1 Thessalonians 1 - Sa Ugud Apudyus

Sa Laplapun Ni Suḻat

¹ Saḵon aḵ Paul ya da buḻunḵu we da Silas ḵan Timothy. Annaya suḻatni'tta namati ye magimugimung ad Thessalonica we da nidoga ḵan Apudyus we Ama taḵu ya aḵ Apu Jesu Kristu. Awad oḵyan ḵan diḵayu ḵinabaḻu ḵan lin-awae maḻpu ḵan Apudyus.

Sa Pammatin Da IThessalonica

² Susunud ḵan Kristu, pasig ḵani anggappiya ḵan Apudyus atte mipanggob ḵan diḵayu losan nu ibagatbatni diḵayu'tta luwaḻuni.

³ Te nu alluwaḻu ḵani ḵan Ama taḵu we Apudyus, iḵagasmoḵni inonyu we nangigunay atta pammatiyu, pangogyu we nanḵewaaḻ gapu'tte ayat ḵan impapatiyu te antaḻgod ḵayu'tte namnamayu ḵan Apu Jesu Kristu taḵon ay nu ampaḵaḻam ḵayu.

⁴ Susunudḵu ḵan Kristu we ay-ayaton Apudyus, inigammuni ye pinilina diḵayu.

⁵ Te indatongni ḵad ḵan diḵayu Ambaḻu we Damag, daḵampun aḵ abuse ugud yaḵon nidoga bos ḵabooḻan ni Ispiritu Santu ḵan napanoḵnoḵane ḵatuttuwaan Ugud Apudyus. Igammuyu bos nantataguni si inninggawanni ḵan diḵayu sinat ḵan inonni ye bummadang ḵan diḵayu sinat.

⁶ Ḵad nambalin ḵayu'ḵ angunud ḵan diḵani ya aḵ Apu. Te taḵon ay nu amod de nampaḵaḻamanyu, sillalaylayad ḵayu we nangawat si Ugud Apudyus te innattod ni Ispiritu Santu laylayadyu.

⁷ Pun diḵayu da nambaline ambaḻu'ḵ unudon da losane namati sinat ad Macedonia ya sina'd Achaia.

⁸ Te daḵampun aḵ abus ad Macedonia ya ad Achaia aḵ nandinongoḻan ni ugud Apu we iwwaḻagawagyu. Yaḵon nandinongoḻ os pammatiyu ḵan Apudyus atta losane ili. Pun ngaipani lawa ugudon ḵan dida mipanggob atte pammatiyu?

⁹ On didae mismu nangug-uggud atte inonyu we nammangili ḵan diḵani ya sa inonyu bose nangiyagaye amati'tta sinan-apudyus woḵ ansagung ḵayu anserbi'tte tuttuwa ḵan matattagu we Apudyus.

¹⁰ Ḵad imbagada bose anusanyu uuwayon Abengna we maḻpu'd langit. Siya'ḵ Jesus we impaulin Apudyus ya siya angiligsi ḵan ditaḵu'tte ummamdane sangan Apudyus we dumatong.