1 Thessalonians 3 - Sa Ugud Apudyus

¹ Pune sadi, adiḵanipun ḵad ogon maḵaḵwa si ayuni, pionni ye matenan ḵan Silas we abus ad Athens.

² Ḵad ibuunni'ḵ Timothy ye sunud taḵu ḵan Kristu ta siya umali ḵan diḵayu. Buḻunni ye anserbi ḵan Apudyus we angiwaḻagawag atte Ambaḻu we Damag mipanggob ḵan Kristu. Imbuunni ta papigsaona ya soḻgagona da pammatiyu,

³ ta adi ḵayu madismaya gapu'tta ampaḵaḻamanyu. Inigammuyu we niḵoddonge ampaḵaḻam taḵu.

⁴ Te sa inninggawanni ḵan diḵayu, imbagabagani si daanna maḵwaane ḵasapuḻane ampaḵaḻam taḵu. Ḵad tuttuwae naḵwa ya iniiggammuyu.

⁵ Gapu'tte adiyaḵpun ogon maḵaanus si ayuḵ, imbuunku'ḵ Timothy te pioḵ igammuwon nu ngai inon ni pammatiyu. Nambinsawaḵ te maagyu ḵad ay tinuttuwa da subsub da susubsub, ippun ay anun ni ayongni'tte ḵewaaḻ para ḵan diḵayu.

⁶ Yaḵon sinsadi, nipauli'ḵ Timothy ye imbagana ambaḻu we damag mipanggob si ḵinapigsan da pammati ḵan ayatyu. Imbagana bose diḵani pasigyu ayuayuwane isun ni ayuni ḵan diḵayu.

⁷ Pun susunudḵu ḵan Kristu, taḵon ay nu adu da naḵwae lawweng ḵan ampaḵaḻamanni, naliwliwa ḵani gapu'tta pammatiyu.

⁸ Te sinsadi, napabaru biyagni si inigammuni ye sissiyae itataḵdogyu pammatiyu ḵan Apu.

⁹ Ngai inonni ye anggappiya ḵan Apudyus para ḵan diḵayu ta lamogna subbat laylayadni'tte sinagung Apudyus gapu ḵan diḵayu?

¹⁰ Inaḻgaw ya nilabi ye ipapangogni ḵodawon ḵan Apudyus we an-asiila taḵu ta dog-anni da angkuranganyu'tte pammati.

¹¹ Itaang oḵyan pos Apudyus we Ama taḵu ya aḵ Jesus we Apu taḵu daḻanni ta maḵaali ḵani ḵasin ḵan diḵayu.

¹² Dog-an oḵyan Apu ayatyu ta lumay-as atta buḻunyu ya losane tagu we isun ni ayatni ye lummay-as ḵan diḵayu.

¹³ Papigsaon oḵyan Apu Jesus da somsomoḵyu ta naippun angkuranganyu ya bumaḻu da ugaliyu si antotollong Apudyus we Ama taḵu si umaliyan Jesus we Apu taḵu we midoga da losane taguna.