1 Timothy 4 - Sa Ugud Apudyus

Da Angituttudu Atte Tuli

¹ Nalawag imbagan ni Ispiritu Santu we sa umali ye aḻgaw, an-awidan da udume tagu ustu we pammatida. Ḵad siya patiyonda umallelawe ispiritu ya sa tuttudun da aḻan.

² Sa annae tuttudu, naḻpu'tta ḵapappailae tagu we adipun ansigab somsomoḵda nu antultullida te ummingsadae antultulli.

³ Da sanae tagu, iyadida da angasawa ya da udume maḵan. Yaḵon sa ḵatuttuwaan, ḵingwan Apudyus da sanae maḵan ta ḵanon taḵu. Ditaḵu we namati ḵan Kristu ya angigammu si ḵatuttuwaan, anggappiya taḵu ta maḵwae ḵanon taḵu da ngaimane maḵan.

⁴ Te ambaḻu da ngaimane ḵingwan Apudyus. Ḵad naippun paat midiyan nu anggappiya taḵu ḵan siya.

⁵ Te mibelange ampoḻḵas maḵan gapu'tte Ugud Apudyus ḵan luwaḻu taḵu.

Da Anserbi Ḵan Jesu Kristu

⁶ Nu ituttudum da annae bilin atta susunud ḵan Kristu sinat, ambaḻuḵae anserbi ḵan Jesu Kristu. Ḵad ipailame amo naawatam ḵatuttuwaan mipanggob si pammati ya sa ambaḻu we tuttudu we inunudnu.

⁷ Adim dongngon da ug-uggud da iyawe ye ippun panggobna te daḵampun aḵ mipanggob atte tuttuwae Apudyus. Yaḵon paingsaome angadaḻ ḵan angunud atte naapudyusane biyag.

⁸ Awad de patogna nu paḵosdoḻon taḵu da long-ag taḵu we angwa'tta ḵoon taḵu. Yaḵon simbumaḻu nu paḵosdoḻon taḵu naapudyusane biyag te sadi gattoḵe naḻpuwan ni maganab taḵu si biyag taḵu sinsadi ya nu awad taḵu pos pagay ad langit.

⁹ Tuttuwa annae imbagaḵ ya ḵaḻabbonganae matuttuwa.

¹⁰ Siya gapunae igga taḵu ḵabooḻan taḵu te sadi namnamaon taḵu ḵan Apudyus we matattagu we anagu'tta losane tagu, dallu gay ditaḵu we namati.

¹¹ Bilinom ya ituttudum ḵan dida da annae banag.

¹² Adim iyunude potogonda siḵa gapu'tte ḵinaabengnu. Yaḵon iggam ḵabooḻame ambalin aḵ unudon da namati'tte an-uugudnu, sa ambaḻu we antatagum, sa an-aayatnu, sa angogomgomam atte pammatim ya sa ḵinapoḻḵasnu.

¹³ Inggana'ḵ umaliyaḵ sinat, ipapuutnu we angibasa si Ugud Apudyus atte magimung ḵayu, soḻgagom dida ya tuttuduwam dida.

¹⁴ Adim baybay-an ḵabooḻame innatod ni Ispiritu Santu atte nangipatayan da angipangpangu'tta namati'tta imadae nangiluwaḻu ḵan siḵa ya sa nangibag-an da profeta we an-uuggudon Apudyus mipanggob atte ḵabooḻam.

¹⁵ Sosomkom da annae intudtuduḵ ḵan siḵa ta ḵoom dida'tte losane ḵabooḻam ta ilan da tagu we amo maangsanḵa si pammati.

¹⁶ Ummam antatagum ya sa ituttudum. Pagatupam ḵoon da anna ta taguwom long-agnu ya da andongoḻ ḵan siḵa.