1 Timothy 3 - Sa Ugud Apudyus

Da Angipangpangu Atta Namati

¹ Tuttuwa sanae ugud: Nu awad osa'ḵ piona ambalin aḵ angipangpangu'tta namati, ampatoge ḵewaaḻ gamgamana.

² Pun gapu ta ampatog sanae ḵewaaḻ, ḵasapuḻane ippun ḵadellawana, naannad ḵan lamogna tupodon long-agna. Ḵasapuḻane ossaan asawana ya adi maḵadagdagas. Ḵasapuḻane naangsan, ḵamamangili ya nalainge antuttudu.

³ Daḵampun aḵ bartekero, gumugulu yaḵon naanus, daḵampun aḵ subbogan ya daḵampun aḵ ḵamommod si pilaḵ.

⁴ Ḵasapuḻane ustu andadaḻanna'tte baḻyanna ḵan tuttuwaon ḵan patgan da abengna.

⁵ Te nu adinapun igammu we angidaḻan atte baḻyanna, ngai inonae angayyuwan atta namati ye magimugimung ḵan Apudyus?

⁶ Ḵasapuḻane daḵampun aḵ baru we namati ta adi ampasindayaw ya madusae isun Satan.

⁷ Ḵasapuḻane ambaḻu ugalina si antotollong da adipun amati ta adi mibabbain ya maḵna si tappoḵ Satan.

Sa Ḵinatatagun Da Deacon

⁸ Isun da deacon, ḵasapuḻane labbongdae mapatgan ḵan maun-unan an-uugudda. Ḵasapuḻan ose adida bartekero baḵon nu ḵamommod si pilaḵ.

⁹ Ḵasapuḻane ampoḻḵas somsomoḵdae angogomgom si ḵatuttuwaane pammati ye impaigammun Apudyus ḵan ditaḵu.

¹⁰ Ḵasapuḻane umunada mapadas ḵad nu mapanoḵnoḵane ippun mipabasuḻ ḵan dida, maḵwae anserbidae deacon.

¹¹ Da asawada ḵad, ḵasapuḻane labbongdae mapatgan ya adida an-ugud aḵ lawweng atta udum. Ḵasapuḻane naannadda ḵan mataḻgodanda'tta losane ḵoonda.

¹² Da ambalin aḵ deacon ḵasapuḻane ossaan asawana ya adipun maḵadagdagas ḵan igammunae angidaḻane ustu'tta abengna ya sa baḻyanna.

¹³ Te da ustu we anserserbi ye deacon, mapatganda ya natuḻoddae angibaga'tte pammatida ḵan Jesu Kristu.

Sa Panggob Paul We Nangigili

¹⁴ Namnamaoḵe masapaaḵ umali sinat yaḵon isuḻatḵu da annae bilin ḵan diḵayu.

¹⁵ Nu mataḵtaḵaḵ, igammuwom da inon ni antatagun da tagu we nidoga si baḻyan Apudyus. Ditaḵu we namati si matattagu we Apudyus nangitaḻgodana si tuttuwae tuttudu ta ilan taḵu we mituttudu we ustu ya adipun mapasantan.

¹⁶ Ḵad iniiggammu taḵu we ampatopatog pinati taḵu mipanggob ḵan Jesu Kristu. Adipun nipaigammu si awe yaḵon impaigammun Apudyus ḵan ditaḵu sinsadi. Nambalin aḵ tagu ya pinanoḵnoḵan ni Ispiritu Santu we siya Abeng Apudyus. Innilan da anghel, niwaḻagawag mipanggob ḵan siya'tta ḵinailin di ili. Namati da tagu'tte lubung ḵan siya woḵ nipangatu'd langit ta madaydayaw.