2 Corinthians 10 - Sa Ugud Apudyus

Sa Nanaḵdoḻan Paul Si Ḵewaaḻna

¹ Saḵon aḵ Paul we ḵanan da udum ḵan diḵayu we antuḻodaḵe guminga nu adayuwaḵ ḵan diḵayu yaḵon maḵimutaḵ nu annaaḵ si sinagungyu. Gapu'tte ḵinapakumbaba ḵan ḵinaanus Jesu Kristu,

² andagdaguwaḵ ḵan diḵayu ta adipun ḵasapuḻane ipailaḵ tuḻodḵu ḵan diḵayu nu umaliyaḵ sinat. Te naḵasaganaaḵe anuppaḵ atta ḵanandae nainlubungan da ugalini ḵan panggobni.

³ Te taḵon ay nu abuse tagu ḵani si annae lubunge isuyu, adiḵanipun maḵagubat atta bumusuḻ ḵan diḵani ye isun ni ḵoon da adipun namati.

⁴ Te sa armase usaronni daḵampun aḵ naḻpu'tte ḵabooḻan ni long-agni yaḵon naḻpu'tte ḵabooḻan Apudyus we usaronni ye amaginoḵ atta ḵinalaing da nalainge an-ugud.

⁵ Dadailonni da gapun ni ansosongbatan da ngaimane ampasindayawe anupod atte angigammuwan da tagu si mipanggob ḵan Apudyus. Ḵad pasantanni da losane somsomoḵ ta tuttuwaonda'ḵ Kristu.

⁶ Nu ipailayu we losan ḵayu tumuttuwae ustu ḵan Kristu, naḵasagana ḵani ye anusa'tta ngaimane adipun tumuttuwa ḵan siya.

⁷ Itollongyu ḵad da mailan da atayu, ippun ḵamman mailayu'tta naḵwa ḵan diḵayu? Nu ḵanandae dida da ustu we tagun Kristu, siya oḵyan sosomḵonda ḵan maawatanda tagun os Kristu diḵani ye isuni dida.

⁸ Te taḵon ay nu isun di natuḻ-ayan aḵ aḵit inoḵe nangiyisḵaḻ si mipanggob atte ḵaḻabbonganni ye innatod Apudyus ḵan diḵani ta papigsaonni pammatiyu ya daḵampun aḵ maḵadadail ḵan diḵayu, adiyaḵpun mabain.

⁹ Adiḵpun pione ḵananyu we og-ogyatoḵ diḵayu'tta suḻatḵu.

¹⁰ Awad nin da udum ḵan diḵayu we ḵanandae antuḻodaḵe anuḻat atta pioḵ ibaga ḵan diḵayu yaḵon nu annaaḵ si sinagungyu anḵuyaaḵ ya ippun os anun da ibagaḵ.

¹¹ Da ḵassadi ye tagu, maawatanda oḵyane losane insuḻatni ḵan diḵayu si maidanni, siya bos ḵoonni nu anna ḵani ḵan diḵayu.

¹² Adiḵanipun antuḻode angiyisu'tte long-agni'tta tagu sinate angiyisḵaḻ atta mismu we long-agda. Yaḵon adidapun maḵimute angiyisu'tta long-agda ḵad ḵanandae sa ambaḻu, siya ḵoonda. Pun anḵadong-ogda, didae mismu angiyis-isu'tta long-agda, dida bose mismu anguwis atta long-agda.

¹³ Yaḵon ḵan diḵani, awad de ustu we patinggan ni isḵaḻni. Te adinipun iyisḵaḻ da ngaiman, abus da paḵwan Apudyus ḵan diḵani ḵad midoga ḵewaaḻni ḵan diḵayu.

¹⁴ Te adinipun tinuḻ-ayan biyangni si ummaliyanni ḵan diḵayu te diḵani da ummunae ummoy ḵan diḵayu nangiwaḻagawag si Ambaḻu we Damag si mipanggob ḵan Kristu.

¹⁵ Ḵad adinipun isḵaḻ ḵingwan da udum yaḵon isḵaḻni bos da impaḵwan Apudyus ḵan diḵani. Namnamaonni ye pumigsapigsa oḵyan pammatiyu ta awad badangni ye angwa'tta udume paḵwan Apudyus ḵan diḵani,

¹⁶ ta inḵani iwaḻagawag Ambaḻu we Damag atta udume ili ye ad-adayu nu diḵayu. Ḵad adinipun pion isḵaḻ ḵewaaḻe ḵingwan da udume tagu si sabali ye ili.

¹⁷ Ḵanan ni nigili ye Ugud Apudyus, “Ngaimane ansoḵaḻ, siya oḵyan isḵaḻna da ḵingwan Apu.”

¹⁸ Te sa tuttuwae awaton Apudyus, daḵampun aḵ sa angiyisḵaḻ si long-agna yaḵon sa iyisḵaḻ Apudyus.