udume ḵaissawe ḵoḵoḵḵon.