1 Peter 4 - Sa Ugud Apudyus

Sa Nabaliwan Ni Antatagu Taḵu

¹ Gapu ta nampaḵaḻam ya natoy aḵ Kristu sina'd luta, isaganayu bos somsomoḵyu we ampaḵaḻame isuna. Te ngaimane ampaḵaḻam long-agna, nagangpute ingginoḵnae maḵabasuḻ.

² Pun inggana si matoyana, adinapun ogon unudon da pipion ni long-agna yaḵon sa pinion Apudyus.

³ Sa awe, amod de tinangtanggayu we timpu si nangwaanyu'tta pipion da adipun amati ḵoon. Te ḵingwayu da isun da ḵaissaw ḵan ḵababbaine pipion da long-agyu, da bartek, natuḻ-ayane gangganas ya sa nanaydayawanyu'tta sinan-apudyus we misullagi si bilin Apudyus.

⁴ Pun sinsana, nataag da adipun namati si adiḵayupun ogon midoga si natuḻ-ayan ḵan ḵoḵoḵḵonda woḵ sadi gapunae nan-ugudda'ḵ lawweng si mipanggob ḵan diḵayu.

⁵ Yaḵon songbatanda ḵan Apudyus we naḵasaganae anguwis atta losane tagu we matattagu ya da natoy.

⁶ Sadi gapunae da tagu we naabus natoy, niwaḻagawag Ambaḻu we Damag ḵan dida ta taḵon ay nu maḵuwisdae isun da losane tagu, mataguda si naispirituwane biyage isun Apudyus.

Sa Anungus Da Losan

⁷ Madam-an anungus da losane banag, pun ḵasapuḻane ansomsomoḵ ḵayu we ustu ya tupodonyu da long-agyu ta ambaḻu alluwaḻuwanyu.

⁸ Sa ḵapatogane ḵoonyu, papigsaonyu an-asiayatanyu te nu an-asiayat ḵayu, adiyupun sosomḵon da amode basuḻ da buḻunyu yaḵon an-asianus ḵayu ya an-asipakawan ḵayu.

⁹ Ḵad an-asimangili ḵayu oḵyane ippun ngonot.

¹⁰ Ḵad da ḵabooḻane innatod Apudyus atte sin-ossaossae namati, usaronyu we anserbi'tta buḻunyu we isun di mataḻgodane sammilu we angayyuwan atta nankalakalasi ye bindisyune innatod Apudyus.

¹¹ Sa innattan Apudyus aḵ ḵabooḻane angiwaḻagawag, ḵasapuḻane sosomḵonae siya iwaḻagawagna Ugud Apudyus. Sa naittan aḵ ḵabooḻane anserbi'tta buḻunna, ḵasapuḻane anserbi ye usarona pigsae itton Apudyus ḵan siya ta da losane banage ḵoonyu, midaydayaw aḵ Apudyus mipagapu ḵan Jesu Kristu. Siya madaydayaw ḵan maḵabooḻe ampangat aḵ inggainggana. Amen.

Sa Ampaḵaḻaman Da Namati Ḵan Kristu

¹² Ay-ayatoḵe buḻbuḻun, adi ḵayu mataag si ummamdane padase ampaḵaḻamanyu sinsadi ye isun di awad sabali'ḵ maḵwa ḵan diḵayu.

¹³ Yaḵon allaylayad ḵayu oḵyan nu ampaḵaḻam ḵayu we isun ni ampaḵaḻaman Kristu ta amod de layadyu si mipail-an ni sumilisilinge ḵinaapudyusna.

¹⁴ Pian ḵayu nu maang-angyag ḵayu gapu si pammatiyu ḵan Kristu te sadi angigammuwanyu we iinggaw ḵan diḵayu madaydayawe Ispiritun Apudyus.

¹⁵ Yaḵon nu ampaḵaḻam ḵayu, daḵampun oḵyan aḵ gapu si pummatoyanyu, nan-aḵawanyu, nangwaanyu si lawweng baḵon nu maḵabiyanganyu'tte ḵoon da buḻunyu.

¹⁶ Yaḵon nu ampaḵaḻam ḵayu gapu ta Kristianu ḵayu, adi ḵayu mabain yaḵon dayawonyu'ḵ Apudyus te nibelang ḵayu we tagun Kristu.

¹⁷ Te dumatong timpu we anguwisan Apudyus atta losane tagu ḵad isaḻadna ḵan ditaḵu we tagun Apudyus. Ḵad nu isaḻadna ḵan ditaḵu we anḵuwis, ngai maḵwa'tta adipun tumuttuwa gapu si adidapun amatiyan si Ambaḻu we Damag we naḻpu ḵan Apudyus?

¹⁸ Ḵanan ni nigili ye Ugud Apudyus, “Nu ansigab mataguwan da naun-unane tagu, ngai ambanagan da ippun Apudyusda ya da ḵabasbassuḻan?”

¹⁹ Pun diḵayu we ampaḵapaḵaḻam gapu si pinion Apudyus, ipapatiyu ḵoon da ambaḻu ya itaḻgodyu da ḵalidodwayu we ustu ḵan Apudyus we mataḻgodane nangwa.