1 Thessalonians 5 - Sa Ugud Apudyus

¹ Susunudḵu ḵan Kristu, sa mipanggob si timpu we maḵwaan da anna, adipun ḵasapuḻane isuḻatni.

² Te iniiggammuyu we sa aḻgawe angulinan Apu, mapoḵḵatane isun ni umaliyan ni aḵḵawan atte labi.

³ Ḵanan ḵad da tagu, “Allin-awa ḵani ya ippun ambinsawanni,” nadanatong dusae itton Apudyus ḵan didae isuna mapoḵḵatane sumigab buwang ni bubai ye anggumut. Ḵad naippun ossaan aḵ maḵaawid.

⁴ Yaḵon ḵan diḵayu susunud, daḵampun ogon aḵ anna ḵayu si pongote maaddagan nu dumatong Aḻgaw Apu we mapoḵḵatane isun ni umaliyan ni aḵḵawan.

⁵ Te nambalin taḵu'ḵ abeng ni padda baḵon nu aḻgaw, daḵampun ogon aḵ anna taḵu si labi baḵon nu pongot.

⁶ Pun adi taḵu oḵyan masusuyope isun da udum. Yaḵon pasig taḵu oḵyan madadaḵḵag ḵan an-annad.

⁷ Te da masuyop, labi masuyopanda ya da mabartek, labi mabartekanda.

⁸ Yaḵon gapu ta ditaḵu ḵuwan ni aḻgaw, naannad taḵu oḵyan. Isu taḵu oḵyan suḻdadu we angiḵabot atta saḻaḵnib ni long-agna nu maḵagubat atte ḵabusuḻna. Sa pammati taḵu ḵan ayat taḵu saḻaḵnib da baḻuḵung taḵu. Ḵad sa helmet we saḻaḵnib ni uḻu taḵu, siya namnama taḵu'tte mataguwan taḵu.

⁹ Te adimpun ditaḵu pinili ḵan Apudyus aḵ midoga si umamdane sangana. Yaḵon pinilina ditaḵu'ḵ matagu mipagapu ḵan Jesu Kristu we Apu taḵu,

¹⁰ we siya natoy para ḵan ditaḵu ta taḵon ay nu natoy taḵu baḵon nu matattagu taḵu si umaliyana, midoga taḵu matagu ḵan siya'ḵ inggana.

¹¹ Pun an-asisoḻgag ḵayu oḵyan ya an-asipapigsa ḵayu'tte pammati ye isun ni annate ḵoonyu.

Sa Anungus Ni Bagbagan Da Paul

¹² Ḵodawonni ḵan diḵayu susunudḵu ḵan Kristu ta patganyu da angipapati antuttudu, da angipangat, da angayyuwan ya da amagbaga ḵan diḵayu ta pumigsa ḵayu'tte pammati ḵan Apu.

¹³ Ḵasapuḻane patganyu dida ḵad ipailayu ayatyu gapu'tte ḵewaaḻda ya awad oḵyan atte sin-ossaossa ḵan diḵayu lin-awa.

¹⁴ Bilibilinonni bos diḵayu susunudḵu ḵan Kristu ta bagbagaanyu da baduuḻ, soḻgagonyu da allasu we madismaya, badanganyu da anḵuya pammatida ya anusanyu dida losan.

¹⁵ Ilanyu bos ta sa lawweng, adi oḵyan masubbat os atte lawwenge maḵwa. Yaḵon pasig oḵyan ambaḻu da ḵoonyu'tta buḻunyu we namati ya da losane tagu.

¹⁶ Pasig ḵayu oḵyan allaylayad,

¹⁷ patilayun ḵayu alluwaḻu,

¹⁸ ya ngaimane maḵwa, anggappiya ḵayu ḵan Apudyus te sana pinionae unudon taḵu gapu'tte nidog-an taḵu ḵan Jesu Kristu.

¹⁹ Adiyu paat paginḵon ḵewaaḻ ni Ispiritu Santu,

²⁰ ya adiyu bos amsewon da Ugud Apudyus we imbagan da profetana.

²¹ Yaḵon ḵasapuḻane panoḵnoḵanyu da losane mituttudu ya siya pagay unudonyu da ambaḻu.

²² Ḵad idiyanyu da losane kalasin di lawweng.

²³ Papoḻḵapoḻḵason oḵyan Apudyus we puun ni lin-awa da biyagyu. Ḵad ayyuwanana oḵyan da somsomoḵyu, da ḵalidodwayu ya da long-agyu ta naippun mipabasuḻ ḵan diḵayu'tte umaliyan Apu Jesu Kristu.

²⁴ Sa namili ḵan ditaḵu mataḻgodan, ḵad aaddi ye ḵoona da imbagana.

²⁵ Susunudḵu ḵan Kristu, iluwaḻuwanyu ḵappos diḵani.

²⁶ Pakumustaonyu da losane susunud taḵu ḵan Kristu sinat ta ipailayu ayatyu ḵan dida.

²⁷ Bilibilinoḵ diḵayu'tte ngadan Apu we basaonyu sanae suḻat atta losane susunud taḵu ḵan Kristu sinat.

²⁸ Awad oḵyan ḵan diḵayu ḵinabaḻu we maḻpu ḵan Apu taḵu we Jesu Kristu.