1 John 4 - Sa Ugud Apudyus

Sa Angimatunan Taḵu Si Tuttuwa Ḵan Daḵampun Aḵ Tuttuwa

¹ Ay-ayatoḵe buḻbuḻun, adi ḵayu amati'tta losane angibagae sa Ispiritu Santu naḻpuwan da ituttududa. Yaḵon ummanyu panoḵnoḵan nu tuttuwae naḻpu ḵan Apudyus te adu da sinan profeta we lummoswae ummoy nantuttudu'tta ḵinailin di ili'tte lubung.

² Annaya angimatunanyu nu awad de Ispiritu Santu ḵan dida. Da losane tagu we bigbigondae aḵ Jesu Kristu nambalin tagu, aḵ Apudyus naḻpuwan da ibagabagada.

³ Yaḵon da losane tagu we adipun amigbig atte mipanggob ḵan Jesus we nambalin tagu, daḵampun ḵan Apudyus naḻpuwan da ibagabagada nu adi sa Ispiritun ni sumullagi ḵan Kristu. Didingngoḻyu we umali sadi ye sumullagi ḵan Kristu ḵad naabuse anna si lubung sinsadi.

⁴ Aabengḵu, diḵayu da abeng Apudyus ya illogyu da sinan profeta te adidapun lamog inallelaw diḵayu. Te sa Ispiritu Santu we awad ḵan diḵayu, amo maḵabooḻ nu aḵ Satan we angipangat atta tagu we adipun namati.

⁵ Da sinan profeta we awad si lubung, nainlubungan da tuttududa. Ḵad pipion da tagu we adipun namati ye andongoḻ ḵan dida.

⁶ Yaḵon ditaḵu da abeng Apudyus. Pun da buḻun taḵu we angigammu ḵan Apudyus, piondae andongoḻ atta ituttudu taḵu. Yaḵon da daḵampun aḵ abeng Apudyus, adidapun pione andongoḻ. Sanat angimatunan taḵu'tta mituttudu nu naḻpu si Ispiritu Santu we puun ni ḵatuttuwaan baḵon nu aḵ Satan we puun ni tuli.

Sa Ayat Apudyus

⁷ Ay-ayatoḵe buḻbuḻun, an-asiayat taḵu te sa ayat naḻpu ḵan Apudyus. Pun sa angayat atta bubuḻunna, siya abeng Apudyus ya igammuna'ḵ Apudyus.

⁸ Yaḵon sa ippun ayatna'tta buḻunna, adinapun os igammu'ḵ Apudyus te aḵ Apudyus pasig naayat.

⁹ Ḵad sa inon Apudyus we nangipaila si ayatna ḵan ditaḵu, imbuunna ossaane Abengna atte annae lubung ta maḵwae awaton taḵu biyag aḵ inggana gapu ḵan siya.

¹⁰ Ḵad sana gattoḵe ayat: Daḵampun atte ayat taḵu ḵan Apudyus yaḵon sa ayatnae impailana ḵan ditaḵu si nangibuunana si Abengna ta siya angidatun atte long-agna ta maḵaan sangan Apudyus ya mapakawan da basuḻ taḵu.

¹¹ Ay-ayatoḵe buḻbuḻun, gapu ta amod nan-aayat Apudyus ḵan ditaḵu, ḵasapuḻan ose an-asiayat taḵu.

¹² Ippun paat tagu'ḵ nangila ḵan Apudyus. Yaḵon nu an-asiayat taḵu, iinggaw aḵ Apudyus ḵan ditaḵu ḵad maila si biyag taḵu ayat Apudyus we naippun kurangna.

¹³ Igammu taḵu we tuttuwae iinggaw taḵu ḵan Apudyus ya iinggaw os aḵ Apudyus ḵan ditaḵu te innatodna Ispirituna ḵan ditaḵu.

¹⁴ Ḵad innilani ḵan panoḵnoḵanni ye imbuun Apudyus we Ama Abengna aḵ anagu'tta tagu si annae lubung.

¹⁵ Ḵad ngaimane amigbig we aḵ Jesus Abeng Apudyus, iinggaw ḵan Apudyus ya iinggaw os aḵ Apudyus ḵan siya.

¹⁶ Pun igammu taḵu ya patiyon taḵu we ayaton ditaḵu ḵan Apudyus. Aḵ Apudyus pasig naayat. Pun sa tagu we pagatupanae angayat ḵan Apudyus ya da buḻunna, iinggaw ḵan Apudyus ya iinggaw os aḵ Apudyus ḵan siya.

¹⁷ Ḵad nu ḵatti isun ni biyag taḵu, amo madog-an ayat taḵu ta ippun ogon kurangna. Ḵad antaḻgod taḵu si aḻgawe anguwisan Apudyus atta tagu te sa ugali taḵu'tte lubung, isuna bos ugalin Kristu.

¹⁸ Nu awad ayat taḵu ḵan Apudyus, naippun umogyatan taḵu yaḵon sa ayate naippun angkurangana, tupodona ogyat. Te sa maḻpuwan ni ogyat sa sosomḵon taḵu mipanggob si andusaan Apudyus. Ḵad ngaimane umogyat, sissiyae angkurang ayatna.

¹⁹ Ayaton taḵu da udum te ummunae inayat Apudyus ditaḵu.

²⁰ Nu awad osa'ḵ ḵananae ayatona'ḵ Apudyus yaḵon sasangngaana asintataguna, tuliyan sanate tagu. Te nu adinapun os ayaton da asintatagunae mamaḵ-ila, adipun maḵwae ayatona'ḵ Apudyus we adinapun innila.

²¹ Pun annaya imbilin Apudyus ḵan ditaḵu: Sa angay-ayat ḵan Apudyus, ḵasapuḻan ose ayatona da asintataguna.