1 Timothy 1 - Sa Ugud Apudyus

Sa Laplapun Ni Suḻat

¹ Saḵon aḵ Paul we nadutuḵan aḵ apostol we sammilun Jesu Kristu, gapu'tte bilin Apudyus we anagu ḵan ditaḵu ya aḵ Jesu Kristu we namnamaon taḵu'ḵ angwa'tta losane uuwayon taḵu.

² Annaya suḻatḵu ḵan siḵa Timothy ye ibelangku'ḵ tuttuwae abengḵu'tte pammati ḵan Jesu Kristu. Awad oḵyan ḵan siḵa ḵinabaḻu, ḵadagu ḵan lin-awae maḻpu ḵan Apudyus we Ama taḵu ya aḵ Jesu Kristu we Apu taḵu.

Da Tuliyane Mimistulu

³ Timothy, adim maliwatan imbagaḵ ḵan siḵa si ayonaḵ ad Macedonia. Ḵodawoḵ ḵan siḵae inggawḵa'd Ephesus ta bilinom da udume tagu sinat ta agaydae angituttudu si tinutuli ye tuttudu.

⁴ Ḵad ibagam ḵan dida ta adida dodongngon da ug-uggud da iyawe ya sa anduandu we listaan da ganaḵda. Te sana gapun ni ansosongbatan da tagu. Daḵampun aḵ bumadang si mituttuwaan ni planun Apudyus we ipaigammuna mipagapu si pammati.

⁵ Yaḵon sa panggob ni sanae bilin, an-asiayat ḵayu we maḻpu si ampoḻḵas ya ambaḻu we somsomoḵ ya sa gattoḵe pammati.

⁶ Awad da udume nan-awidanda da pammatida woḵ siya gay impapuutda ippun anunae sossongbat.

⁷ Piondae ambalin aḵ mimistulun ni Lintog Apudyus yaḵon adidapun maawatan da uguugudonda ya antaḻgodda'tta ibagabagada.

⁸ Igammu taḵu we ambaḻu da Lintog Apudyus nu ustu angusaran ni tagu.

⁹ Annaya maawatan taḵu, daḵampun aḵ naḵwa lintog para'tta naun-unan yaḵon para'tta tagu, da adipun anuttuwa si lintog, da ippun pammatida ḵan Apudyus, da ḵabasbassuḻan, da adipun andaydayaw ḵan Apudyus ya da angang-angyag ḵan Apudyus. Da angongat atta amada ḵan inada. Da angongat atta asintataguda,

¹⁰ da maḵadagdagas, da antattanunge angasawa'tta asillaḻaḵida ya asimbubaida, da andopap atta asintataguda ya illaḵuda dida. Da tuliyan, da angisapata'tta tinutuli ya da losane angwa'tte misullagi si tuttuwae tuttudu.

¹¹ Sa ḵatuttuwaane intuttuduḵ, mibatay si Ambaḻu we Damag we intaḻgod ni ḵangatuwan ḵan madaydayawe Apudyus ḵan saḵon.

Sa Ḵinabaḻun Apudyus

¹² Anggappiyaaḵ ḵan Jesu Kristu we Apu taḵu we amaḵosdoḻ ḵan saḵon. Te imbelangna saḵon aḵ mataḻgodan woḵ dinutuḵana saḵon aḵ anserbi ḵan siya.

¹³ Taḵon ay nu pupaḵ nan-ugudan aḵ lawweng si awe, ininsultuḵ ya nampaḵaḻamoḵ da nitun-ud ḵan siya yaḵon ḵinadaguwanaḵ pos pagay ḵan Apudyus. Te daanaḵpun amati ḵan Jesus ya ippun igammuḵe lawweng da ḵingwaḵ.

¹⁴ Ḵad ummamdan ḵinabaḻun Apu taḵu ḵan saḵon si nangittana'tte pammati ya ayat. Ittona bos sanae pammati ya ayat ḵan ditaḵu losan gapu si niyossaanan taḵu ḵan Jesu Kristu.

¹⁵ Sana tuttuwae tuttudu ya labbongnae patiyon da losane tagu: Ummali'ḵ Jesu Kristu atte lubung ta taguwona da ḵabasbassuḻan. Saḵon ḵapaatan ḵan dida.

¹⁶ Yaḵon sadi gapunae ḵinadaguwanaḵ ta ipailan Jesu Kristu we ippun isun ni anusna ḵan saḵone paate ḵabasbassuḻan. Ḵingwana ḵatti ta ilan da tagu ya amatida bos ḵan siya ya maḵwae awatonda biyag aḵ inggana.

¹⁷ Pun siya Ari aḵ inggainggana, adipun matoy, adipun maila, abus aḵ Apudyus. Siya ipatpatog taḵu ḵan daydayawon taḵu'ḵ inggainggana. Amen.

¹⁸ Da sanae imbilinḵu ḵan siḵa Timothy we imbelangḵu'ḵ abengḵu, mibatay atte nipadtu si awe atte mipanggob ḵan siḵa. Adim maliwatan da nipadtu si awe ta tumoḻodḵae maḵagubat atta losane lawweng.

¹⁹ Sa maḵagubatam atta sanae lawweng, pagatupam gogomgoman pammatim ya sa ampoḻḵase somsomoḵ. Te awad da udume tagu we iwwalinda ampoḻḵase somsomoḵ ya paate nadadail pammatida.

²⁰ Ḵaḵna isun ni naḵwa ḵan da Hymenaeus ḵan Alexander we impuḻangḵu ḵan Satan ta adaḻondae adida an-ugud aḵ lawweng mipanggob ḵan Apudyus.