1 Peter 2 - Sa Ugud Apudyus

Sa Antatagun Da Pinilin Apudyus We Taguna

¹ Pun an-awidanyu da losane ḵoḵoḵḵon. Ippun oḵyan tinutuli, apos, ḵapappaila ḵan diḵayu ya adiḵayu oḵyan an-ugud aḵ lawweng si mipanggob atta asintataguyu.

² Isun da uttinge pasig mauuwaw atte susu, pasig ḵayu oḵyan mauuwaw atte naispirituwane gatase sa Ugud Apudyus ta pumigsa ḵayu si pammati inggana'ḵ mituttuwa mataguwanyu.

³ Te inabusyu napadasan ḵinabaḻun Apu.

Da Matattagu We Batu

⁴ Umadani ḵayu ḵan Apu Jesus we mipani si matattagu we batu. Sa annae batu, indiyan da tagu yaḵon siya pinilin Apudyus aḵ ḵapatogan ḵan siya.

⁵ Gapu si umadaniyanyu ḵan Jesu Kristu, mipani ḵayu bos si matattagu we batu we mausar si antaḵadan atte boḻoye ḵuwan Apudyus aḵ anserbiyanyu we papadi ye nitotoḵḵon para ḵan siya ya idatunyu da datun para ḵan siyae abuse mas-omana mipagapu ḵan Jesu Kristu.

⁶ Te ḵanan ni nigili'tte Ugud Apudyus, “Ilanyu, isaadḵu'd Zion annae batu we amapagdot si boḻoy. Siya piniliḵ ya siya ḵapatogan. Ḵad ngaimane amati ḵan siya, adipun paat madismaya.”

⁷ Pun ditaḵu we namati, ampatog sadi ye batu. Yaḵon atta adipun amati, iḵagasmoḵda oḵyan awad si nigili ye Ugud Apudyus we ḵanana, “Sa batu we indiyan da nantaḵad aḵ boḻoy, siya nambalinon Apudyus aḵ ḵapatogane batu we amapagdot si boḻoy.”

⁸ Iḵagasmoḵda oḵyan os awad si Ugud Apudyus we ḵanana, “Sana batu we ampasanga ya misubuḵan ḵan maottagan da tagu.” Misubuḵda te adidapun tuttuwaon gapu si adidapun amatiyan atte Ugud Apudyus ya sana bos planun Apudyus para ḵan dida.

Sa Ḵasasaad Da Tagu We Pinilin Apudyus

⁹ Yaḵon diḵayu pinilin Apudyus aḵ ḵabaḻyanna ya isuyu da padi ye anserbi ḵan Apudyus we Ari taḵu. Diḵayu ilin da tagu we nitotoḵḵon para ḵan siya ya ampatoge tagunae ḵinuḵuwwana ta ipaigammuyu nakaskasdaawe ḵingwana. Pinilina bos diḵayu ta tenanyu giḵbot ya inggaw ḵayu si nakaskasdaawe paddana.

¹⁰ Sa awe, daḵampun aḵ tagun Apudyus diḵayu. Yaḵon sinsana, taguna diḵayu. Sa awe, adiyupun os inawat ḵadaguna yaḵon sinsana inawatyu ḵadaguna.

Sa Paipangatan Taḵu Atta Awad Da Ḵaḻabbonganda

¹¹ Susunud ḵan Kristu we ay-ayatoḵ, gapu ta isu taḵun ḵaili si annae lubung ya sin-aḵitane abus inggawan taḵu sina, an-awidanyu ḵappos pipion ni long-agyu we angubagubat ḵan diḵayu.

¹² Ḵasapuḻane unudonyu ambaḻu we antatagu ta taḵon ay nu ḵanan da adipun amati ye lawweng da ḵoonyu nu ilanda da ambaḻu we ḵoonyu, idayawda'ḵ Apudyus atte umaliyana.

¹³ Gapu ḵan Apu taḵu we Jesu Kristu, ḵasapuḻane paipangat ḵayu'tta losane tagu we awad da ḵaḻabbonganda ḵan diḵayu. Paipangat ḵayu'tta ari ye ḵangatuwane pangat,

¹⁴ baḵon nu da gobernor we imbuun ni ari ta umoyda dusaon da angwa'ḵ lawweng ya idayawda da angwa'ḵ ambaḻu.

¹⁵ Te pinion Apudyus we ḵoonyu da ambaḻu ta guminoḵ da andongdong-oge tagu we an-uguugud atta ippun anuna.

¹⁶ Ipailayu si antataguyu we napuḵayan ḵayu we tagu yaḵon adiyu usaron napuḵayanyu'ḵ lasunyu we angwa si lawweng yaḵon maila oḵyan si antataguyu we sammilun diḵayu ḵan Apudyus.

¹⁷ Patganyu oḵyan da losane tagu, ay-ayatonyu da susunudyu ḵan Kristu ya isipogyu'ḵ Apudyus ya patganyu bos ari.

Sa Bagbaga Atta Musassu

¹⁸ Diḵayu we musassu, paipangat ḵayu'tta ap-apuwonyu ya patganyu dida. Daḵampun aḵ abus da ambaḻu ḵan an-anggome ap-apuwonyu yaḵon taḵon ay os da mabusut.

¹⁹ Te mas-om aḵ Apudyus ḵan diḵayu nu anusanyu ampaḵaḻamanyu gapu'tte anosomḵanyu si mipanggob ḵan siya taḵon ay nu ippun ḵingwayu'ḵ lawweng.

²⁰ Ippun labbong ni tagu we madayaw nu anuanusana iyattom dusa gapu'tte ḵingwanae lawweng. Yaḵon nu ampaḵaḻamon diḵayu'tta angwaanyu si ambaḻu ya inan-anusanyu, mas-om aḵ Apudyus ḵan diḵayu.

²¹ Te pinilin Apudyus diḵayu ta siya unudonyu ḵaḵnate antatagu. Te nampaḵaḻam os aḵ Kristu para ḵan diḵayu ḵad impailana antatagu we unudonyu oḵyan.

²² Adipun paat naḵabasuḻ ya ippun paat nantultulliyana.

²³ Inang-angyagda ḵad, adipun os ummang-angyag. Nampaḵaḻamonda ḵad, adinapun inḵoḻkog dusa ḵan dida yaḵon nantaḻgod ḵan Apudyus we naun-unan anḵuḵuwisna.

²⁴ Aḵ Kristu we mismu nangiḵaḻu'tta basuḻ taḵu si natoyana'tte kros ta sadi mapuḵayan taḵu'tte ḵabooḻan ni basuḻ ya unudon taḵu naun-unane antatagu. Gapu'tta sugatna, naḵaan da saḵit taḵu.

²⁵ Te sa awe, nalimu taḵu we isun da karnero yaḵon sinsadi annae nipauli taḵu ḵan Kristu we angaayyuwan atta ḵalidodwa taḵu.