2 Corinthians 11 - Sa Ugud Apudyus

Aḵ Paul Ya Da Sinan Apostol

¹ Anggappiyaaḵ nu anusanyu oḵyan dongngon annae ibagaḵ ḵan diḵayu taḵon ay nu isuḵ nin nadongdong-ogan. Pun pagatupaḵe an-ugud.

² Tuttuwae amo angimunaḵ ḵan diḵayu we isun os ni an-iimun Apudyus nu sabali unudonyu. Te isuyun babaḻasange ippun natnattoḵanae intuḻagḵu we miyasawa si os-ossaane laḻaḵi ye siya'ḵ Kristu.

³ Yaḵon umogyataḵ aḵ maallelaw somsomoḵyu ya maawis ḵayu'tta sabali ye tuttudu ḵad nan-awidanyu sipupusu ḵan ampoḻḵase somsomoḵyu ḵan Kristu we isuna naḵwa ḵan Eve we inallelaw ni uḻog.

⁴ Te nu awad umali sinat aḵ angiwaḻagawag ḵan diḵayu'tte sabali nu sa iwwaḻagawagni ye mipanggob ḵan Jesus, allasu we umapyu ḵayu. Ḵad isuna bose allasu we tumimpuyug ḵayu'tta sabali ye ispiritu ya allasu we unudonyu da sabali ye tuttudu we adipun miyisu'tte Ispiritu Santu ya sa Ambaḻu we Damag we dingngoḻyu ḵan diḵani.

⁵ Sa somsomoḵḵu daḵampun nin aḵ nababaaḵ nu da sanae ḵanandae ḵangatuwane apostolyu.

⁶ Taḵon ay nu daḵanaḵpun aḵ nalainge an-ugud, adiyaḵpun angkurang atte igammu si mipanggob ḵan Apudyus. Ḵad impaḵaawatni ḵan diḵayu we tuttuwa da sana'tta losane timpu we nantuttuduwanni ḵan diḵayu.

⁷ Sa nangiwaḻagawagaḵ ḵan diḵayu si Ambaḻu we Damag we naḻpu ḵan Apudyus, naippun ḵindawḵu'ḵ tangdan te impababaḵ long-agḵu ta midayaw ḵayu. Naḵabasuḻaḵ ḵamman si sadi ye ḵingwaḵ?

⁸ Isunan inaḵawḵu pilaḵ da gimung da namati'tta udume ili si inawatḵu badangda ta anserbiyaḵ ḵan diḵayu.

⁹ Sa inninggawaḵ ḵan diḵayu, adiyaḵpun nanḵodaw ḵan diḵayu si awad de ḵasapuḻaḵ te da susunud ḵan Kristu we naḻpu'd Macedonia da nangitod atta masapuḻḵu. Ḵad ḵatti bos ḵooḵ si umali ye aḻgawe adiḵpun paat ampaḵaḻamon diḵayu'tta masapuḻḵu.

¹⁰ Sa ḵatuttuwaan anna'ḵ Kristu ḵan saḵon, tuttuwa bose naippun ḵallabbong taḵon ay ngaiman atta losane ili si probinsiya'd Achaia aḵ maḵwae amaginoḵ ḵan saḵone angiyisḵaḻ si anna.

¹¹ Ngaipaaḵ adi anḵodaw ḵan diḵayu? Pioḵ ḵamman ipailae adiḵpun diḵayu ay-ayaton? Igammun Apudyus we ay-ayatoḵ diḵayu!

¹² Ḵad pagapagatupaḵ ḵoon ḵaḵna ta ippun wayan da awad sinate apostolyu we angiyisḵaḻ atte mipanggob si ḵewaaḻda ḵan an-isu ḵoonda si ḵoonni.

¹³ Te da annae tagu sinan apostolda, allelawonda da tagu'tta losane ḵoonda ḵad ipailadae isun di tuttuwae apostol Kristu dida.

¹⁴ Ḵad adi taḵu oḵyan mataag si sana te taḵon ay aḵ Satan maḵwa gay ipailana long-agna'ḵ isun di ambaḻu we anghel Apudyus.

¹⁵ Pun nu ḵatti, daḵampun oḵyan aḵ ḵatataag nu da anserbi ḵan siya ipailadae isun di naun-unane sammilun Apudyus. Yaḵon sa ambanaganda si umali ye aḻgaw, laḵ-amonda dusae supapaḵ da lawwenge ḵingwada.

Sa Nampaḵaḻaman Paul Gapu Atte Ḵinaapostolna

¹⁶ Iḵasinḵu bos ibagae adiyu oḵyan ḵanane nadongdong-oganaḵ. Yaḵon nu siya ḵananyu, awatonaḵe osae nadong-og ta anusanyu dongngon nu ansoḵaḻaḵ os aḵ aḵit.

