1 John 5 - Sa Ugud Apudyus

Sa Angngogan Taḵu Atta Sumullagi Ḵan Apudyus

¹ Da amati ye aḵ Jesus siya Kristu we imbuun Apudyus, dida da abeng Apudyus. Ḵad da angayat atte ama, ayatonda bos abengna.

² Sana angigammuwan taḵu we ayaton taḵu bos da buḻun taḵu we abeng Apudyus, nu ayaton taḵu'ḵ Apudyus ya tuttuwaon taḵu da bilinna.

³ Te sa an-aayat taḵu ḵan Apudyus, sa anuttuwaan taḵu'tta bilinna. Ḵad da bilinna, daḵampun aḵ ansigabe tuttuwaon,

⁴ te ngaimane abeng Apudyus, oḻgona da tagu we adipun amati we sumullagi ḵan Apudyus. Ḵad sa pammati taḵu ḵan Jesu Kristu, siya iyang-angngog taḵu'tta tagu we adipun amati.

⁵ Te sa paḵḵog atta tagu we adipun amati ye sumullagi ḵan Apudyus, siya amati ye aḵ Jesus Abeng Apudyus.

Da Namanoḵnoḵ Ḵan Jesu Kristu

^6-8 Ummali ḵad aḵ Jesus si annae luta, inninggaw da tuḻu we nangipanoḵnoḵe siya Abeng Apudyus. Sa umuna, sa nampabonyagana'tte danum. Sa ḵumagwa, sa daḻanae pummoy-as atte natoyana. Ḵad sa ḵumaḵlu, sa Ispiritu Santu we angibaga si ḵatuttuwaan. Da sanae tuḻu, nan-iisu we tinaḵdoḻanda mipanggob ḵan Jesu Kristu.

⁹ Nu patiyon taḵu panoḵnoḵ da tagu, amo patiyon taḵu oḵyan panoḵnoḵ Apudyus mipanggob si Abengna te nangatngatu'ḵ Apudyus we nangibaga.

¹⁰ Pun ngaimane amati si Abeng Apudyus, nimumuḻa'tte somsomoḵna panoḵnoḵ Apudyus atte mipanggob ḵan siya. Yaḵon sa adipun amati si imbagan Apudyus, ambalinonae tuliyan aḵ Apudyus te adinapun patiyon impanoḵnoḵnae mipanggob atte Abengna.

¹¹ Annaya pinanoḵnoḵana: Innatod Apudyus ḵan ditaḵu biyag aḵ inggana ḵad sa Abengna maḻpuwan ni sanae biyag.

¹² Pun ngaimane awatona abeng Apudyus, awad ḵan siya biyag aḵ inggana. Yaḵon da adipun angawat atte Abeng Apudyus, naippun ḵan dida biyag aḵ inggana.

Sa Anungus Ni Annae Suḻat

¹³ Inggiliḵ da annae banag ḵan diḵayu we namati si Abeng Apudyus ta angigammuwanyu we awad ḵan diḵayu biyag aḵ inggana.

¹⁴ Ḵad antaḻgod taḵu we alluwaḻu ḵan Apudyus te igammu taḵu we ngaimane ḵodawon taḵu ḵan siya sigun si piniona, dongngona ditaḵu.

¹⁵ Ḵad nu igammu taḵu we dongngona da ngaimane ḵodawon taḵu, igammu taḵu we maaḻa taḵu da ḵindaw taḵu ḵan siya.

¹⁶ Nu awad osa'ḵ angila si sunudna ḵan Kristu we maḵabasuḻ, iluwaḻuna oḵyan ta itton Apudyus ḵan siya biyag aḵ inggana. Sa pioḵ ibaga, iluwaḻuwan taḵu tagu amod ay nu daḵampun aḵ ambanag si ḵatoy naḵabasuḻana. Te awad de basuḻe ambanag si ḵatoy yaḵon daḵampun aḵ ḵanaḵe iluwaḻuwan taḵu oḵyan.

¹⁷ Tuttuwae losane naḵwa basuḻ yaḵon awad da basuḻe adipun ambanag si ḵatoy.

¹⁸ Awad da tuḻu we igammuwon taḵu oḵyan. Sa umuna, igammu taḵu we ippun abeng Apudyus aḵ pagapagatupanae bumasubasuḻ te saḻaḵniban ni Abeng Apudyus ḵad ippun lamog Satan we aniwdiwat ḵan siya.

¹⁹ Sa ḵumagwa, igammu taḵu we abeng Apudyus ditaḵu taḵon ay nu impangatan Satan da losane tagu we adipun amati.

²⁰ Ḵumaḵlu, igammu taḵu we ummali Abeng Apudyus woḵ innatodna ḵan ditaḵu pannakaawat ta igammuwon taḵu tuttuwae Apudyus. Ḵad sinsadi iinggaw taḵu si tuttuwae Apudyus te iinggaw taḵu si Abengna we aḵ Jesu Kristu. Siya tuttuwae Apudyus ya siya maḻpuwan ni biyag aḵ inggana.

²¹ Ay-ayatoḵe aabengḵu, adayuwanyu da sinan-apudyus.