1 Timothy 2 - Sa Ugud Apudyus

Sa Mipanggob Atte Luwaḻu

¹ Pun annaya ibagaḵ ḵan siḵa. Umuna, ḵasapuḻane iluwaḻuwan taḵu da losane tagu ya anḵodaw taḵu ya anggappiya taḵu ḵan Apudyus para ḵan dida.

² Iluwaḻuwan taḵu bos da ari ya da losane nangatu da saadda ta allin-awa biyag taḵu si anserbiyan taḵu ḵan Apudyus ya sa angunudan taḵu si ustu we ugali.

³ Annaya ambaḻu ya siya mas-oman Apudyus we anagu ḵan ditaḵu.

⁴ Te pionae mataguda losane tagu ya igammuwonda ḵatuttuwaan.

⁵ Te ossaan aḵ Apudyus ḵan ossaan os angiyugud ḵan Apudyus ya da tagu. Siya'ḵ Jesu Kristu we nambalin aḵ tagu.

⁶ Siya nangitod si biyagna ta masubut da losane tagu atta madusaan da basuḻda. Naḵwa sadi si ustu we timpu we dinutuḵan Apudyus ya sadi nangipail-anae pionae matagu da losane tagu.

⁷ Sana bos gapunae saḵon dinutuḵana'ḵ angiwaḻagawag atte Ambaḻu we Damag ḵan an-apostol ta iyyaḵ ituttudu'tta Gentil tuttuwae pammati. Tuttuwa da anna.

⁸ Ḵad pioḵe da losane gimungyu we namati, alluwaḻu da laḻaḵi. Ḵasapuḻane ampoḻḵas somsomoḵda ya adidapun bumasuḻ ya ippun oḵyan summang-anda baḵon nu maḵasuboganda nu ingatuda imadae alluwaḻu.

Sa Ugali Ye Unudon Da Bubai

⁹ Da bubai ḵad os, ḵasapuḻane ummanda ansisilupda ya naannadda oḵyan. Daḵampun oḵyan aḵ patpatgonda am-amman da buuḵda, da iḵabotdae illing, da bongoḻ ya da buḻawan. Te sa somsomḵonda oḵyan, daḵampun aḵ sadi inondae angipaila'tta ḵinabaḻuda.

¹⁰ Yaḵon sa ambaḻu oḵyane ḵoonda, ipailada pammatida te sadi ustu atta bubai ye angibagae andaydayawda ḵan Apudyus.

¹¹ Gumiginnoḵ oḵyan os da bubai si an-adaḻanda'tte Ugud Apudyus ya ipakumbabada da long-agda'tte antuttudu.

¹² Ḵad adiḵpun iyunude antuttudu da bubai'tta laḻaḵi baḵon nu iturayanda dida. Ḵasapuḻan oḵyane gumiginnoḵda.

¹³ Te ḵingwan ḵad Apudyus da tagu, aḵ Adam ummunae ḵingwana asinaot aḵ Eve.

¹⁴ Ḵad daḵampun ḵan Adam naallelaw yaḵon sa bubai, pun siya ummunae naḵabasuḻ ḵan Apudyus.

¹⁵ Yaḵon mataguda taḵon ay umanaḵanda ya padaḵoḻonda da abengda nu pagatupanda pammatida ḵan Apudyus ya awad ayatda'tta asintataguda ya mitotoḵḵonda'ḵ taguna ta bumaḻu ugalida ya naannadda'tta ḵoonda.