1 Peter 3 - Sa Ugud Apudyus

Sa Bagbaga Atta An-asawa

¹ Diḵayu we bubbubai ye naasaw-an, ḵasapuḻane paituray ḵayu'tta asawayu ta awad ḵad ḵan dida da adipun tumuttuwa gapu si adidapun amatiyan atte Ugud Apudyus, maawisdae amati gapu si ambaḻu we ugaliyu taḵon ay nu adi ḵayu an-ugud

² te itotollongda ampoḻḵase antataguyu ya sa angisipoganyu ḵan Apudyus.

³ Sa ḵinabaḻuyu, daḵampun oḵyane mibatay atta mamaḵ-ilae usaron da bubbubai, isun ni am-amman da buuḵda, sa angusaranda'tta ampatoge buḻawan ḵan bongoḻ ya sa ansilupanda'tta ampapatoge silup,

⁴ yaḵon mibatay oḵyan si awad atte somsomoḵyu we adipun maila ya adipun ḵumupas. Te sa ḵinabaḻu we ampatopatog atte antotollong Apudyus, siya ḵinaanggom ḵan allin-awae somsomoḵ.

⁵ Ḵaḵna ḵingwan da bubai ye tagun Apudyus si awe ye nantaḻgod ḵan Apudyus. Pinabaḻuda da long-agdae mismu gapu'tte impaiturayanda'tta asawada.

⁶ Isun Sarah si awe ye tinuttuwana'ḵ Abraham ya inawaganae apuna. Mibelang ḵayu we abeng Sarah nu siya ḵoonyu da ambaḻu ḵan adi ḵayu maḵimut.

⁷ Isuna bos ḵan diḵayu we laḻaḵi ye naasaw-an, ḵasapuḻane maawatanyu we ustu da asawayu te anḵuyada nu diḵayu. Patganyu bos dida te maḵatawidda ḵan diḵayu si biyag aḵ ingganae itton Apudyus gapu'tte ḵinabaḻuna. Unudonyu da sana ta ippun sumnod atta luwaḻuyu.

Sa Bagbaga Atta Losane Namati

⁸ Annaya mungimung ni ibagabagaḵ. Ḵasapuḻane an-os-ossaan ḵayu losan atte somsomoḵ ḵan maḵagiḵna ḵayu'tta buḻunyu. An-asiayat ḵayu we isun di mismu we ansusunud, an-asiḵadagu ḵayu ya ipakumbabayu da long-agyu.

⁹ Nu awad angwa ḵan diḵayu'ḵ lawweng, adiyu ibaḻos. Nu awad os an-ugud aḵ lawweng, adiyu songbatan aḵ lawweng yaḵon iluwaḻuyu ḵan Apudyus ta bindisyunana dida. Te pinilin Apudyus diḵayu'ḵ mismu we taguna ta maḵatawid ḵayu si bindisyun.

¹⁰ Te ḵanan ni nigili ye Ugud Apudyus, “Nu pion ni tagu we gangganason biyag ya allaylayad, ḵasapuḻane adi an-ugud aḵ lawweng ya adi antultulli.

¹¹ Ḵasapuḻane an-awidana lawweng ya ḵoona ambaḻu, ya masapuḻ ose ipapatina sington allin-awae maḵabuḻbuḻunana'tta buḻunna.

¹² Te pasige iillan Apu da naun-unane tagu ya dodongngona luwaḻuda, yaḵon busuḻona da tagu we angwa'ḵ lawweng.”

Sa Ḵoon Taḵu Nu Ampaḵaḻam Taḵu

¹³ Awad ḵamman angwa'ḵ lawweng ḵan diḵayu nu ipapatiyu we angwa si ambaḻu?

¹⁴ Yaḵon taḵon ay nu ampaḵaḻam ḵayu gapu si angwaanyu'tte ustu, mabindisyunan ḵayu. Pun adi ḵayu maḵimut atta amaḵaḻam ḵan diḵayu ya adi ḵayu ambinsaw,

¹⁵ yaḵon dayawonyu'ḵ Kristu we ḵangatuwane Apu atte somsomoḵyu. Pasig ḵayu ansasagganae anongbat nu awad an-imus ḵan diḵayu'tte mipanggob si namnamayu we awad ḵan diḵayu. Ḵad allin-awaonyu we sumongbate angipaila si ustu we patganyu.

¹⁶ Ḵad ḵasapuḻane pasig ampoḻḵas somsomoḵyu ta awad ḵad an-ugud aḵ lawweng ḵan diḵayu gapu si ambaḻu we ugaliyu we namati ḵan Kristu, mibabbainda si inugudda.

¹⁷ Te nabaḻbaḻu ampaḵaḻam ḵayu gapu si angwaanyu'tte ambaḻu nu siya pinion Apudyus, nu sa ampaḵaḻam ḵayu gapu si angwaanyu'tte lawweng.

¹⁸ Te aḵ Kristu, namingpingsane nampaḵaḻam ya natoy gapu'tta basuḻ taḵu. Sa naun-unan, natoy para ḵan ditaḵu we adipun naun-unan ta iyadanina ditaḵu ḵan Apudyus. Gingngatda nainlubungane long-agna yaḵon ummuli ḵad, daguse naispirituwan long-agna.

¹⁹ Ummoy ispirituna nawwaḻagawag atta nibabaḻude ḵalidodwan da nanḵaḵatoy.

²⁰ Da sanae ḵalidodwae nibabaḻud, ḵalidodwan da tagu we adipun tummuttuwa gapu si adidapun namatiyan ḵan Apudyus si timpun Noah si awe. Sa nangwaan Noah si bapur, inan-anusan Apudyus we nanguuway si amatiyan da tagu ḵan siya yaḵon adidapun tummuttuwa gapu si adidapun namatiyan, abuse waḻu we tagu da tinagun Apudyus si timpu we nalitapan ni lubung.

²¹ Sa sadi ye danum, mipani si bonyag. Gapu'tte nampabonyaganyu, taguwon Apudyus diḵayu'tte mipagapu si ummuliyan Jesu Kristu. Ḵad sa bonyag, daḵampun aḵ sa naamosan ni long-agyu ta maḵaan ḵaissaw nu adi sa alluwaḻuwanyu ḵan Apudyus ta daḻusana da somsomoḵyu.

²² Nipauli'ḵ Kristu ad langit woḵ awad si madawinan Apudyus we maḵapangat ḵan siya ya ipangatana da losane anghel ya da udume adipun mailae ḵingwanae awad de saadda ḵan ḵabooḻanda.