¹⁷ Sa annae ugudoḵ, igammuḵe sa angiyisḵaḻaḵ si long-agḵu daḵampun aḵ naḻpu ḵan Apu yaḵon isuḵ tagu we nadongdong-ogan.

¹⁸ Yaḵon gapu ta adu da angiyisḵaḻ atta long-agda, ansoḵaḻaḵ os.

¹⁹ Ḵad gapu ta nalalaing ḵayu, inan-anusanyu da ḵoḵoḵḵon da anḵadong-og.

²⁰ Te anuanusanyu dida nu ambalinon diḵayu'ḵ musassu baḵon nu gundawayan diḵayu, siḵapanda diḵayu, ampasindayawda ḵan diḵayu ya lipaḵonda da bosaḻyu.

²¹ Mabainaḵe angibagae diḵani ḵad, ippun tuḻodni ye angwa'tte isun ni ḵingwada ḵan diḵayu! Yaḵon nu mipanggob atte tuḻoddae angiyisḵaḻ atta long-agda, ḵooḵ os ta an-ugudaḵe isun di nadongdong-ogan!

²² Pun nu ḵanandae Hebrewda, Hebrewaḵ os. Ḵad nu ḵanandae dida ganaḵ Israel, siya bos ḵan saḵon. Ḵad nu ḵananda bose dida ganaḵ Abraham, ganaḵaḵ os ḵan Abraham.

²³ Ḵad nu ḵanandae anserbida ḵan Kristu, amo nabaḻbaḻu anseserbiḵ ḵan siya nu dida. Isuḵ nin nadongdong-ogane angibaga'tta ḵassana! Amo nasigab ḵewaaḻḵu nu dida, adu timpu we nibaḻudaḵ, naap-aplitaḵ ya adu naamusanaḵ si ḵatoy gapu'tte anserbiyaḵ ḵan Kristu.

²⁴ Nangallimae inap-aplitaḵ atta buḻunḵu we Judyu atte tuḻumpuḻu ya siyame aplit.

²⁵ Ḵad namiḵlu bose pinangpang-oḵaḵ atta iRome. Sa namingsan binatubatuwaḵ. Inninggaw os namiḵlu we nilisoban ni bapur we nalluganaḵ. Namingsane nanaptappaḵaḵ atte baybay aḵ sillabi ya sin-aḻgaw.

²⁶ Ippun adi naḵwa ḵan saḵone ḵaog-ogyat atta nambabbaataḵ, isun da dinaḵoḻ da tawwang ya da tulisan atta daḻan. Inggaw os da ḵaog-ogyate ḵingwan da ḵailiyaḵe Judyu ḵan saḵon ya taḵon ay os da Gentil. Ḵaog-ogyat os naḵwa ḵan saḵon atta siyudad ya sa bumbummaaw, sa baybay ya ḵaog-ogyat da ḵingwan da ḵapappailae susunud taḵu ḵan saḵon.

²⁷ Nanḵewaḵewaaḻaḵ inggana'ḵ naayoayongaḵ, patilayune mapuyapuyatanaḵ ya nauuḻataḵ te ippun ḵanoḵ ya nauwwauwwawaḵ, naḵumoḵumogaḵ te ippun boḻoy aḵ nasuyopaḵ ya poos da silupḵu.

²⁸ Ḵad daḵampun ay aḵ abus da sadi'ḵ angitod atta ampaḵaḻamaḵ yaḵon binigate ambimbinsawaḵ atta losane gimung da namati'tta adu we ili nu ngai gay maḵwa ḵan dida.

²⁹ Te nu ḵumuya osa, ḵumuyaaḵ os. Ḵad nu awad masulisug aḵ maḵabasuḻ, sumangaaḵ atte nanulisug.

³⁰ Nu ḵasapuḻane ansoḵaḻaḵ, siya isḵaḻḵu da banage angipaila si ḵinaḵuyaḵ.

³¹ Aḵ Apudyus we Aman Apu Jesus we madaydayaw aḵ inggana, igammunae adiyaḵpun antultulli.

³² Sa inninggawaḵ ad Damascus, impaguwaḻdan ni gobernor we dinutuḵan Ari Aretas da losane lewangan ni siyudad ta padoḵmana saḵon.

³³ Yaḵon inninggaw da bummadang woḵ inniggada saḵon si daḵoḻe batawil pun impaoyda si nitaange ḵabitin ni siyudad woḵ inuyudda saḵon atte lasin ni ḵabiti woḵ ummawidaḵ.