1 Thessalonians 4 - Sa Ugud Apudyus

Sa Antatagu We Mas-oman Apudyus

¹ Sinsadi susunudḵu ḵan Kristu, ibagani inonyu we matagu we mas-oman Apudyus. Ḵad siya annate ḵoonyu yaḵon mipagapu'tte ngadan Apu Jesus, ḵodawonni ḵasin ḵan diḵayu ta amo ipapatiyu oḵyane angwa.

² Te inigammuyu da imbagani ḵan diḵayu mipagapu ḵan Apu Jesus.

³ Te sana pinion Apudyus, mitotoḵḵon ḵayu'ḵ taguna ta bumaḻu ugaliyu. Pun adi ḵayu angwa'tta ḵababbain ya da lawwenge ḵoḵoḵḵon.

⁴ Diḵayu ḵad ose laḻaḵi, ḵasapuḻane tupodonyu da amaamayon da long-agyu ta mitotoḵḵon ḵayu'ḵ tagun Apudyus ta bumaḻu da ugaliyu ya adi ḵayu mabain atte sinagung da tagu.

⁵ Daḵampun oḵyan aḵ siya unudonyu pipion ni long-agyu we isun ni ḵoon da Gentil we adipun angigammu ḵan Apudyus.

⁶ Ḵasapuḻane ippun oḵyan bumasuḻ ḵan diḵayu baḵon nu angallelaw si sunudna ḵan Kristu mipagapu'tte ḵaḵnae gunay te aaddi ye aḵ Apu bumaḻos atta ngaimane angwa'tte ḵatti. Sana da imbilibilinni ḵan diḵayu.

⁷ Te adimpun Apudyus ditaḵu pinili ta angwa taḵu'tta ḵaissaw ya ḵababbain yaḵon mitotoḵḵon taḵu'ḵ taguna ta bumaḻu ugali taḵu.

⁸ Pun da ngaimane angidiyan atte annae bilin, daḵampun aḵ tagu idiyanna yaḵon aḵ Apudyus we nangitod atte Ispiritu Santu ḵan diḵayu.

⁹ Yaḵon sa mipanggob si ayat atta sunud si pammati, naippun ibagani te aḵ Apudyus we mismu nanuttudu ḵan diḵayu'tte inonyu we an-asiayat.

¹⁰ Ḵad tuttuwa te ayatonyu da losane susunud ḵan Kristu atte intero we probinsiya'd Macedonia. Yaḵon amo bilibilinonni diḵayu susunud ta amo pumigsa ayatyu.

¹¹ Iggayu ḵabooḻanyu we angipaila si allin-awae antatagu, abus ḵuwayu'ḵ ambiyanganyu ya iḵewaaḻyu da masapuḻyu we isun ni imbilinni ḵan diḵayu.

¹² Nu ḵatti antataguyu, patgan diḵayu'tta adipun amati ḵan Apudyus ya adipun ḵasapuḻan ansallay ḵayu'tta udum si mipanggob atta masapuḻyu.

Sa Maḵwa Atta Namati Ye Natoy

¹³ Susunudḵu ḵan Kristu, adinipun pione maḵaḻmun ḵayu mipanggob atta natoye namati ḵan Jesus ta adiyu idodomdom didae isun da udume ippun namnamada.

¹⁴ Te nu amati taḵu we natoy aḵ Jesus woḵ ummuli, amati taḵu bose ibuḻun Apudyus ḵan Jesus da namati ye natoy.

¹⁵ Te annaya tuttudun Apu we ipaigammuni ḵan diḵayu. Sa timpu we umaliyan Apu, ditaḵu we matattagu we natenan inggana si umaliyana, daḵampun aḵ umuna taḵu nu da natoy miyabot ḵan Apu.

¹⁶ Te aḵ Apu Jesus we mismu, dumoḻae maḻpu'd langite iyipḵawna bilin ḵad midisan poḵaw ni ḵangatuwane anghel ya guminga tangguyub Apudyus. Ḵad umuna umuli da natoye namati ḵan Kristu.

¹⁷ Ḵade sadi, ditaḵu we matattagu we natenan, midisan taḵu ḵan dida mipangatu ta intaḵu miyabot ḵan Apu si libuu. Ḵad nu maabus, inggaw taḵu ḵan siya'ḵ inggainggana.

¹⁸ Pun an-asiliwliwa ḵayu we mipagapu'tta sanae ugud.