1 Peter 5 - Sa Ugud Apudyus

Sa Bagbaga Atta Angipangpangu Ya Da Namati

¹ Awad de pioḵ ibaga ḵan diḵayu we angipangpangu'tta namati te osaaḵ ose angipangpangu. Osaaḵ ose nangila si nampaḵaḻaman Kristu ya midogaaḵ si ḵabaḻuwane antatagu ḵan Apudyus ad langit si umali ye aḻgaw.

² Annaya da bilinḵu ḵan diḵayu. Ummanyu ayyuwanan da tagun Apudyus we intaḻgodna ḵan diḵayu we isudan karnero. Adi ḵayu oḵyan mapattupattut yaḵon allaylayad ḵayu oḵyane angayyuwan ḵan dida te sadi pinion Apudyus. Ḵoonyu ḵewaaḻyu we daḵampun aḵ gapu si angamgamanyu si pilaḵ yaḵon gapu si ayatyu we anserbi ḵan Apudyus ya da buḻunyu.

³ Adiyu bos ipatut pionyu'tta tagu we nitaḻgod ḵan diḵayu yaḵon diḵayu oḵyan ampaniyan si ambaḻu we ugali.

⁴ Ḵad nu ampaila'ḵ Jesu Kristu we apun ni antangḵon, awatonyu annanayun ya madaydayawe gunguna.

⁵ Diḵayu ḵad ose bagbagu, ḵasapuḻane paipangat ḵayu'tta angipangpangu. Pun diḵayu losane namati, ḵasapuḻane ipakumbabayu da long-agyu'tta buḻunyu ta anserbi ḵayu'tte sin-ossaossa. Te ḵanan ni nigili ye ugudna, “Sullagiyon Apudyus da ngaimane ampasindayaw, yaḵon ipailana ḵinabaḻuna'tta ngaimane napakumbaba.”

⁶ Ipakumbabayu da long-agyu ḵan Apudyus we maḵabooḻ ta ipangatuna diḵayu si ustu we timpu.

⁷ Itaḻgodyu ḵan Apudyus da losane binimbinsawyu te siya angayyuwan ḵan diḵayu.

⁸ Ansasaggana ḵayu ḵan an-annad ḵayu. Te sa ḵabusuḻ taḵu we aḵ Satan, andaḵidaḵiwase isun di ngumoḻngoḻngoḻe layone ansingisingit aḵ sokmaḻona.

⁹ Sagangonyu'ḵ Satan mipagapu si ampigsae pammatiyu. Te igammuyu we sa mapadasanyu we ampaḵaḻam, isuna bos ampaḵaḻamane mapadasan da susunudyu ḵan Kristu si intero we lubung.

¹⁰ Nu maabus sin-aḵitane ampaḵaḻamanyu, aḵ Apudyus we naḻpuwan ni losane ḵinabaḻu, pabaruwona biyagyu ya papigsaona pammatiyu ta adi mayugayug. Siya namili ḵan diḵayu we midoga si ḵabaḻuwane antatagu ḵan Apudyus ad langite ippun anungusna mipagapu si niyossaananyu ḵan Kristu.

¹¹ Siya maḵabooḻe ampangat aḵ inggainggana. Amen.

Sa Anungus Ni Annae Suḻat

¹² Inggiliḵ anna gapu si badang Silas we imbelangḵu'ḵ mataḻgodane sunud taḵu ḵan Kristu. Inggiliḵ annae abobbae suḻat ḵan diḵayu ta papigsaoḵ pammatiyu ḵan panoḵnoḵaḵ ḵan diḵayu annae tuttuwae ḵinabaḻun Apudyus. Sosomḵonyu we ustu sadi ye ḵinabaḻuna ta adiyu an-awidan.

¹³ Pakumustaon diḵayu'tta susunudyu ḵan Kristu we awad atte siyudade ngannonda Babylon we pinilin Apudyus. Siya bos ḵan Mark we ibelangḵu'ḵ abengḵu.

¹⁴ An-asipakumusta ḵayu ta angipailae an-asiayat ḵayu. Awad oḵyan ḵan diḵayu we losane niyossaan ḵan Kristu lin-awae maḻpu ḵan Apudyus.