1 Timothy 5 - Sa Ugud Apudyus

Sa Bagbaga Mipanggob Si Inon Ni Angwa Taḵu Atta Namati

¹ Adim suppaḵan da naḻaḵlaḵay nu siḵa yaḵon ummam bagbagaan didae isun ni angwam atte amam. Ḵad ibelangnu da babaḻu we isun di sinusunnudnu.

² Da anḵamad-an ḵad, ibelangnu bos didae isun di iniinnam ya da babaḻasang, ibelangnu dida'ḵ isun di sinusunnudnu we ampoḻḵas somsomoḵnu.

Sa Bagbaga Mipanggob Atta Baḻu

³ Sa mipanggob atta baḻu, patgam ya badangam dida nu naippun sunudda'ḵ angayyuwan ḵan dida.

⁴ Yaḵon nu awad da abengna baḵon nu da apuna, ḵasapuḻane adaḻondae angayyuwan si inadae baḻu te sa baḻyanda umunae angwaanda si ḵewaaḻdae naapudyusan ta subbatonda da sin-abeng ḵan dida te sana mas-oman Apudyus.

⁵ Sa baḻu we ippun paat osa'ḵ angayyuwan ḵan siya, namnamaonae aḵ Apudyus bumadang ḵan siya. Ḵad pagapagatupanae alluwaḻu ya anḵodaw aḵ badang atte inaḻgaw ḵan nilabi.

⁶ Yaḵon sa baḻu we siya gay ipapuutna somsomḵon allam-ayana, isun di natoy atte mipanggob ḵan Apudyus taḵon ay nu sissiyae matattagu.

⁷ Ibilinnu da anna'tta namati sinat ta ippun ipabasuḻ da tagu ḵan dida.

⁸ Te nu awad namati'ḵ adinapun paat pione angayyuwan atta susunudna, amod ay da ḵabaḻyanna, isun di nan-awidana pammatina ya amo sillumaweng nu sa daampun aḵ namati.

⁹ Ḵad da baḻu we midoga si listaanyu, ḵasapuḻane lumabos aḵ onompuḻu tawonda ya ḵasapuḻane namingsan nangasawa ya adipun naḵadagdagas.

¹⁰ Ḵasapuḻan ose da ambaḻu we ḵingwada, nan-asidongoḻ inondae namadaḵoḻ atta abengda, ḵamamangilida ḵan impakumbabada da long-agdae nanserbi'tta tagun Apudyus, binadanganda da ampaḵaḻame tagu ya pummangogdae angwa'tta ngaimane ambaḻu.

¹¹ Da baḻu ḵad ose sissiyae ḵaḵosdoḻanda, ilanyu ta adiyu paat idoga dida si listaanyu te nu adida maḵaiyattom atta long-agda ya pionda bos ḵasine angasawa, an-awidanda'ḵ Kristu.

¹² Ḵad nu ḵoonda ḵatti, pabasuḻon da tagu dida te nilisalisda ummunae inkarida ḵan Kristu.

¹³ Annaya bos da udume gapunae adiyu dida idoga si listaan, paingsaondae baduuḻ ya nansayasayapda an-attuattun atta boḻoy. Ḵad isaḻaddae alliḵud ya anḵapuḵaput atta ippun biyangda ya ugudonda banage adipun oḵyan maugud.

¹⁴ Pun sa ḵasomsomḵaḵ, nabaḻbaḻu angasawa da ḵaḵosdoḻandae baḻu ta umanaḵda ḵan ipapuutda ilan da ḵaboḻoyda ta ippun wayan da ḵabusuḻ taḵu we angamsew ḵan ditaḵu.

¹⁵ Ibilinḵu anna te annat da udume baḻu we naabus nan-awid ya inunudda'ḵ Satan.

¹⁶ Nu awad namati'ḵ bubai ye awad sunudna'ḵ baḻu, siya oḵyan angayyuwan ta adi masaliduduwan da namati ye magimugimung. Ta da baḻu we ippun sunudda, dida ayyuwanan ni gimung da namati.

Sa Bagbaga Mipanggob Atta Angipangpangu Atta Namati

¹⁷ Sa mipanggob atta angipangpangu'tta namati ye ambaḻu angidaḻananda, ibelangyu oḵyan dida'ḵ mapadayawan ya ustu tangdanda. Amod ay da angiwaḻagawag si Ambaḻu we Damag ya da antuttudu.

¹⁸ Te awad si nigili ye Ugud Apudyus we ḵanana, “Adiyu patingaḻan sungad ni baḵae an-iliḵonyu ta lamognae angan.” Ḵanana bos, “Sa anḵewaaḻ, labbongnae matangdanan.”

¹⁹ Adim dongngon da ipabasuḻda'tta angipangpangu'tta namati, inggana'ḵ awad duwa baḵon nu tuḻu we tagu'ḵ anaḵdoḻ.

²⁰ Yaḵon nu pagapagatupan ni angipangpangu we maḵabasuḻ, suppaḵam si sinagung ni gimung ta umogyat da udume angwa'tte ḵingwana.

²¹ Bilinoḵ siḵa'tte sinagung Apudyus ya aḵ Jesu Kristu ya da nadutuḵane anghelna ta tuttuwaom da annae ibagaḵ. Ḵad ippun oḵyan piliyam yaḵon an-iisuwom da losane tagu.

²² Adim oḵyan ḵamḵammuwone andutuḵ atte ngaimane mabigbige angipangpangu'tta namati. Te nu maigammuwane naḵabasuḻ sadi ye tagu, madusaḵa'tte basuḻna. Ummam ta adiḵa maḵabasuḻ.

²³ Sinsadi sa mipanggob atte giḵnam, annaya bagbagaḵ ḵan siḵa. Adim paabuson danum aḵ inumom yaḵon uminumḵa'ḵ aḵit atte bayas ta maagasan saḵit ni buwangnu.

²⁴ Sa mipanggob os atte ampiliyam atta angipangpangu, somsomḵome awad da tagu we nalawage maila da basuḻda'tte daandapun maḵuwis. Yaḵon da udum, nitataḻu da basuḻda yaḵon aaddi ye asi maigammu si anungus ni aḻgaw.

²⁵ Isuna bos da udume tagu, nalawage maila da ambaḻu we ḵoonda yaḵon taḵon ay nu adipun maila sinsadi, adipun os mitataḻu'ḵ inggana.