2 Corinthians 1 - Sa Ugud Apudyus

Sa Laplapun Ni Suḻat

¹ Susunudḵu ḵan Kristu, saḵon aḵ Paul we apostol Jesu Kristu we nibatay si pinion Apudyus ya sa buḻunḵu sina aḵ Timothy ye sunud taḵu ḵan Kristu. Ḵad annaya suḻatḵu ḵan diḵayu'tta magimugimunge namati ḵan Apudyus ad Corinth ya da losane tagun Apudyus atte intero we probinsiya'd Achaia.

² Awad oḵyan ḵan diḵayu ḵinabaḻu ḵan lin-awae maḻpu ḵan Apudyus we Ama taḵu ya aḵ Jesu Kristu we Apu taḵu.

Sa Nanggappiyaan Paul Ḵan Apudyus

³ Madaydayaw aḵ Apudyus we sa Apudyus ḵan Aman Jesu Kristu we Apu taḵu. Siya Ama we ḵumadagu ya Apudyus we maḻpuwan da losane badang ya amapigsa'tta pammati taḵu.

⁴ Te papigsaona pammati taḵu'tta losane ampaḵaḻaman taḵu ta lamog taḵu papigsaon da pammatin da buḻun taḵu we ampaḵaḻam atta losane kalasin di ampaḵaḻamane isun ni namapigsaana ḵan ditaḵu.

⁵ Te sa ḵaadun da ampaḵaḻamanni ye isun ni nampaḵaḻaman Kristu, ḵaḵnat os isun ni amapigsaan Apudyus atta pammatini mipagapu ḵan Kristu.

⁶ Nu ampaḵaḻam ḵani, para'tte pumigsaan da pammatiyu ḵan mataguwanyu. Ḵad nu pummigsa pammatini, para'tte pumigsaan da pammatiyu bos atte angipadasanyu anganusan ḵan angattoman atta ampaḵaḻamane isun da nampaḵaḻamanni.

⁷ Ḵad ippun duwaduwan ni namnamani ḵan diḵayu te igammuni ye taḵon ay nu napadasanyu ampaḵaḻamane isun ni nampaḵaḻamanni, papigsaon Apudyus pammatiyu we isun ni namapigsaana ḵan diḵani.

⁸ Susunudḵu ḵan Kristu, pionni ye ipaigammu ḵan diḵayu da amode nampaḵaḻamane pinadasni'tte probinsiya'd Asia. Amod de nampaḵaḻamane nilaḵ-amni sidi ye adiḵanipun ogon maḵaanus inggana'ḵ ippun ogon namnamani'ḵ mabiyag.

⁹ Sa ḵatuttuwaan, ḵanannipun nu nagangput dummatong timpu we matoyanni. Yaḵon naḵwa da sana ta daḵampun aḵ sa long-agni antaḻgodanni yaḵon aḵ Apudyus we anagu'tta natoy.

¹⁰ Ḵad tuttuwae siya nangiligsi ḵan diḵani'tte ḵaog-ogyate ḵatoy ḵad igammuni ye pagatupana iligsi diḵani. Siya bos namnamaonni ye angiligsi ḵan diḵani.

¹¹ Bumadang ḵayu bose angiluwaḻu ḵan diḵani. Te nu adu da angiluwaḻu ḵan diḵani, adu bos da anggappiya ḵan Apudyus gapu'tte bindisyune innatodna ḵan diḵani mipagapu'tta adu we luwaḻu.

Sa Gapunae Imbos Paul Planuna

¹² Annaya isḵaḻni, panoḵnoḵan ni somsomoḵni ye ippun nantultulliyanni'tta asintataguni si annae lubung amod ay diḵayu. Te indaḻan Apudyus diḵani ta maḻpu'tte pusu ḵan naapudyusan da losane ḵoonni ya da losane ibagani. Pun daḵampun aḵ ḵingwani da sanae mipagapu si laing di tagu yaḵon mipagapu si ḵabooḻan Apudyus gapu'tte amode ḵinabaḻuna'tta tagu.

^13-14 Da insuḻatni ḵan diḵayu, naippun nitaḻu'ḵ panggobna nu adi sa maawatanyu nu basaonyu. Yaḵon taḵon ay nu daanyupun maawatane ustu diḵani, namnamaoḵe dumatong aḻgawe maawatanyu we ustuustu ya maḵwa isḵaḻyu diḵani ye isun ni angiyisḵaḻanni ḵan diḵayu si mipauliyan Apu Jesus.

^15-16 Gapu ta aaddi ye antaḻgod ḵayu ḵan saḵon, simsimmoḵḵu we iyyaḵ unaon diḵayu gaggaḵayon ya asiḵaniyot angaw-as ad Macedonia ḵad angoyaḵ ḵasin sinat nu angulinaḵe maḻpu'd Macedonia ta amigwa amadangaḵ ḵan diḵayu ta masoḻgaganyu ya pioḵ ose ampabadang ḵan diḵayu si sanae ayonaḵ atte probinsiya'd Judea.

¹⁷ Gapu ta adipun nituttuwa planuḵ, ḵananyu nine allasu we mabaliwan somsomoḵḵu yaḵon adipun. Adiḵpun os planuwone isun ni adipun namati ye naḵasaganae angibaga ḵanane, “On” yaḵon igammunae adinapun ḵoon.

¹⁸ Tuttuwa da ibagani ḵan diḵayu, isuna bos ḵan Apudyus we siya losane ibagana da ḵatuttuwaan.

¹⁹ Te aḵ Jesu Kristu we Abeng Apudyus we iwwaḻagawagni ḵan da Silas ya aḵ Timothy ḵan diḵayu, adinapun baliwan ibagana nu adi pasige ituttuwana.

²⁰ Te aḵ Jesu Kristu nituttuwaan da losane inkarin Apudyus. Pun mipagapu ḵan siya, ḵanan taḵu we “Amen” ḵan Apudyus ta madayawana.

²¹ Aḵ Apudyus amapigsa si pammati taḵu ḵan Kristu. Ḵad dinutuḵana ditaḵu'ḵ anserbi ḵan siya.

²² Innatod Apudyus Ispiritunae iinggaw ḵan ditaḵu we isun di maḻḵae ditaḵu da taguna ya sa Ispiritunae iinggaw ḵan ditaḵu amanoḵnoḵan taḵu we ittona da losane inkarina.

²³ Yaḵon sinsadi, aḵ Apudyus anaḵdoḻ ḵan saḵone tuttuwa annae ibagaḵ. Adiyaḵpun nipauli sinat ad Corinth te adiḵpun pione paḻawengon somsomoḵyu nu suppaḵaḵ diḵayu'tta ḵingwayu.

²⁴ Daḵampun aḵ siya panggobni ipangatanni diḵayu mipanggob si pammatiyu. Yaḵon badanganni diḵayu ta amo lumayad ḵayu te ampigsa pammatiyu.